Ruth 4 - Tedim Bible

Boaz in Ruth Ten’pih

¹ Tua ciangin kulh kongpi-ah Boaz paito-in tua mun-ah tusuk hi; en in, tanaute, Boaz’ genpa hong pai hi. Tua ahih ciangin Boaz in, “Hong pai dih in, lawm aw; hih lai-ah tu dih in,” a ci hi; tua ciangin amah hong kihei-in hong tusuk hi.

² Tua ciangin amah in khua upate mihing sawm sam-in, “Hih lai-ah tu dih un,” a ci hi; tua ahih ciangin amaute tusuk uh hi.

³ Tua ciangin amah in tanaupa kiangah, “Moab gam panin a hong ciahkik Naomi in i tanaute Elimelek’ neihsa leitang zuak hi.

⁴ Tua ahih ciangin hih thu nang kiangah kong gen ding ngaihsun in, ‘Hih lai-a a tu mite’ muhna leh keima mi upate’ muhna-ah lei in,’ kong ci hi. Na tat ding leh tan in; ahih hangin na tat kei ding leh, a thu ka theih nadingin kei kiangah hong gen in; bang hang hiam cih leh nang sim loh a tan ding kuamah om lo hi; tua ahih manin nang kiangah kong pai hi,” a ci hi. Tua ciangin amah in “Ka tan ding hi,” a ci hi.

⁵ Tua ciangin Boaz in, “Naomi tung panin a lo na lei ni-a kipanin, a site, min a gamhluah ah a tun’ kik theih nadingin a sipa’ zi Moab numei Ruth zong a lei na hi hi,” a ci hi.

⁶ Tua ciangin a tanaupa in, “Keima gamhluah siasak kha ding ka hih manin keima adingin ka tan thei kei ding hi. Keimah in tan thei lo ka hih ciangin keima tat theihna thu nangmah in tang in,” a ci hi.

⁷ Nidang lai-in Israelte sungah tatna leh kikhekna thu-ah ngeina in hih bang ahi hi; thu vaihawm khat peuhpeuh a kipsak nadingin mipa khat in a khedap suahkhia-in a lawmpa pia hi; hih banga hihna pen Israelte sungah kipsakna ahi hi.

⁸ Tua ahih ciangin a tanaupa in Boaz kiangah, “Nang ading lei in,” a cih ciangin amah in a khedap suahkhia hi.

⁹ Tua ciangin Boaz in upate leh mi khempeuh kiangah, “Tu ni-in note in Naomi’ tung panin Elimelek leh Khilion leh Mahlon’ neihsa khempeuh ka lei khitna thu teci na hi uh hi.

¹⁰ A site’ min ama sanggamte leh a pian’na a khua sung panin a maiman’ loh nadingin ama gamhluahna-ah a site min a kizop theih nadingin a si khin Mahlon’ zi, Moab numei Ruth zong ka zi dingin ka lei khin hi; note in tu ni-in teci na hi uh hi,” a ci hi.

¹¹ Tua ciangin kulh kongpi-a om mite khempeuh leh upate in, “Kote in teci ka hi uh hi. Topa in, Israelte’ innkuan a lamto khawm Rachel leh Leah bangin na innkuan sunga hong pai numei bawl ta hen. Efrathah-ah na dau pai hen la, Bethlehem ah na minthang ta hen;

¹² Topa in hih a khangno lai numei tawh nang hong piak na tate hangin Judah in Tamar tawh a neih tapa Perez’ innkuan tawh kibangin na innkuan piang ta hen,” a ci uh hi.

David’ Khang-tangthu

¹³ Tua ahih ciangin Boaz in Ruth la-in ama zi suak hi; amah in a zi luppih a, Topa in tua nu gai sakin amah in tapa khat nei hi.

¹⁴ Tua ciangin nupite in Naomi kiangah, “Tanau nei loin tu ni-in hong om sak lo Topa in thupha ngah ta hen; Israelte sungah ama min thang ta hen!

¹⁵ Amah in nang adingin na nuntakna hong pia kik, leh na khanghamna-ah hong vakpa hi ding hi; bang hang hiam cih leh, tapa sagih sangin a thupizaw, nangmah hong it na monu’ neih ahi hi,” a ci uh hi.

¹⁶ Tua ciangin Naomi in naungeek la-in a angah tawi a, amah cingnu suak hi.

¹⁷ A veng nupite in a min phuak uh a, “Naomi sung pan tapa khat suak,” a ci uh hi. Amaute in a min Obed phuak uh hi; amah in Jessi’ pa hi a, Jessi in David’ pa ahi hi.

¹⁸ Tu-in Perez’ suan-le-khakte in: Perez in Hezron’ pa,

¹⁹ Hezron in Ram’ pa Ram in Amminadab’ pa,

²⁰ Amminadab in Nahshon’ pa, Nahshon in Salmon’ pa,

²¹ Salmon in Boaz’ pa, Boaz’ in Obed’ pa,

²² Obed in Jessi’ pa, Jessi in David’ pa ahi hi.