Sawltak 17 - Tedim Bible

Thesalonika-ah Gamlumna

¹ Amaute in Amfipolis khua leh Apollonia khua-ah a ban’ khit uh ciangin, Thesalonika khua-ah a tung uh hi. Tua khua-ah Judah mi kikhopna inn a om hi.

² Paul in a ngeina bangin kikhopna innah tumin, amaute kiangah Nipi ni thumvei Lai Siangtho thu panin tuate tawh kiseel a,

³ Khazih in sihna a thuak khit ciangin sihna pan a thawhkik nading thu om a, “Kong thu hilh Zeisu in Khazih ahi hi,” ci-in a tel takin lakin thu a hilh hi.

⁴ Amaute kimkhat in thu um uh a, Pasian a bia uh Grikte tampi leh a minthang numeite in Paul leh Silas tawh a kipawl khawm uh hi.

⁵ Ahih hangin Judah mite in eengin, mi gilo kimkhatte a sap khit uh ciangin, mihonpi kikhawmsak-in khua sung a gamlumsak uh a, Jason’ innah a uumcip uh a, amaute mite mai-ah kaihkhiat nading a zong uh hi.

⁶ A muh loh uh ciangin Jason leh ute naute kimkhat khua ukte kiangah a paipih uh a, “Leitung gam khempeuh a kilumletsak hih mite in hih san dongin hong tung zo uh a, Jason in ama innah a tung sak hi.

⁷ Tua mi khempeuh in Kaisar kumpipa thu nialin, ‘Zeisu kici kumpipa adang khat a om hi,’ a ci uh hi,” ci-in a kiko uh hi.

⁸ Mihonpi akipan khua ukte in hih thu a zak uh ciangin a lungmang uh hi.

⁹ Tua ciangin Jason akipan midangte kikhamna sum a piaksak khit uh ciangin a khah uh hi.

Berea-ah Sawltakte

¹⁰ Ute naute in Paul leh Silas zan lai takin Berea khua-ah thakhatin a paisak uh hi. Tua khua-ah a tun’ uh ciangin Judah mi kikhopna innah a tum uh hi.

¹¹ Tua mite in Thesalonika khua mite sangin a dikzaw uh hi. Bang hang hiam i cih leh, deih phat mahmahna lungsim tawh Pasian’ thu sangin, hih thute a man hiam a man lo hiam cih a theih nadingun ni simin Lai Siangtho tel takin a sin uh hi.

¹² Tua ahih ciangin amaute tampi akipan a minthang Grik numeite leh pasalte in thu a um uh hi.

¹³ Ahih hangin Paul in Berea khua-ah Pasian’ thu a hilh thu Thesalonika khua Judah mite in a zak uh ciangin, Berea khua-ah hong pai uh a, mihonpi a hansuah khit uh ciangin, a nawngkai sak uh hi.

¹⁴ Tua ciangin ute naute in Paul tuipi dongin thakhatin a paisak uh hi. Silas leh Timoti in a tam lai uh hi.

¹⁵ Paul a kha mite in Athen khua dongin a khak khit uh ciangin Silas leh Timoti a manlangin hong pai nading vaikhakna thu a ngah khit uh ciangin, a ciah uh hi.

Athen-ah Paul

¹⁶ Paul in Athen khua-ah Silas leh Timoti ngakin a om lai takin, khua sungah milim a dim a om a muh ciangin a lungmang hi.

¹⁷ Tua ahih ciangin kikhopna inn sungah Judah mite tawh akipan Pasian a bia mite leh sumbuk lamah a kituahpihte tawh thu a kikum uh hi.

¹⁸ Epikura leh Stoik lungpilte kimkhat in Paul tawh kidem uh a, kimkhatte in, “Hih kam tam pau theipa in bang gen nuam ahi hiam?” a ci uh hi. Kimkhatte in, “Hih pa in gamdang pasiante thu hilh hi leh kilawm hi,” a ci uh hi. Bang hangin hih bangin a gen uh hiam i cih leh, Paul in Zeisu leh hin’kikna thu a hilh hang hi.

¹⁹ Tua ciangin amau in Paul a sam uh a, Areopagas mualno tungah a paipih khit uh ciangin, “Nang na hilhna thu thak kote theih ding a kilawm hiam?

²⁰ Bang hang hiam na cih leh, kote in ka zak ngeiloh uh thu na hong zasak hi. Tua thu in bang a cihnopna hiam ka thei nuam uh hi,” a ci uh hi.

²¹ Athen khua mite khempeuh leh Athen khua-ah a tung zinte in thungaih nading, thu hilh nading sim loh, nadang a sem kei uh hi.

²² Paul in Areopagas mualno tungah ding-in a gen-inah: “Athen mite aw, note in biakna na hahkat mahmah uh cih ka thei hi.

²³ Bang hang hiam na cih uh leh, lampi-ah ka pai lai takin, na biaknate uh ka et ciangin, ‘Kithei-lo Pasian Ading,’ ci-a kigelh biakna tau khat ka mu hi. Note in na theih lohpi uh a, na biak uh Pasian’ thu kong hilh ding hi.

²⁴ Leitung akipan leitung sung na khempeuh a piangsak Pasian in, van leh lei uk mangpa ahih ciangin, mi’ khut tawh kibawl biakna innah a teeng ahi kei hi.

²⁵ Amah in hin’na tawh, naksuk naktoh akipan na khempeuh hong pia ahih ciangin na khat peuhmah a deih bangin, mite’ khut tawh kivaak ahi kei hi.

²⁶ Amah in leitung mi khempeuh minam khat bek pan bawl a amaute nuntak nading hun ahi zongin, amau omna atuam atuam ahi zongin a ciamteh zo hi.

²⁷ Bang hang hiam na cih uh leh, mite in Pasian zongin a muh khak theih nading hang ahi hi. Tua bang i cih hangin Topa Pasian in eite khempeuh panin a gamla om ahi kei hi.

²⁸ Bang hang hiam na cih uh leh, Pasian hangin eite i hing, i tang, i nungta hi. Tua mah bangin note’ lai-atpa khat in a gen mah bangin, ‘Eite in ama suan i hi hi,’ a ci hi.

²⁹ Pasian’ suan i hih ciangin Pasian pen mi lungsim siamna leh khutsiamna tawh a kibawl kham tawh, ngun tawh, suang tawh kibang hi ci-a i up ding a kilawm kei hi.

³⁰ Pasian in mihingte’ theih nai loh hun bang mahin a sim loh hangin tu-in amau mawhna kisik kik nadingun mun khempeuh mite kiangah thu a pia zo hi.

³¹ Bang hang hiam na cih uh leh, amah in a sehkholhpa tawh leitung mite, thuman tawh thukhen nading ni a genkhol zo hi. Tua pa sihna pan a thawhkik ciangin a kitel zo hi ci-in mi khempeuh a thei sak zo hi,” ci-in Paul in a gen hi.

³² Amaute in misite hin’kikna thu a zak uh ciangin, kimkhat in a kosia uh hi, kimkhat in, “Hih thu tu nung ciangin ka ngaikik nuam uh hi,” a ci uh hi.

³³ Tua ciangin Paul in amaute kiang pan a paikhia hi.

³⁴ Mi kimkhat in Paul beelin thu a um uh hi. Tua mite lakah Areopagas mi Dionisias leh Damaris min nei numei khat akipan midangte zong a om uh hi.