Solomon la 6 - Tedim Bible

Nungak dangte:

¹ Nungak lak-a hoihpen nu aw, na ngaihno, koi-ah pai hiam? Na ngaihno, koi lam pai hiam? Amah hong zon’ pih nu’ng. Nungak:

² Ka ngaihno, paaknamtui kung a pona, a huan sungah pai hi. A huan sungah a tuu cing a, unok paakte a lo hi.

³ Ka ngaihno, kei aa hi a, kei in ama aa hi’ng. Amah in unok pak lakah a tuute gamtasak hi. Tangval in A Lawmnu Phat Tangval:

⁴ Ngaihno aw, Jerusalem khuapi bangin na etlawm a, Tirzah khuapi bangin na hoih a, vantung aksi bangin na deihhuai hi.

⁵ Keima lam hong nga kei in. Na mai in hong lenglua hi. Gilead mual tunga keelhon diang leklek bangin na samphekte phe velvel hi.

⁶ Na hate zong, a kisil khin phet tuuhon bangin, pak singseng hi. A tok khat zong om lo a, a vekpi-in kituak dimdiam hi.

⁷ Na lu khuhna puan sung panin, na kho hong san lihleh hi.

⁸ Kumpi-zi sawmguk, kumpi zineu sawmgiat, sim zawh lohin nungak om kha mah ding a,

⁹ ahi zongin khat bek ka ngai a, amah in vahui bangin it-huai hi. Amah in a nu’ tanu neihsun hi a, a nu’ ta itpen khat ahi hi. Minam numeite in amah mu-in thupha pia-in, kumpi’ zineute in amah phat uh hi.

¹⁰ Zingsang khuavak tawh a kibang, hih nungak, kua ahi hiam? Amah a mel hoih mahmah a, nitaang khataang, a bang hi.

¹¹ Kuam sunga singkungnote a en ding, leenggui a pak nai hiam cih a en ding, mangkawlsing a pak nai hiam, cih a en dingin, singno huan ah ka paisuk hi.

¹² Galdo ding a, kithawi sakol hawlpa a liin’ bangin, nang kong ngaihna hangin ka liingliing hi. Nungak dangte:

¹³ Hong ciahkik in, hong ciahkik in, Shulam numei aw, nang kong muh theih nadingun, hong ciahkik in, hong ciahkik in. Tangval: Shulam nungak, khanglui lai lam-a a laamte bangin, bang hangin mu nuam na hi uh hiam?