Siampi Laibu 3 - Tedim Bible

Thunuam-a Piakna

¹ “Mi khat’ biakna in thunuam-a biakna ahih a, amah in a nu hita leh a pa hita leh bawnghon lak panin ganhing khat a piak leh, amah in Topa mai-ah a sitbang lo pia ding hi.

² Tua ciangin amah in a biakna ganhing lu tungah a khut nga-in kikhopna buk kongah go ding hi; tua ciangin Aaron’ suan siampite in biakna tau kimkot tungah a si theh ding hi.

³ Thunuam-a biakna panin Topa tungah mei tawh biakna-in amah in a gilpi tuam a thaute leh asungkuate tunga a om a thau khempeuh tawh,

⁴ a kawng-a om a kal nihte athau leh a kalte tawh a lakkhiat khop ding ahi a sintuamte pia ding hi.

⁵ Tua ciangin Aaron’ suante in singkuang tunga om meihal biakpiakna tau tung mah ah hal ding uh hi; tua in Topa adingin a gim namtui, mei tawh kihal biakna ahi hi.

⁶ “Topa tungah thunuam-a a piak ding ama biakna in tuu leh keelhonte sung panin anu hita leh apa hita leh ganhing khat ahi leh, amah in a sitbang lo pia ding hi.

⁷ Amah in a biak nadingin tuuno khat a piak leh, Topa mai-ah pia-in,

⁸ a biakna ganhing lu tungah a khut nga-in kikhopna buk mai-ah tua ganhing go ding hi; tua ciangin Aaron’ suante in biakna tau kimkot tungah a si theh ding uh hi.

⁹ Tua ciangin thunuam-a biakna panin Topa tungah meihal biakna in amah in a thau, a nungguh ciangah a ki-attan a mei thau buppi leh a gilpi tuam a thaute leh a sungkuate tunga om a thau khempeuh tawh,

¹⁰ a kawng-a om a kal nihte a thau tawh, a kalte tawh a lakkhiat khop ding ahi a sintuamte pia ding hi.

¹¹ Tua ciangin siampipa in Topa tungah mei tawh kihal an tawh biakna-in biakna tau tungah hal ding hi.

¹² “Ama biakna in keel ahih leh, amah in Topa’ mai-ah pia ding a,

¹³ a lu tungah a khut nga-in kikhopna buk mai-ah go ding hi; tua ciangin Aaron’ suante in biakna tau kimkot tungah a si theh ding uh hi.

¹⁴ Tua ciangin amah in tua sung panin Topa tungah mei tawh kihal biakna-in a piak dingin a gilpi tuam a thau leh a sungkuate tunga om a thau khempeuh tawh,

¹⁵ a kawng-a om a kal nihte a thau tawh, a kalte tawh a lakkhiat khop ding ahi a sintuamte pia ding hi.

¹⁶ Tua ciangin siampipa in a gim namtui dingin mei tawh kihal an tawh biakna-in biakna tau tungah hal ding hi. A thau khempeuh Topa’ aa ahi hi.

¹⁷ Tua in na khang tawntungun na ten’na khempeuh uhah note in a thau leh a si na nek loh nadingun a tawntungin ngeina kip hi ding hi,” a ci hi.