Piancilna 7 - Tedim Bible

Tuiciin

¹ Tua ciangin Topa in Noah kiangah, “Nang leh na innkuanpihte khempeuh teembaw sungah pai un, bang hang hiam cih leh nang in hih khang mite' sung panin a thuman na hihna ka mu khin hi.

² Ganhing siangtho kop sagih, a nu leh a pa, ganhing a siang lote kop khat, a nu leh a pa;

³ huih lak vasate zong kop sagih, a nu leh a pa, lei maitang tung khempeuh ah amau’ nam a man’than’ loh nadingin la in.

⁴ Bang hang hiam cih leh ni sagih sungin sun sawmli leh zan sawmli sung leitungah guah ka zusak ding hi; ka bawlsa nuntakna a nei peuhmah lei maitang panin ka phiatkhia ding hi,” ci hi.

⁵ Noah in Topa’ thupiak khempeuh hih hi.

⁶ Leitungah tuiciin a tun’in, Noah kum zaguk pha hi.

⁷ Tuiciin pelh dingin Noah, a tapate, a zi leh a tapate’ zite teembaw sungah pai uh hi.

⁸ Ganhing siangthote, a siangtho lo ganhingte, vasate, leitunga a bokvak peuhmah,

⁹ nih nih-in, a nu leh a pa, Pasian in Noah a thu piaksa bangin teembaw sungah Noah tawh pai uh hi.

¹⁰ Ni sagih khit cianginleitungah tuiciin tung hi.

¹¹ Noah’ nuntak kum zaguk kum, a kha nihna, tua kha ni sawm-le-sagih ni-in van-a om a thuk mahmah tuikhukte puakkhamin, vantung kongvangneute kihong hi.

¹² Sun sawmli leh zan sawmli sung leitungah guah zu hi.

¹³ Tua ni teekteekin Noah leh a tapate, Shem, Ham, Jafeth leh Noah’ zi leh a tapate’ zi thumte, amaute tawh teembaw sungah tum uh hi.

¹⁴ Amaute leh gamsa peuhmah ama' nam ciat, leitungah a bokvak peuhmah ama' nam ciat, leh vasa peuhmah, ama' nam ciat, vasa namkim ama' nam ciatin tum uh hi.

¹⁵ Nuntak husan’na a nei khempeuh nih nihin Noah tawh teembaw sungah pai uh hi.

¹⁶ Pasian’ thupiaksa bangin nuntakna a nei khempeuh teembaw sungah a lut khit ciangin Topa in amah kong khaknelh hi.

¹⁷ Leitungah tuiciin ni sawmli sung om den hi; tui tam semsem a, teembaw laamto-in, leitung' tungah khangin sang to hi.

¹⁸ Tui khang to-in leitungah tam mahmah hi; tui tungah teembaw laam hi.

¹⁹ Leitungah tui khangkhang ahih manin van buppi nuai-a mual lian a sangte khempeuh tuumcip hi;

²⁰ mual liante tungah tui om a, amau tungah tong sawm-le-nga thukin tuam hi.

²¹ Leitunga a nungta khempeuh, vasate, innsate, gamsate, a hon honin leitungah a hon om ganhingte khempeuh leh mi khempeuh si uh hi;

²² leikeu tunga a om, a nak sungah nuntakna hu a om peuhmah si hi.

²³ Mihing, ganhing, a bokvakte leh huih lak vasate, lei maitang tunga om nuntakna a nei peuhmah amah in phiatkhia hi; leitung panin amaute kiphiatkhia hi. Noah leh amah tawh teembaw sunga a om teng bek suakta hi.

²⁴ Ni za leh ni sawmnga sung leitungah tui om hi.