Thuhilh-sia 10 - Tedim Bible

Haina Thaman

¹ A sisa thote in paknamtui bung sunga om paknamtui uih sak thei a, haitatna themno khat in pilna lianpen susia thei hi.

² Mipilte a man-a a gamtat ding a ngeina hi a, mihaite a sia-a gamtat ding a ngeina ahi hi.

³ Mihaite, lampi-ah a pai kawm nangawnin haitat uh a, a haina uh mi khempeuh theisak uh hi.

⁴ Nang tungah gam-ukpa a heh leh, na nasepna za taisan pah kei in. Dai tak-a om hithiatna in khialhna lianpi maisak thei hi.

⁵ Hih leitungah a thuman lo, gam-ukte’ pian’sak ka muhte in:

⁶ Mihaite, za lianpi kipia a, mihaute kiniam koih suk hi.

⁷ Sakol tungah silate tuang a, miliante sila bangin a khe-un pai uh hi.

⁸ Gum a tote, gum sung mah-ah kia ding a, mi’ phung a phelsakte, gul in tu ding hi.

⁹ Suang tokhiate, suang mah in liam sak ding a, sing-ekte, sing ehna mah-ah liam ding hi.

¹⁰ I hei mawl napi-in i tat kei leh, nakpi takin sat kul a, ngaihsut masak ding pil huaizaw hi.

¹¹ Gul khiim thei napi-in i khiim kei leh, a kiman’na om tuan lo hi; gul in hong tu veve ding hi.

¹² Mipilte’ kampauna in pahtawina ngahsak a, mihaite’ kampauna in amau mah siasak hi.

¹³ Thugen a kipatun bang tum lo tawh kipan pah malam uh a, gitloh hai vai teng tawh thugen khup lel uh hi.

¹⁴ Mihaite in thu gengenin ciakciak uh hi. Mai lam-a thupiang ding kuamah in thei lo a, i sih khit-a thupiang ding hong gen thei om lo hi.

¹⁵ A inn zuat nading lampi a thei lo mihai luate bek, a innlam zon’na in gim ding uh hi.

¹⁶ A kumpipa mite’ cih bang bangin gamta lel a, zan khuavakin zu ne makai a nei, gam khatpeuh in lungkhamna thuak hi.

¹⁷ A kumpipa in lungsim khentatna nei thei a, a makaite in annek tuidawn a hun thei a, amau ki-uk thei-in zu a kham lo makai a nei, gam khat peuhpeuh, a hampha gam ahi hi.

¹⁸ Thadah lua-a a inn vang nangawn a hu nuam lopa, a inn keh ding a, a innpi nangawn in puklawh ding hi.

¹⁹ An in lung damsak a, zu in lung nuamsak a, sum in ahih leh na khempeuh a kicingsak hi.

²⁰ Na lungsim nangawn-ah, kumpipa gensia kei in la, kuama zak lohna mun na lupna tung nangawn-ah, mihaute samsia kei in. Thopi in na thugen teng na puak kha ding hi.