Sawltak 1 - Tedim Bible

Kha Siangtho Kikham

¹ Theofilas aw, Zeisu in ama teelsa sawltakte Kha Siangtho tawh a vaikhak khit ciangin,

² a tunglam a kilaktoh ni dong matengin a bawlsa leh a thuhilh khempeuh, a masa lai sungah ka gelh zo hi.

³ Tua Zeisu in gimna a thuak khit ciangin amau kiangah ni sawmli tawntung kilangin, hihna tampi tawh a nungta taktak ahihna lak a, Pasian’ Gam thu a hilh hi.

⁴ Tua sawltakte tawh a omkhawm lai takin, Jerusalem khuapi panin paikhia loin, “Keimah kiangah na zaksa uh Pa’ kamciamna letsong na ngak un.

⁵ Bang hang hiam na cih uh leh, Johan in tui sungah hong baptaiz hi. Ahih hangin a sawt loin note in Kha Siangtho sungah na kibaptaiz ding uh hi,” a ci hi.

Van kahna

⁶ Amaute a kikhop lai takun, “Topa aw, tu lai takin Israel mipawlte in amau gam na ki-uksak kik ding hiam?” ci-in a dong uh hi.

⁷ Zeisu in, “Pa in ama ukna-ah a koihsa a hun ahi zongin, a ni ahi zongin na theih nadingun thu a om kei hi.

⁸ Ahih hangin Kha Siangtho in nomau tungah hong kumsuk khit ciangin vangliatna na ngah ding uh a, Jerusalem khua-a kipan Judah gam, Samaria gam khempeuh leh leimong dongin ka teci na hi ding uh hi,” a ci hi.

⁹ Tua thu a gen khit ciangin sawltakte in a et lai takun, Zeisu vantung lamah kilato a, amau in a muh loh nadingun meii khat in a liah hi.

¹⁰ Zeisu a paito amaute in vantungah a et cian lai takun, mi nih in puanpaak silhin amau kiangah dingin,

¹¹ “Galile mite aw, bang hangin vantung lam ento na hi uh hiam? Note kiang pan vantungah a kilato Zeisu in vantungah a pai na muh uh bangin khatvei hong kumsuk kik ding hi,” a ci uh hi.

Judah Zalaih Ding Pa Kiteel

¹² Tua ciangin Jerusalem khua tawh kinai, Nipi ni pai theih tan a gamla Oliv Mual panin sawltakte Jerusalem khua-ah a paikik uh hi.

¹³ A tun’ uh ciangin Piter, Johan, Jeim leh Andru, Filip leh Thomas, Bartholomai leh Mattiu, Alfe-as’ tapa Jeim, Simon Zealot leh Jeim’ tapa Judas-te a tun’na uh inndei tungah a paito uh hi.

¹⁴ Tua mi khempeuhte in Zeisu’ nu Mari a kipan numeite leh Zeisu’ sanggamte tawh lungsim kikhatin thu a ngen niloh uh hi.

¹⁵ Tua lai takin mi za leh sawmnihte a kikhop lai takun, Piter in amau laizang ah ding-a

^16-17 “Ute naute aw, Zeisu a man mite lam hilhpa Judas Iskariot thu Kha Siangtho in David’ kam sung panin thu hong genkholh Lai Siangtho sungah a om thu a tun’ nading a om hi. Bang hang hiam na cih uh leh, amah in kote tawh kisimkhawm a, thuhilhna za a ngah zo hi.

¹⁸ (Tua pa in a gilohna thaman tawh lo khat a lei khit ciangin, a bungbu-in kia a, a gilpi kitamin a gil khempeuh a buakhia hi.

¹⁹ Tua thute Jerusalem khua-ah mite in a zak uh ciangin amau kam in tua lo “Akeldama” ci uh a, tua in “Sisan’ Lo” a cihnopna hi).

²⁰ Bang hang hiam na cih uh leh: “Ama omna mundai suak hen, Ama omna-ah kuamah teeng kei hen,” cih leh, “Ama za midang khat in ngah ta hen,” ci-in Late Lai Siangtho sungah a kigelh hi.

²¹ Tua ahih ciangin Johan’ baptaizna pana kipan Topa Zeisu in eite tawh a kikhen ni dongin, a sungah a lutkhawm, a pusuak khawm lai takin,

²² kote tawh a tawntung a kikhawl mite sung panin khat in kote tawh Zeisu’ thawhkikna thu teci a suak ding hi,” a ci hi.

²³ Tua ciangin mi nih, Barsabbas kici, a mindang Justas ahi Josef leh Matthias a teel uh hi.

²⁴ “Mi khempeuh’ lungsim a thei Topa aw,

²⁵ Judas in ama omna phualah pai dingin thuhilh-za leh sawltak-za pan tawp kik a, tua za a ngah dingin hih mi nih lakah na teel penpen hong lak in,” ci-in thu a nget khit uh ciangin lai-ai a san uh a,

²⁶ Matthias in a ngah ciangin sawltak sawm-le-khatte tawh a kisimkhawm hi.