Solomon la 1 - Tedim Bible

Lawm ngai Nungak leh Jerusalem Nungakte

¹ Solomon’ la ngaihpente: Nungak:

² Na muk tawh nong tawptawp a, nong itna in leenggahzu sangin khumzaw hi.

³ Na omna khempeuh nam vuauvuau a, na min kizaza a, nang hong ngai lo om lo hi.

⁴ Hong kai in la, paikhawm ni. Ka kumpi hong hi in la, na innah hong ciahpih in. Nang tawh om leeng i lung dam a, leenggahzu ne-in nuam sa ni. Nang kong ngaih khak tuahpha ing.

⁵ Jerusalem nungakte aw, ka vom hangin ngaih baang ing. Savun puanbuk bangin ka ang hiuhiau a, Solomon’ puankhaite ka bang hi.

⁶ Ka vom manin hong enneu kei un. Nisa ka thuakna hang ahi hi. Ka ute in kei hong gawtbawl uh a, lo hong kuan saksak uh a, keima pumpi ka don man kei hi.

⁷ Ngaihno aw, hong gen dih in. Koi lai-ah na tuu cing ding a, sun-in koi lai-ah khawl ding na hi hiam? Bang hangin tuucing dangte lakah nang hong zong kawikawi phot ding ka hi hiam? Tangval:

⁸ Nungak khempeuh lak-a a ngaih baang pen nungak aw, a mun thei lo na hi hiam? Tuuhonte zui-in na keelte hong khah in la, tuucingpa’ puanbuk gei-ah hong cing in.

⁹ Ngaihno aw, Faro’ sakoltal in sakolpite a delh bangin, nang hong kidelh hi.

¹⁰ Na biang tuak-a na samphek kaisukte ngaih baang a, suangmanpha bangin na liangko tungah kinga hi.

¹¹ Nangma adingin kham khainiang bawlin, na kizep nading zong ngun tawh bawl ni. Nungak:

¹² Ka kumpipa a lupna tungah a om lai takin ka paknamtui hong kizeel hi.

¹³ Ka ang-ah ka ngaihno hong lup lai takin, mirrah paknamtui bangin namtui viauviau hi.

¹⁴ Ka ngaihno in, En-gedi gam leenggui lo-a, a palh lihleh paak hoihte tawh kibang hi. Tangval:

¹⁵ Ngaihno aw, na meel hoih a, na mit zong ngaih baang hi. Nungak:

¹⁶ Ngaihno ngiingeei aw, na etlawm a, na ngaihhuai hi.

¹⁷ I lupna in lopa tung hi ding a, taamtaak kungte, i innkhuam hi-in, taaksan hiangte, i inn tungdap hi ding hi.