Solomon la 5 - Tedim Bible

Tangval:

¹ It luat, ka lawmnu aw, ka huan sung hong tung zo ing, Ka paknamtuite ka kaikhawm hi. Ka khuaizu leh ka khuailuzu ka ne a, ka leenggahzu leh ka bawngnawite ka dawn hi. Nungak dangte: Nungak leh tangval aw, na lungkim piikpeek dongun, ne-in dawnin nuam sa un. Kikhen Man-a Lunggimna Nungak:

² Ka lup hangin ka lungsim ihmu lo a, ka ngaihno in ka kong hong kiuh ka za hi. Tangval: It luat, ngaihno, ka lungtup aw, kei hong tumsak in. Ka lu tungah daingo kia a, meiilum in ka sam kawtsak hi. Nungak:

³ Ka puan teng suah khin zo ing, ka puante silh kik ding ka hi hiam? ninsak ding ka hi hiam?

⁴ Ka ngaihno in kongkhak hong len khin napi, hong taisan kik hi.

⁵ Ka ngaihno, tumsak dingin ka kithawi a, ka khutte mirrah paknamtui tawh ka zut a, ka khutmete, mirrah paknamtui tui ka nuh a, kong hong dingin a hon’na ka len hi.

⁶ Ka ngaihno, lutsak dingin kong ka hon’ a, amah na taikhia khin ta hi. Amah a taikhiat manin ka dah lua a, amah ka zon’ hangin ka mu kei a, amah ka sap hangin hong dawng lo hi.

⁷ Khuasung a cing mite tawh ka kituak a, kei hong satin hong liamsak a, kulhzang-a a kileh den khuacingte in ka puantungsilh hawkkhia uh hi.

⁸ Kong thuum hi, Jerusalem nungakte aw, ka ngaihno na muh uh leh, lungzuangin ka sih dekna, na gensak un. Nungak in a Lawmpa Phat Nungak dangte:

⁹ Nungak lak-a a hoihpen aw, na ngaihno a bangci hiam, hong gen dih in. Tua banga kong gen liang ding uh, bangzahta-in lamdang ahi hiam? Nungak:

¹⁰ Ka ngaihno, a mel hoih a, a tha hat hi; mi tulsawm lakah tehpih ding dang om lo hi.

¹¹ A sam sau-in kil thiuhtheuh a, a sam hoih-in vom dikdek a, kham sangin zong manphazaw hi.

¹² A mittangte ahih leh, tuisiang phuan lakah a kisilsiang, luitui luang gei-a a om, vahuite tawh kibang hi.

¹³ A biangte pen paknamtui a dim-a kithun, thawlsan kiuhkeuh tawh kibang hi, A mukte pen, mirrah paknamtui tawh a kidim, unok paak tawh kibang hi.

¹⁴ A khutte etlawmin hi linlian a, suangmanpha a kiphut zungbuhte a bulh hi. A pumpi in, suangmanpha a kiphut dimdiam, saiha pak tawh kibang hi.

¹⁵ A khete in, kham citak a kiphuh dimdiamna, suangngo khuamte tawh kibang a, ama duang in Lebanon mual sang, taamtaak kung hoih bangin thupi suah hi.

¹⁶ A kampaute, khum zungzung a, a vekpi-in, deih loh ding, khat zong om lo hi. Ka ngaihno, hih bang teng hi. Jerusalem nungakte aw.