ROM (Romans) 5 - Tedim Bible

Dikkisakna Hanga I Ngah

¹ Tua ahih ciangin i upna tawh dikkisakna i ngah ahih ciangin eite Topa Zeisu Khazih hangin Pasian tawh i kilem hi.

² Tua Topa hangin eite omna hehpihna sungah upna hangin tum theihna thu i ngah hi; Pasian’ vangliatna lamenin lungdamin i om hi.

³ Tua tham loin gimna i thuak ciangin i lungdam hi. Bang hang hiam na cih uh leh, gimna in thuakzawhna a piangsak hi.

⁴ Thuakzawhna in teci kilatsakna a piangsak hi. Teci kilatsakna in lawpna a piangsak hi.

⁵ Lawpna in hong zumsak lo ding hi. Bang hang hiam na cih uh leh, hong piak Kha Siangtho in Pasian’ itna eite sin sungah hong sung zo hi.

⁶ Eite in thaneemin i om lai takin a kilawm hunin Khazih in mi gilote tangding a si hi.

⁷ A dik mi tangdinga a si ding mi haksa hi. Midik tangding a si ngam mi a om kha ding hi taleh,

⁸ eite in mawh nei i hih lai takin Khazih in eite tang ding si ahih ciangin Pasian in eite hong itna hong kilangsak hi.

⁹ Tua ahih ciangin ama si tawh dikkisakna i ngah khit ciangin tua Topa hangin Pasian’ hehna tawh i kipelh zaw ding hi.

¹⁰ Bang hang hiam na cih uh leh, eite in galte i hih lai takin ama Tapa in sihna a thuakna hangin eite in Pasian tawh kilem i hih leh, ama hin’na tawh gupna i ngah zaw ding hi.

¹¹ Tua tham loin, i Topa Zeisu Khazih hangin kilemna thu i ngah zo ahih ciangin, tua Zeisu hangin Pasian kiangah i lungdam hi.

Adam Leh Khazih

¹² Tua ahih ciangin mi khat hangin khialhna in leitungah tung a, mawhna hangin sihna a piang mah bangin, mi khempeuhte in zong a mawh zo uh ahih ciangin, mi khempeuh tungah sihna hong tung hi.

¹³ Bang hang hiam na cih uh leh, thukham a om ma-inah leitungah mawhna a om hi. Ahih hangin thukham om lo hi leh, mawhna a om hi cih nading a om kei hi.

¹⁴ Ahih hangin Adam’ khang pana kipan Moses’ khang dongin sihna in Adam’ khialhna bangin a khial lote nangawn a uk hi. Tua Adam in a nung ciangin hong piang ding mi’ lim ahi hi.

¹⁵ Ahih hangin mawhna leh hehpihna kibang lo hi. Bang hang hiam na cih uh leh, mi khat a khial ahih maninah, mi tampi a si uh ahih leh, Zeisu Khazih kici mi khat’ hehpihna thupha hanga i ngah lungdamna leh Pasian’ hehpihna thupha in mi tampi ading a kicing hi.

¹⁶ Mi khat’ mawhna hangin a piang na leh hehpihna a kibang kei hi. Bang hang hiam na cih uh leh, mawhna khat hangin daan thuak hen cihna thu a khen hi. Hehpihna panin mawhna tampi om napi-in mai ta hen cihna thu a khen hi.

¹⁷ Mi khat a khial ahih maninah, tua mi hangin sihna in a uk leh, Zeisu Khazih kici mi khat hangah hehpihna thu kicing a, dikna leh hehpihna a ngah mite in nuntakna a ukzaw ding uh hi.

¹⁸ Tua ahih ciangin mi khat hangin mi khempeuh in daan thuak hen ci-in thu kikhenna a thuak uh mah bangin dikna tawh kipawl hihna khat hangin mi khempeuhte in nuntakna tawh kipawl dikkisakna a ngah uh hi.

¹⁹ Mi khat in thu a ngaih loh maninah, mi tampite in mawhnei mite a suah mah bangin, mi khat in thu a ngaih maninah mi tampite in zong dikna a ngah mite a suak uh hi.

²⁰ Khialhna a khan’ nadingin Thukham in zong a hong tum hi. Ahih hangin khialhna a khan’ hangin hehpihna a khang zaw semsem hi.

²¹ Tua ahih ciangin mawhna in sihna a pian’sak mah bangin hehpihna in i Topa Zeisu Khazih hangin dikna piangsak a, nuntak tawntungna hong ngah sak hi.