Piancilna 8 - Tedim Bible

Tuiciin Beina

¹ Ahih hangin Pasian in Noah leh amah tawh teembaw sungah a om gamsate leh innsate khempeuh phawk hi. Pasian in leitungah huih nungsak a, tui kiam hi;

² tui thukte leh vantung kongvangneute kikhak a, vantung pan-a guahte kikhawlsak hi.

³ leitung panin tuite kiamkiam hi. Ni za leh ni sawmnga a phak ciangin tuite kiam khinta hi;

⁴ kha sagihna, tua kha ni sawm-le-sagih ni-in Ararat mual tungah teembaw kinga hi.

⁵ A kha sawmna ciang dong tuite kiamkiam lai hi; kha sawmna, tua kha ni khat ni-in mual dawnte kidawk hi.

⁶ Ni sawmli a cin’ ni ciangin Noah in ama bawlsa teembaw kongvangneu hong a,

⁷ va-ak khat khah hi; leitung pan in tuite a keu mateng leeng kawikawi hi.

⁸ Tua ciangin, lei maitang panin tuite a kiam khin nai hiam cih a theihna dingin amah in vakhu khat khah hi;

⁹ ahih hangin, leitung maitang khempeuhah tuite om lai-in a khawl nading mu lo ahih manin teembaw-ahhong ciahkik hi. Tua ahih ciangin amah in a khut zan-in vakhu man a, teembaw sungah paipih hi.

¹⁰ Amah in ni sagih sung ngakin, teembaw panin vakhu khah leuleu hi;

¹¹ nitak ciangin ama kiangah vakhu hong ciahkik a, en in, oliv teh a tukkhiat thak khat a kam sungah hong tunpih hi; tua ahih ciangin leitung panin tuite kiam khinta hi ci-in Noah in thei hi.

¹² Tua ciangin ni sagih sung ngak leuleu-in vakhu khah hi; tua vakhu pen ama kiangah hong ciahkik nawn lo hi.

¹³ Noah a khan’ kum zaguk leh a kum khatna, a kha masa, tua kha ni masa ni-in leitung panin tuite keu hi; Noah in teembaw khuhna lakhia a, khuadak hi, en in, lei maitang keu hi.

¹⁴ A kha nihna, tua kha ni sawmnih-le-sagih ni-in leitung keu hi.

¹⁵ Tua ciangin Pasian in Noah’ kiangah,

¹⁶ “Nang leh na zi, na tapate leh na tapate’ zite teembaw sung panin paikhia un,

¹⁷ Nang tawh a omkhawm nuntakna a nei khempeuh vasate, ganhingte leh leitunga a bokvak peuhmah –leitungah tampi suakin, pungin leitungah a tam theih nadingin nuntakna a nei peuhmah paikhiatpih in,” ci hi.

¹⁸ Tua ahih ciangin Noah pai khia a, a tapate leh ama zi leh a tapate’ zite amah tawh paikhia khawm hi.

¹⁹ Ganhing khempeuh, a bokvak khempeuh, vasa khempeuh, leitunga a gamtang khempeuh a innkuan kuanin teembaw panin paikhia uh hi.

²⁰ Tua ciangin Noah in Topa’ adingin biakna tau khat lam a, a siangtho ganhing khempeuh leh a siangtho vasa khempeuh lak pan khat ciat la-in, biakna tau tungah meihal biakna pia hi.

²¹ Topa in a namtui gimnam a nap ciangin, a lungsim sungah, “Mi’ hangin leitang ka samsiat kik ngei nawn kei ding hi, bang hang hiam cih leh mi’ lungsim ngaihsutna pen a neucil panin gilo hi; tu-a ka hih bangin nuntakna a neite khempeuh zong ka susia ngei nawn kei ding hi.

²² Leitung a om lai tengin, lo pawi hun leh anlak hun, a vot leh a sa, khuakhal leh phalbi, sun leh zan bei lo ding hi,” ci hi.