Thuhilh-sia 1 - Tedim Bible

Na khempeuh A Mawknapi

¹ Jerusalem khua sungah kumpi a sem, David’ tapa Thugen Siampa’ thugente;

² Thugen Siampa in hih bangin ci hi: A mawknapi, a mawknapi, na khempeuh a mawknapi,

³ Gimpi-a nisa thuak-a nasepna-ah mihing in bang noptuamna ngah ahi hiam?

⁴ Khang khat bei-in khang khat hong khang a, ahi zongin leitung kibang bang niloh hi.

⁵ Ni hong suakin ni tum a, a suakkik dingin tumzel hi.

⁶ Leitaw lam-ah huih nungin, leilu lam-ah nung leuleu a, a zuihna ngei teng mah zui-in, nungnung niloh hi.

⁷ Lui khempeuh tuipi-in luangsuk a, ahi zongin tuipi dim nai lo hi; tuinak-ah tuite tung kik zelin, a nak panin hong luangsuk kik zel hi.

⁸ Na khempeuh lunggim huai a, kuama gen zawh ding hi lo hi; Mit in a muh cim thei lo a, bil in a zak cim thei lo hi.

⁹ A omsa mah bangin hong piang kik ding a, a kisemsa bangin hong kisem kik ding hi. Leitungah a thak na khat beek om lo hi.

¹⁰ Hih in a thak ahi hi, a kici thei ding khat beek om lo hi. Eite’ khan’ ma-in, a omsa vive ahi hi.

¹¹ A beisa nate kiphawk kha nawn lo a, hong tung lai ding thute zong a khang kikte in phawk nawn lo ding hi.

Thugen Siampa’ Tuahkhak Thu

¹² Thugen siampa keimah in Jerusalem khua-ah Israel kumpi ka hi ngei hi.

¹³ Hih leitungah a kisem na khempeuh en telin a thu kan ding ka ngaihsun hi. Pasian in tua bang nasep ei tungah hong guat pen a nuam het lo nasep khat ahi hi.

¹⁴ Leitungah a kisem khempeuh ka mu khin a, tuate khempeuh a mawknapi na hi a, huihpi nungdelh tawh kibang hi.

¹⁵ A kawisate kimamsak thei lo a, a om lopi a omin kiseh thei lo hi.

¹⁶ “Pilna sangpi ka nei a, keima mai-ah Jerusalem a uk midangte khempeuh sangin ka pilzaw hi; pilna leh theihna a kici khempeuh ka theih loh om lo hi,” ka kici hi.

¹⁷ Pilna leh haina, theihna leh mawkna, a kilamdan’na ka zong hi. Ahi zongin tua bang ka hahkatna zong a mawknapi ahih lam ka phawk hi.

¹⁸ Pil semsem lehang kilunghimawh semsem a, tam thei semsem lehang hong gim sak semsem zawsop hi.