Thuhilh-sia 5 - Tedim Bible

Thu Mawkciam Pak A Haihuaina

¹ Biakinn-ah na pai ciangin lim takin kingaihsun in. Aman leh aman lo a khen thei lo mihaite’ biakpiaknate tawh a kibang piakna sangin thungai dingin biakinn-a paina hoihzaw hi.

² Thu ngaihsun masa-in pau in la, Pasian’ tungah thu mawkciam pak kei in. Vantungah Pasian om a, leitungah nang om na hih manin na pau dinga kilawm zah val pau kei in.

³ Na lunghimawh semsem leh na mang sia semsem ding a, tam pau semsem lecin na haina kilang semsem ding hi.

⁴ Pasian tungah thu na ciam ciangin manlangin tung sak pah in. Amah in mihaite dik sa lo hi. Na thuciamna bangin tung sak in.

⁵ Na thuciamna bangin na tunsak loh ding sangin thuciamna neih vet loh ding hoihzaw hi.

⁶ Pasian’ siampipa’ mai-ah ka khial kha hi ci-in na gen ding kisam kha ding ahih manin na kampauna hangin khial kha kei in. Tua bangin gamta kha lecin nangma tungah Pasian heh ding a, na sepsa khempeuh hong suksiatsak ding hi.

⁷ Mang tam man leeng a mawkna mah tam a, kam tam pau leeng zong a kituak mahin a mawkna thu mah kibeh laplap hi; bangbang ahi zongin Pasian zahtak lai veve in.

Nuntakna in A Mawkna

⁸ Kumpite in mizawngte gim ngah sakin, thuman thutangin na a kisep kei leh, lamdang sa kei in. Uliante pen amau’ tunga uliante in en uh a, tuate tungah a en sawn a lianzaw khat om lai hi.

⁹ Gam khat peuhpeuh in a kumpipa in lokhawhna lamsang a lunghimawh kumpi kisam hi.

¹⁰ Sumdeihna lungsim na neih leh lungkim hun cih na nei ngei kei ding hi; na hauh nop hangin na deih khempeuh na ngah ngei kei ding hi; hih in a mawknapi ahi hi.

¹¹ Hau semsem lecin na vak ding mi tam semsem a, hauzaw ing, ci-a na theih cih bek simloh bangmah phattuamna na ngah kei hi.

¹² Na a sem mipa in a nek ding nei taleh nei takei leh lungnuam takin ihmu thei a, a haute ahih leh lungnuam takin ihmu thei lo uh hi.

¹³ A hoih het lo na khat hih leitungah ka mu hi: mite, amau’ lunggim nadingin hau uh hi.

¹⁴ Na a sep khialh manin a neihsa teng uh suplawh uh a, a tu a tate’ luah ding bangmah om nawn lo hi.

¹⁵ I nute’ sung panin bangmah nei loin tangguakin i suah mah bangin tangguak mahin i ciahkik hi. I sepnate, i ciahpih kik theih bangmah om lo hi.

¹⁶ A dahhuai mahmah thu in: i suah hun lai-a mah bang tektekin i ciahkik ding hi; a mawknapi dinga i sepna-ah bang phattuamna ngah i hi hiam?

¹⁷ I nuntak sung teng lungzin’na, dahna, lunghimawhna, natna satna leh hehna bek tawh hun bei lel hi.

¹⁸ Keimah in ka phawk khiat thu in: Pasian in tomkha nuntak hih leitungah hong piak sungin, i sep thaman ne-in dawnin, nuamsa-in i om ding a hoihpen ahi hi. Hih in mihingte’ thumong ahi hi.

¹⁹ Pasian in mi khat neih leh lam guan’in, a hauhna nuam takin a nek sak leh, amah lungdamin a sepna thaman ne-in a om ding ahi hi. Tua nopsakna in Pasian’ kiang pan ahi hi.

²⁰ Pasian in lungdamin om sak ahih manin a nuntak tom lam phawkin nei kha lo ding hi.