ROM (Romans) 4 - Tedim Bible

Abraham Tawh Gentehna

¹ I pu Abraham in mi lamsang ah bang phattuamna a ngah i ci ding hiam?

² Abraham in gamtatna hangin dikkisakna a ngah leh, kisaktheih na’ng thu a om hi. Ahih hangin Pasian mai-ah tua bang hi lo hi.

³ Lai Siangtho sungah bang kigelh ahi hiam? “Abraham in Pasian’ thu um ahih ciangin ama upna in amah tang ding dikna-in kiciamteh hi,”

⁴ Nasem mi in phattuamna a ngah ciangin hehpihna a ngah hi kici lo hi; thaman a ngah hi kici hi.

⁵ A sem lo a, Pasian zahtak lo mi a diksakpa’ thu a um mi’ upna in amah tang ding dikkisakna-in kiciamteh hi.

⁶ Tua mah bangin David in sem loin Pasian’ diksakna a ngah mi thupha a pia hi:

⁷ “A khialhna uh maisakna leh a mawhna uh seelna a ngah mite in Thupha a ngah uh hi.

⁸ Pasian’ mawhsakna tawh kipelh mi in Thupha a ngah hi,” ci-in a gen hi.

⁹ Tua ahih ciangin hih thupha vun atte bek a pia hiam? Ahih kei leh, vun at lote a pia hiam? Bang hang hiam na cih uh leh, “Abraham tang ding ama thu-upna in dikna-in kiciamteh hi,” i ci hi.

¹⁰ Tua bang i cih leh, bang ci kiciamteh hiam? Vun atna a thuak khit ciangin a kiciamteh hiam? Vun atna a thuak ma-in a kiciamteh hiam? A thuak khit ciangin a kiciamteh kei hi.

¹¹ Vun atna a thuak nai loh hangin upna dikna bangin kiciamteh nading i pa Abraham in tua mite’ pa a suah na’ng ahi zongin,

¹² vun atna a thuak tham loin i pa Abraham in vun atna a thuak nai loh lai takin upna lam a zuite khempeuh’pa uh a suah nading ahi zongin, Abraham in vun atna a thuak nai loh lai takin upna a neih dikna-a ciamtehna ahi vun atna lim a ngah hi.

Upna Tawh Thuciamna Kingah

¹³ Bang hang hiam na cih uh leh, leitung a luahsak nading Abraham ahi zongin, a suante ahi zongin, a thuciamna a ngahna in thukham tawh a ngah kei uh hi; upna tawh kipawl dikna hangin a ngah uh hi.

¹⁴ Thukham tawh kipawlte bek in gamh a luah uh leh, upna thu a siasak a, kiciamna zong a mawkna ahi hi.

¹⁵ Bang hang hiam na cih leh, thukham in hehna a piangsak hi. Ahih hangin thukham om kei leh, khialhna zong a om kei hi.

¹⁶ Tua ahih ciangin kiciamna in Thukham tawh kipawlte tham loin, Abraham’ upna tawh kipawlte zong Abraham’ suan-le-khakte khempeuh tungah a kip nadingin hehpihna tawh kibangin a pian’ nadingin upna hangin kiciamna a ngah uh hi.

¹⁷ “Ke’n nangmah mipawl tampite’ pa ka hong suaksak zo hi,” ci-in Lai Siangtho sungah a kigelh mah bangin a site thosak a, a piang nai lote a piangsa bangin a ciamtehpa Pasian ahi, amah in a up Pasian mai-ah Abraham in eite khempeuh’ pa ahi hi.

¹⁸ “Na suan na khakte in tua bang a piang ding hi,” ci-in thu piakkholhna bangin mipawl tampite’pa a suah nading amah in lawp nading om lo napi-in umin, lawpin a om hi.

¹⁹ Tua upna kiam loin ama kum in zakhat dektak pha a, a pum in a sih thu ahi zongin a zi Sarah’ gil a sih thu ahi zongin a ngaihsut hangin,

²⁰ upkhialhna tawh Pasian’ thuciamna lungka loin,

²¹ upna a lianin Pasian phat a, a ciampa in a ciamna bangin a bawl thei ding hi ci-in pha takpi-in a um hi.

²² Tua ahih ciangin upna in ama tangding dikna-in a kiciamteh hi.

²³ Tua bang ciamtehna in Abraham ading bekin Lai Siangtho sungah gelh ahi kei hi.

²⁴ Eite adingin zong a gelh hi. Eite in Topa Zeisu sihna pan a tho kiksakpa i up leh, tua upna eite ading dikna bangin hong ciamteh ding hi.

²⁵ Tua Topa in eite khialhna hangin kipia a, eite in dikkisakna i ngah nadingin a kithosak kik hi.