Piancilna 6 - Tedim Bible

Mihing Gitlohna

¹ Lei maitang tungah mite tam dingin hong kipanin, amau’ sung panin tanute hong suah ciangin,

² Pasian’ tapate in mite’ tanute hoih hi, ci-in mu uh hi; amaute in a deih bangun tuate zi-in la uh hi.

³ Tua ciangin Topa in, “Ka Kha inmi tawh buai paisuak lo ding hi, bang hang hiam cih leh mihing pumpi in a si thei ci-le-sa hi a, a khan’ in kum za leh kum sawmnih hi ding hi,” ci hi.

⁴ Pasian’ tapate in mihing' tanute luppihin, amaute in ta a neih hun laitak hita leh tua khit hita leh, amau’ suan-le-khak Nefilim a kici mite leitungah om hi. Hih mite in tang lai-a mi thahat, mi minthangte ahi uh hi.

⁵ Leitungah mihing’ gitlohna a liatna leh mihing' lungsim ngaihsutna peuhmah a sia a hih ngitngetna thu Topa in mu hi.

⁶ Leitungah mihing a bawl pen Topa khial kisa a, tua thu in ama' lungsim dahsak hi.

⁷ Tua ahih ciangin Topa in, “Ka piansaksa mihing, ganhing, a bokvak ganhingte leh huih lak vasate, lei maitang panin ka phiatkhia ding hi, bang hang hiam cih leh amaute ka bawl ka khial hi,” ci hi.

⁸ Ahih hangin Noah in Topa’ maipha mu hi.

Noah in Teembaw Bawl

⁹ Hihte in Noah’ suan-le-khakte tangthu ahi hi. Noah in a thuman mi khat hi a, ama' khang-ah paubang lo hi; Noah in Pasian tawh lam paikhawm hi.

¹⁰ Noah in tapa thum, Shem, Ham, leh Jafeth nei hi.

¹¹ Tu-in Pasian’ muhna-ah leitung sia a, leitung in ngongtatna tawh kidim hi.

¹² Pasian in leitung mu hi, en un, kisia hi; bang hang hiam cih leh leitungah mi khempeuh a sia-in a gamta lo kuamah om lo hi.

¹³ Pasian in Noah’ kiangah, “Mi khempeuh beisak ding ka khentat zo hi; bang hang hiam cih leh amau’ hangin leitung in ngongtatna tawh kidim hi; en in, leitung tawh amaute ka susia khawm ding hi.

¹⁴ Nang adingin noah-taaksing tawh teembaw khat bawl in; teembaw sungah a deite bawl in la, a sung leh a pua kultal tui tawh zut in.

¹⁵ Na bawl nading dan in hih bang ahi hi: teembaw a sauna tong zathum, a zaina tong sawmnga, a san’na tong sawmthum hi ding hi.

¹⁶ Teembaw adingin kongvangneu khat bawl in la, tua tung tong khat ciangah zawl bawl in; a pang-ah teembaw kongkhak bulh in; a dawl nuainung, a dawl nihna leh a dawl thumnate bawl in.

¹⁷ Bang hang hiam cih leh, en in, vantung nuai-a om nuntak husan’na a nei khempeuh susia dingin leitungah tuiciin ka tungsak ding hi; leitunga om khempeuh si ding hi.

¹⁸ Ahih hangin nang tawh ka thuciamna ka kipsak ding hi; teembaw sungah nang na hong pai ding hi, nang, na tapate, na zi leh na natapate' zite tawh na paikhawm ding hi.

¹⁹ Nuntakna a nei khempeuh nang tawh a nungta dingin nam khatah nih ciat teembaw sungah na paipih ding hi; tuate pen a nu leh a pa hi ding hi.

²⁰ Vasate amau’ nam ciatin, ganhingte amau’ nam ciatin, lei lak-a a bokvak ganhingte peuhmah amau' nam ciatin, a suakta dingin nam khatah nih ciat nang' kiangah hong pai ding uh hi.

²¹ A kine an nam khempeuh zong la in la, khol in; tuate pen nang leh amaute’ adingin an ding ahi hi,” ci hi.

²² Noah in tua mah bangin hih hi; amah in Pasian’ thupiak khempeuh hih hi.