ROM (Romans) 14 - Tedim Bible

U-le-naute’ Thu Khen Kei In

¹ Upna neu mi na mang un. Ahih hangin up khialh nading thute tua mi tawh na kikum kei un.

² Mi khat in an pawl khempeuh neek theih nadingin upna a nei hi. Ahih hangin mi a thaneem mi in gah leh teh bek a ne hi.

³ An pawl khempeuh a ne mi in a ne lo mi simmawh kei hen. A ne lo mi in a ne mi dongtel kei hen. Bang hang hiam na cih uh leh, Pasian in tua pa a mang zo hi.

⁴ Mi dang’ sawltak a dongtel nangmah in kua mi na hi hiam? Tua pa in a Topa thu dotna-ah a kip ahi zongin, a kip lo ahi zongin ahi ding hi. Ahih hangin a Topa in tua pa kipsak theihna a nei ahih ciangin a kipsak ding hi.

⁵ Mi khat in ni khat sangin ni khat a manpha zaw hi ci-in a ciamteh hi. Mi khat in ni khempeuh a kibang hi ci-in a ciamteh thei hi. Mikim in ama lungsimah pha a sak bang hi ta hen.

⁶ Ni a tang mi in Topa hangin a tang hi. An a ne mi in Topa hangin an a ne hi. Bang hang hiam na cih uh leh, amah in Pasian’ hehpihna a phat hi. An ne lo mi in Topa hangin ne lo a, Pasian’ hehpihna a phat hi.

⁷ Bang hang hiam na cih uh leh, eite lakah kuamah in ama ading a nungta kei hi; kuamah in ama ading a si kei hi.

⁸ Eite i nuntak leh, Topa ading i nungta hi. Eite i sih leh, Topa ading i si hi. Tua ahih ciangin eite i nungta ahi zongin, i si ahi zongin, Topa’ aa i hi hi.

⁹ Khazih in misite leh mi nungtate’ Topa a suah nadingin sihna thuak a, a sih khit ciangin a hing kik hi.

¹⁰ Nang in bang hangin na u na nau dongtelin thu na khen hiam? Na u na nau bang hangin na simmawh hiam? Eite khempeuh in Pasian’ thukhenna tokhom mai-ah i ding ding hi.

¹¹ Bang hang hiam na cih uh leh, Lai Siangtho sungah: “Ka nuntak bangin ka mai-ah mi khempeuhte a khukdin’ ding uh a, Leii khempeuh in Pasian a phat ding uh hi, ci-in Pasian in thu a pia hi,” ci-in a kigelh hi.

¹² Tua ahih ciangin eite khempeuh in eima thu tekah Pasian’ thudotna i thuak ding hi.

Na Sanggam Puksak Kei In

¹³ Tua ahih ciangin eite in tu-a kipanin khat leh khat thu kisuah loin om ni. Unau khat puk nading ahi zongin, a khialh nading ahi zongin hih loh nadingin na ciamteh zaw un.

¹⁴ Bangmah in a pian’pih tawh a kihhuai kei hi, keimah in Topa Zeisu muangin thei-in ka lungkim hi. Ahih hangin a kihhuai a sa mi khat a om leh, ama tungah a kihhuai hi.

¹⁵ Na u na nau in nang an nekna hangin a dah leh, nang in itna tawh na gamta kei hi. Amah tang ding Khazih a si khin mi khat na an nekna tawh na siasak kei in.

¹⁶ Tua ahih ciangin na hih theihna uh ah gensiat nading omsak kei un.

¹⁷ Bang hang hiam na cih uh leh, Pasian’ Gam in an nekna, tui dawnna-ah a kip kei hi. Kha Siangtho hanga kingah dikna, kilemna leh lungdamna-ah a kip hi.

¹⁸ Tua bang gamta a, Khazih’ na a sem mi in Pasian lungdam sak a, mite mai-ah minphathuai ahi hi.

¹⁹ Tua ahih ciangin kilem nading, khat leh khat kikipsak nading tawh kizom nate zui ni.

²⁰ An nekna hangin Pasian bawlna na susia kei un. An khempeuh a siangtho hangin midangte a puk nading a ne mi in a khial hi.

²¹ Sa nekna, leenggahtui dawnna-a kipan na u na nau puk nading na khempeuh tan’huai hi.

²² Na neihsa na upna, nangmah ading Pasian mai-ah na om sak in. A man’sa thu-ah amah le amah a kimawhsak lote in mi hampha ahi uh hi.

²³ A um khial mi in a nek leh, upna lungsim nei loin ne ahih ciangin amah le amah a kimawhsak ahi hi. Upna lungsim tawh kituak lo gamtatna khempeuh in mawhna ahi hi.