Sawltak 11 - Tedim Bible

Jerusalem Pawlpi-ah Piter’ Thuzaksakna

¹ Gentailte in Pasian’ thu a san’ uh Judah gamah a om sawltakte leh u leh naute in a za uh hi.

² Piter in Jerusalem khua-ah a paitoh ciangin vunatte in,

³ “Nang in vunat lote kiangah pai-in amau tawh an na ne khawm hi,” ci-in a mawhsak uh hi.

⁴ Piter in a kizom a kizomin a gen-inah:

⁵ “Keimah in Joppa khua sungah thu ka ngen hi. Ka nget lai takin mang sungah vantung panin kiu li tawh a kikhaisuk puanza tawh kibang na khat ka muh leh, keima kiangah hong tungsuk hi.

⁶ Hih puan a tel takpi-in en a, ka ngaihsut lai takin leitungah khe li nei ganhingte tawh, gamsate tawh, bokvak ganhingte tawh, vana vasate tawh ka mu hi.

⁷ ‘Piter aw, tho in, go in la, ne in,’ hong ci aw khat ka za hi.

⁸ Keimah in, ‘Topa aw, tua bang hi thei lo hi. Bang hang hiam na cih leh, a nin a siangtho lote keima kam sungah khatvei beek a tum ngei kei hi,’ ka ci hi.

⁹ ‘Pasian in a sian’ thosakte a siangtho lo na sa kei in,’ ci-in vantung panin nihvei aw in hong ci hi.

¹⁰ Tua mah bangin thumvei a hih khit ciangin tua khempeuh vantungah a kaito kik hi.

¹¹ Kaisaria khua pan ka kiangah hong sawl mi thum in thakhatin ka omna inn kiangah a ding uh hi.

¹² Kha Siangtho in, ‘Na lung himawh sak loin amau tawh na paikhawm in,’ hong ci hi. Hih unau gukte in zong keimah tawh a paikhawm uh a, tua mipa’ innah a tum uh hi.

¹³ Amah in, ‘Vantungmi khat in ka inn sungah ding-a om ka mu a, ‘Joppa khua-ah a min thak Piter kici Simon sam dingin sawl in.

¹⁴ Tua pa in nangmah leh na innkuanpihte gupna na ngah nadingun hong hilh ding hi,’ hong ci hi’ ci-in hong gen hi.

¹⁵ Keimah in thuhilh ka kipat lai takin, amasa-a eite tungah Kha Siangtho a hong tun’ mah bangin amaute tungah a tung hi.

¹⁶ ‘Johan in tui sungah hong baptaiz hangin note in Kha Siangtho sungah na kibaptaiz ding uh hi,’ ci-in Topa’ thugenna ka phawk hi.

¹⁷ Tua ahih ciangin eite in Topa Zeisu Khazih’ thu i up ciangin Pasian in thupha hong piak mah bangin Pasian in tuate a piak leh, Pasian a nial dingin kei kua ka hi hiam?” ci-in Piter in a gen hi.

¹⁸ Amaute in hih thu a zak uh ciangin nial loin, “Pasian in Gentailte zong a nuntak nadingin kisikkikna thu a pia hi,” ci-in Pasian a phat uh hi.

Antiok Khua Pawlpi

¹⁹ Stefen tungah kibawlsiatna thu hangin a kithehthang mite in Foenisia gam leh Saipras gam leh Antiok khua dongin a pai uh a, Judah mite kiang bekah Pasian’ thu a hilh uh hi.

²⁰ Ahih hangin Saipras mi leh Sairin mi kimkhat in Antiok khuapi-ah a tun’ uh ciangin Topa Zeisu’ Lungdamna Thu Grik mite kiangah zong a hilh uh hi.

²¹ Pasian’ khut in amaute tawh omkhawm a, thu-um mi tampi in Pasian kiangah a kihei uh hi.

²² Tua mite thute Jerusalem khua pawlpite in a zak uh ciangin Antiok khua-ah Barnabas a sawl uh hi.

²³ Barnabas a tun’ ciangin Pasian’ hehpihna thupha a muh ciangin a lungdamin amaute in a lungsim tawh Pasian beel dingin mi khempeuh a hansuah hi.

²⁴ Bang hang hiam i cih leh, Barnabas in mipha hi a, Kha Siangtho leh thu-upna tawh dim a, Topa tawh mi tampi a kibehlap hi.

²⁵ Tua khit ciangin Saul a zong dingin Barnabas paikhia a, Tarsas khua a tung hi.

²⁶ A muh ciangin Antiok khua-ah a paipih hi. Tuate in pawlpi tawh kum khat omkhawm uh a, mi tampi kiangah thu a hilh uh hi. Zeisu’ nungzuite in Antiok khua-ah Christian a kici masa bel hi.

²⁷ Tua lai takin Jerusalem khua panin Antiok khua-ah Pasian’ kamsangte hong tung uh hi.

²⁸ Tuate lakah Agabas kici khat in ding a, “Gam khempeuh sungah kial hong tung ding hi,” ci-in Kha Siangtho tawh a hilh hi. Tua kialpi in kumpipa Klaudias a man’ lai-in a hong tung hi.

²⁹ Nungzuite in a hih theih zah ciat bangun Judah gamah a om u leh naute kiangah huhna sum khak dingin a vaihawm uh hi.

³⁰ Tua mah bangin a bawl uh a, upate kiangah Barnabas leh Saul te’ khut tawh a khak uh hi.