Solomon la 3 - Tedim Bible

Nungak’ Lungsim Geelna

¹ Zan sialin, ka lup kawmin, ka ngaihno ka lungngaingai a, amah ka zon’zon’ hangin ka mu zo kei hi.

² Tho-in khua sung tengah ka vak a, kongzing kong kawm tengah ka pai a, ka ngaihno ka zong a, ka zon’zon’ hangin ka mu zo kei hi.

³ Khuasung cing a, pai kawikawite ka tuak a, “Ka ngaihno na mu uh hiam?” ci- in ka dong hi.

⁴ Khua sung cingte tawh ka kikhen khit phetin, ka ngaihno tawh ka kimu hi. Amah kawi-in ka lencip a, ka pian’na ka nu’ inndei sung, ka nu’ inn dong ka tun’pih mateng ka khah kei hi.

⁵ Jerusalem nungakte aw, ko’ kingaihna nong suknawi loh nadingun, sakhi leh sanang tawh kei tungah hong kiciam un.

Mo La Dinga Kuanna Nungak:

⁶ Mirrah paknamtui leh saledi paknamtui kihel tawh a kibang, sumbuk-a paknamtui om khempeuh, a kihal khin a khu tawh a kibang, gamlak a, hong khu to henhan bang ahi hiam?

⁷ En un, Solomon, kumpi luai-in hong kizawng hi! Israel gam sunga om galkap hoihpen, galkap sawmguk in amah cing hi.

⁸ A vekpi-in namsau zat a siam vive hi a, galdo a siam vive hi khin uh hi. A vekpi-in namsau kuah kim uh a, mi’ hih khak ding cing uh hi.

⁹ Sing hoihpen tawh a kibawl luai-in, Kumpi Solomon hong kizawng hi.

¹⁰ A luai khuamte, ngun tawh kizut a, a tungah, kham tawh kizem puan kilam hi. A tut nading puansan kibawl a, a sungah savun kidap hi.

¹¹ Jerusalem nungakte aw, hong pai un la, Kumpi Solomon en dih ve un. A zi neih ni, a lungdam ni, a nu in amah a khuksak Kumpi lukhu hong khu hi.