Solomon la 7 - Tedim Bible

¹ Kumpi meel pua, a ngaih baang nungak aw, na khete leh na khedap kilawm mahmah! Na phei leh na tanzumte, sing suih siamte’ suih bang hiuhiau hi.

² Na kalkawm in, leenggahzu lim tawh a kilawi lo, hai bangin uk kiukeu hi. Na kawng in, unok paak tawh a ki-um, buhlom hen tawh kibang hi.

³ Na nawite in, a takhawm helhel sakhi peeng, a omkhawm hialhial sanang nih tawh kibang hi.

⁴ Na ngawng in, saiha tausang tawh kibang hi. Na mitte in, Heshbon khuapi kulh gei-a om, tuilite tawh kibang hi. Na nak in Damaskas khuapi lam a nga, Lebanon tausang bangin hoih hiuhiau hi.

⁵ Na lutang in, Karmel Mual bangin kitawito a, na samphekte san hiuhiau a, a etlawmna in kumpipa’ mit la vangvang hi. Nungak leh Tangval A Kideih Tuakna

⁶ It luat aw, na ngaih baang a, na meel muh, nuam zungzung hi.

⁷ Tumkung bangin na etlawm a, na nawite in, nisuh gah bawk pha tawh kibang hi.

⁸ Tumkung tungah kahto-in, a gah ka lo ding hi. Na nawite in, kei adingin leenggah bawk tawh kibang a, na gimnam in apple min bangin namtui hi.

⁹ Na kam in, leenggahzu bangin khum zungzung hi. Nungak: Ka ngaihno tungah leenggahzu khum luang hen la, a muk a ha tawk kim hen.

¹⁰ Ka ngaihno’ aa ka hi a, amah in kei hong deih hi.

¹¹ Ngaihno aw, gam lakah paikhia-in, leenggui lo-ah va giak ni.

¹² Zingsangin tho baihin, leengguite a sel nai hiam, leengguite a pak nai hiam, mangkawlsing kungte a pak nai hiam, i en ding hi. Tua lai munah kong itna letsong ka hong pia ding hi.

¹³ Tua lai-ah zawl-ai kung namtui gim na za ding a, singgah lim namcin i kong gei-ah om hi, Ngaihno aw, a gah alui leh athak, nang adingin na duhduh kong koihsak hi.