Sawltak 6 - Tedim Bible

Sagih Kikoihna

¹ Tua lai takin nungzui mite a tam tektek uh a, Grik Judah mi meigongte in nisim kivakna a ngah loh manun ah Grik Judah mite in Hebru mite tungah a phun uh hi.

² Tua ciangin Sawm-le-nihte in nungzui mihonpite a sap khit uh ciangin, “Kote in Pasian’ thu nusia-in anneek sabuai nasep ding pen kilawm lo hi.

³ Tua ahih ciangin ute naute aw, Kha Siangtho tawh ahi zongin, lungpilna tawh ahi zongin a kidim leh zahtakna a ngah, nomau lakah pasal sagih zong un la, hih na a sem dingin kote in ka koih ding uh hi.

⁴ Kote ka hih uh leh, thungetna, leh thugenna ka hih niloh ding uh hi,” a ci uh hi.

⁵ Hih thu in mite lungkimsak ahih manin upna leh Kha Siangtho tawh a kidim Stefen akipan Filip, Prokhoras, Nikanor, Timon, Parmenas, Judah ngeina a zui Antiok khua mi Nikolas-te teel uh a, sawltakte mai-ah a koih uh hi.

⁶ Sawltakte in a lutung uh ah a khut uh nga-in thu a ngetsak uh hi.

⁷ Pasian’ thu kizel-in, Jerusalem khua-ah thu-um mi hong tam semsem a, siampite tampi in zong upna thu hong mang ta uh hi.

Stefen Kimatna

⁸ Stefen in hehpihna thupha leh vangliatna tawh kidimin mite mai-ah nalamdang a bawl hi.

⁹ Tua lai takin Sal Suakta a kici mipawlte akipan Sairin mi leh Alekzandria mi leh Kilikia mi leh Asia mi kimkhatte in a ding uh a, Stefen tawh a kiseel uh hi.

¹⁰ Amaute in Stefen in a zat lungpilna leh Kha Siangtho’ piak kammalte a nial zo kei uh hi.

¹¹ Tua ahih ciangin, “Hih mi in Moses leh Pasian tungah simmawhna thu a gen ka za uh hi!” ci-in a gen ding mite a cial sim uh a,

¹² mi honpite, upate leh laitheite a hansuah uh a, Stefen kiangah pai-in a mat khit uh ciangin vaihawmna-ah a paipih uh hi.

¹³ Mizuau tecite a sam uh a, tuate in, “Hih mi in hih mun siangtho leh Thukham khempeuh tungah a simmawh tawntung hi.

¹⁴ Bang thu a gen hiam na cih uh leh, ‘Tua Nazareth mi Zeisu in hih inn a sugawp ding a, Moses in eite hong piak ngeina a kikheelsak ding hi,’ ci-a a gen thu ka za zo uh hi,” ci-in teci a pang uh hi.

¹⁵ Vaihawmna sungah a tu mi khempeuh in Stefen a tel takpi a et uh ciangin ama maitang in vantungmi’ maitang tawh a kibat lam a mu uh hi.