Piancilna 11 - Tedim Bible

Babel Tausangpi

¹ Tu-in leitung buppi in kampau khat leh kammal tawm nei hi.

² Amaute nisuahna lamah lal uh a, Shinar gamsungah zanglei mun khat mu uh a, tua lai-ah teng uh hi.

³ Amaute khat leh khat kiangah, “Hong pai un, leiseek seekin lim takin hal ni,” kici uh hi. Amaute in suang taangin leiseek nei uh a, a buan dingin kultal tui nei uh hi.

⁴ Tua ciangin amaute in, “Hong pai un, leitung buppi maitang-ah eite i kithehthang gawp loh nadingin ei’ adingin khuapi khat bawlin, a dawn in vantung a ban ding tausangpi khat lamin, eite’ min ding khat bawl ni,” ci uh hi.

⁵ Mihingte’ lamsa khuapi leh tausangpi a en dingin Topa hong paisuk hi.

⁶ Topa in, “En un, amaute in mikhat hi uh a, amaute khempeuh in kampau khat nei uh hi; hih in amau’ sep ding a kipatna bek ahi hi; tu-in sep dinga amau vaihawmte amau’ adingin hi thei nawn lo ding hi.

⁷ Hong pai un, amaute khat leh khat’ thugen a kitheih loh nadingun eite paisukin amau’ kampau va kitukalhsak ni,” ci hi.

⁸ Tua ahih ciangin Topa in tua lai panin leitung maitang khempeuhah amaute thehthang a, amaute in akhuapi bawl uh tawp uh hi.

⁹ Tua ahih ciangin a min Babel kici hi, bang hang hiam cih leh Topa in tua munah leitung khempeuh kampau kitukalhsak hi; tua lai mun panin Topa in leitung maitang khempeuh' tungah amaute thehthang hi.

Shem’ Suan-le-khakte

¹⁰ Hihte in Shem’ suan-le-khakte' tangthu ahi hi. Shem kum zakhat a phak, tuiciin khit kum nih ciangin, amah in Arpakshad kici tapa khat nei hi;

¹¹ Arpakshad a suah khit ciangin Shem kum zanga nungta a, tapa leh tanu dang nei lai hi.

¹² Arpakshad kum sawmthum-le-nga a nuntak khit ciangin, amah in Shelah kici tapa khat nei hi;

¹³ Shelah a suah khit ciangin Arpakshad kum zali leh kum thum nungta a, tapa leh tanu dang nei lai hi.

¹⁴ Shelah kum sawmthum a nuntak khit ciangin amah in Eber kici tapa khat nei hi;

¹⁵ Eber’ suah khit ciangin Shelah kum zali leh kum thum nungta a, tapa leh tanu dang nei lai hi.

¹⁶ Eber kum sawmthum-le-li a nuntak khit ciangin amah in Peleg kici tapa khat nei hi;

¹⁷ Peleg suah khit ciangin Eber kum zali leh kum sawmthum nungta a, tapa leh tanu dang nei lai hi.

¹⁸ Peleg kum sawmthum a nuntak khit ciangin amah in Re-u kici tapa khat nei hi;

¹⁹ Re-u a suah khit ciangin Peleg kum zanih leh kum kua nungta a, tapa leh tanu dang nei lai hi.

²⁰ Re-u kum sawmthum-le-nih a nuntak khit ciangin amah in Serug kici tapa khat nei hi;

²¹ Serug’ suah khit ciangin Re-u kum zanih leh kum sagih nungta a, tapa leh tanu dang nei lai hi.

²² Serug kum sawmthum a nuntak khit ciangin amah in Nahor kici tapa khat nei hi;

²³ Nahor’ suah khit ciangin Serug kum zanih nungta a, tapa leh tanu dang nei lai hi.

²⁴ Nahor kum sawmnih-le-kua a nuntak khit ciangin amah in Terah kici tapa khat nei hi;

²⁵ Terah’ suah khit ciangin Nahor kum za leh kum sawm-le-kua nungta a, tapa leh tanu dang nei lai hi.

²⁶ Terah kum sawmsagih a nuntak khit ciangin amah in tapa Abram, Nahor, leh Haran nei hi.

Terah’ Suan-le-khakte

²⁷ Tu-in hihte in Terah’ suan-le-khakte tangthu ahi hi. Terah in Abram, Nahor leh Haran’ pa ahi hi; Haran in Lot’ pa ahi hi.

²⁸ Ama' pa Terah’ a sih ma-in ama suahna gam ahi Khaldea gam Ur khua-ah Haran si hi.

²⁹ Abram leh Nahor in zi nei uh hi; Abram’ zi’ min in Sarai hi a, Nahor’ zi’ min in Milkah hi-in Haran’ tanu ahi hi. Haran in Milkah leh Iskah-te’ pa ahi hi.

³⁰ Tu-in Sarai ciing hi; amah in ta nei lo hi.

³¹ Terah in ama' tapa Abram leh Haran’ tapa Lot, ama' tupa leh a tapa Abram’ zi ahi a monu Sarai la-in, Kanaan gamsungah pai dingin Khaldea gam Ur khua panin amaute paikhia khawm uh hi; ahih hangin amaute Haran a tun’ uh ciangin tua munah teng uh hi.

³² Terah’ khan’ sung in kum zanih leh kum nga ahi hi; Haran-ah Terah si hi.