ROM (Romans) 3 - Tedim Bible

¹ Tua ahih leh, Judah mite bang a hampha uh hiam? Vun ki-at hangin hamphatna a om hiam?

² A pawlpawl phattuamna tampi a om hi. A lianbel phattuamna ahih leh, amaute kiangah Pasian’ thu a kipia zo hi.

³ Judah mi kimkhatte in upna nei lo ahih uh leh, a up lohna un Pasian’ dikna a siasak ding hiam?

⁴ Tua bang hi lo ding hi! “Na thupiakna in na thutan’na kilangsak hi, Thukhenna na thuak ciangin na gualzo ding hi,” ci-in Lai Siangtho sungah a kigelh mah bangin mi khempeuhte in thuciamna a pelh mi a kicih uh hangin, Pasian in thuman thutakpa hi ta hen.

⁵ Ahih hangin eite diklohna in Pasian’ dikna a kilatsak leh, bang thu gen ding a om hiam? Daan hong pia Pasian in ahi lopi-in bawl ahi hiam ci-in leitung ngeina bangin ka gen hi.

⁶ Tua bang hi zenzen lo ding hi. Tua bang ahih leh, Pasian in leitung mite bang ci thu a khen thei ding hiam?

⁷ Keima thuzuau hanga Pasian’ thuman in a vangliatna a khan’sak leh, bang hangin kei mawhna nei bang hong khen lai ding hiam?

⁸ Phatna a pian’ nadingin phat lohna gamta ni ci-in mi kimkhatte in hong kosia uh a, komau kam hong dawn’ kik uh mah bangin ka gen kik lai ding uh hiam? Tua bang a gente in thuman daan a thuak ding uh hi.

Midik Kuamah Om Lo

⁹ Tua ahih leh, bang kici ding hiam? Ei Judah mite in tua Gentailte sangin phazaw i hi hiam? Phazaw i hi zenzen kei hi. Bang hang hiam na cih uh leh, Judah mi leh Grik mi khempeuhte in mawhna nei tuak uh hi cih thu a masa-in ka lak zo hi.

¹⁰ Lai Siangtho sungah: “Midik khat beek a om kei hi.

¹¹ A thei khat beek a om kei hi. Pasian a zong mi khat beek a om kei hi.

¹² Amau khempeuh in lam a pial zo uh hi, A vekpi-un a kiman’na om lo hi. A hoih a, gamta a om kei hi, Khat nangawn a om kei hi.

¹³ Amau gawlgui un a kihongsa hankhuk ahi uh hi. Amau leii uh tawh mi a kheem zo uh hi. Amau muk sung uh ah gul hangsante’ gu a om hi.

¹⁴ Amaute kam un hangsan’na leh kamkhauh tawh a dim hi.

¹⁵ Amau khe un mi sisan suah dingin a manlang hi.

¹⁶ Amau paina lampi-ah kisiatna leh gimna a dim hi.

¹⁷ Nopna lampi amau in a thei kei uh hi.

¹⁸ Pasian kihtakna thu Amau mittang mai uh ah a om kei hi,” ci-in a kigelh hi.

¹⁹ Thukham in a gen thu khempeuh thukham nuai-ah a om mite kiangah a gen hi cih i thei hi. Tua ahih ciangin kam a vekpi kikham uh a, leitungmi khempeuhte in Pasian mai-ah mawhsakna a thuak ding uh hi.

²⁰ Bang hang hiam na cih uh leh, thukham tawh mawhna kilang ahih ciangin thukham a zuihna tawh, Pasian mai-ah kuamah in dikkisakna a ngah kei ding hi.

Upna Tawh Dikkisakna

²¹ Tu-in Thukhamna leh kamsangte in teci a pan’ uh mah bangin, thukham loin Zeisu Khazih sungah thu-um mite khempeuh tungah upna hangin hong tung Pasian’ dikna kilang hi.

²² Kilamdan’na neukha beek a om kei hi.

²³ Bang hang hiam na cih uh leh, mi khempeuh a mawh uh a, Pasian’ maipha a ngah nading uh kisia hi.

²⁴ Ahih hangin Zeisu Khazih in hong tan ahih maninah, a man pia loin Pasian’ hehpihna hangin dikkisakna i ngah hi.

²⁵ Pasian in hong hehpihin a kihih khinsa mawhna a ngaihsut lohna in ama dikna thu kilat nangin ahi zongin,

²⁶ tu laitak ama dikna hong kilangsak a, Zeisu a um mite diksa a, amahmah in dikna a bawl ding ahi zongin, Zeisu’ si thu-upna tawh mawh kimaisakna ding Zeisu a koih hi.

²⁷ Tua ahih ciangin kisaktheih nading koi-ah a om hiam na cih uh leh, a kipaaikhia zo hi. Bang thu tawh kipaai hiam? Gamtatna tawh kipaaikhia ahi hiam? Hi lo hi! Thu-upna tawh kipaaikhia hi.

²⁸ Tua ahih ciangin mi khat in thukham bang gamta loin upna tawh dikkisakna a ngah hi ci-in i ciamteh hi.

²⁹ Pasian in Judah mite’ Pasian bek ahi hiam? Gentailte’ Pasian zong hilo ahi hiam? Ahi mah hi. Pasian khat bek a om leh, Gentailte’ Pasian zong ahi hi.

³⁰ Tua Pasian in upna bangin vun atte leh vun at lote a dik a sa ding hi.

³¹ Tua ahih leh, upna hangin eite in thukham paaikhia i hi hiam? Tua bang hi lo hi. Thukham i kip sak hi.