ROM (Romans) 10 - Tedim Bible

¹ Ute naute aw, Israel mite in gupna a ngah nadingun ka lungsim in deihin, Pasian kiangah thu ka ngetsak hi.

² Amaute in Pasian lamah lungsim lian a neih uh hangin, lungpilna man ahi kei hi ci-in amaute ading teci ka pang hi.

³ Bang hang hiam na cih uh leh, amaute in Pasian’ dikna thei loin, amau dikna kipsak nading a zong uh ahih ciangin, Pasian’ dikna thu a mang kei uh hi.

⁴ Bang hang hiam na cih uh leh, thu-um mi khempeuh in a dik nadingun thukham’ mong in Zeisu ahi hi.

Mi Khempeuh Ading Gupna

⁵ Moses in, “Thukham tawh a kipawl dikna thu a zuite in, tua dikna thu bangin a nungta ding hi,” ci-in a gelh hi.

⁶ Ahih hangin upna tawh kipawl dikna in: “Vantungah kua in a kahto ding hiam?

⁷ A thuk sungah kua in a kumsuk ding hiam?” ci-in na lung sungah na ngaihsun kei un a ci hi. Tua bang a cihna in, Khazih hong paipihsuk dingin kua in a kahto ding hiam? Khazih sihna pan a thosak dingin a thuk sungah kua in a kumsuk ding hiam? a cihnopna ahi hi.

⁸ Bang a ci hiam? Tua thu in nang tawh kinai-in na kam sungah, na lungsim sungah a om hi; ka hilh uh upna thu a cihnopna hi.

⁹ Bang hang hiam na cih uh leh, “Zeisu in Topa ahi hi” ci-in na kam in mang a, Pasian in amah sihna pan a thosak kik zo hi ci-in na lungsim sungah na up leh, gupna na ngah ding hi.

¹⁰ Dikkisakna ngah nadingin lung sungah ki-um hi. Gupna ngah nadingin kam tawh kipulak hi.

¹¹ “Amah a um mi peuhmah in zumna a thuak kei ding hi,” ci-in Lai Siangtho sungah a kigelh hi.

¹² Bang hang hiam na cih uh leh, Judah mipawl, Grik mipawl teeltuam a nei kei hi. Mi khempeuh a uk Pasian khat bek om a, ama kiangah thu a ngen mi khempeuh in a kicing hehpihna a ngah ding uh hi.

¹³ Bang hang hiam na cih uh leh, Topa’ min tawh thu a ngen mi khempeuh in gupna a ngah ding uh hi.

¹⁴ Ahih hangin a thu-um lo mite in bang a ci thunget ding uh hiam? A thu a zak ngei loh uh Topa bang ci a um thei ding uh hiam? A hilh mi om kei leh, bang ci a za thei ding uh hiam?

¹⁵ A kisawl kei leh, bang ci a hilh thei ding hiam? Lai Siangtho sungah a kigelh mah bangin, “Nopna Lungdamna Thu hong zasak mite’ khe in bang zahin kilawm ahi hiam!”

¹⁶ Ahih hangin mite khempeuh in Lungdamna Thu a ngai kei uh hi. Bang hang hiam na cih uh leh, kamsangpa Isaiah in, “Topa aw, kote thuhilhna kua in um ahi hiam?” a ci hi.

¹⁷ Tua ahih ciangin upna in thu zakna hangin a piang hi. Zakna in zong Khazih’ thu hangin a piang hi.

¹⁸ Ahih hangin amaute in za hilo ahi uh hiam? A mantakpi a za uh hi: “Amaute aw un leitung khempeuh ah a zel zo hi; Amau thu un leimong dongin a tung zo hi.”

¹⁹ Khatvei ka cih-inah, Israel mite in hih thu thei lo ahi uh hiam? Moses in: “Mipawl ahi lo mite hangin note in een’na lungsim na neih nadingun ahi zongin, Pilna nei lo mipawlte hangin na heh nadingun ahi zongin ka bawl ding hi,” a ci masa hi.

²⁰ Isaiah in hang takin: “Kei hong zong lo mite in hong mu zo uh hi, Kei thu hong kan lo mite tungah ka kilang zo hi,” a ci hi.

²¹ Israel mipawlte thu panin, “Thungai lo, thu seel thei mipawlte lamah ni khat tawntung ka khutpeek ka zan hi,” a ci hi.