Paunak 30 - Tedim Bible

Agur’ Muhna Zia

¹ Jakeh’ tapa Agur’ thugente. Hih mi lianpa in, “Pasian aw, ka lunggim a, ka cih nading ka thei kei hi.

² Ka hai lua a, mihing ka sun kei hi. Mihing bangin ngaihsut siamna ka nei kei hi.

³ Pilna thu ka thei kei a, Pasian’ thu ka theih om lo hi.

⁴ Vantungah kua kah to a, leitungah hong kumsuk kik ahi hiam? Kua in a khut sungah huihte lomcip a, puanin tuite tuncip ahi hiam? Kua in leitung bulpite phut kip ahi hiam? Tua bang mi na theih ngei leh, a tapa’ min bang ahi hiam?

⁵ Pasian in a thugen khempeuh a manna laktel a, amah a belte khempeuh tungah kidalna lum ahi hi.

⁶ Ama gen lohpi behlap sak kei in; na tua cih leh amah in nang hong tai-in, thuzuau gen na hihna hong kilang ding hi,” a ci hi.

⁷ Pasian aw, thu nam nih kong ngen hi. Ka sih ma-in tuate hong pia in.

⁸ Zuauna leh khemna ka zat loh nadingin hong huh in la, a hau lua lo, a zawng lua loin hong bawl in la, ka khamkhop zah lian bek an hong pia in.

⁹ Hau lua leng, nang hong nialin, “Topa i cih kua hiam?” kong ci kha ding a, zawng lua leuleu leng, mi’ na guk sakin, ka Pasian’ min kong daisak kha zel ding hi.

¹⁰ A topa kiangah sila khat gensia kei in; amah in nang hong gensia-in, gimna na thuak kha ding hi.

¹¹ A pate samsia-in a min a dai sak a, nute a phat lo mi pawlkhat om hi.

¹² Amaute a nin mahmah kim lai hi napi-in, amau’ muhna-ah siang a kisa mahmah mi pawlkhat om hi.

¹³ Mihoih pha mahmah-a a kingaihsun, a kiliansak mi pawlkhat om hi.

¹⁴ A ha uh namsau tawh a kibang, a ha uh temta tawh a kibang, gam sunga mizawngte a netum, mi cimawhte a liaktum mi pawlkhat om hi.

¹⁵ Vot in tanu nih nei a, khat in, “Hong pia in,” ci a, a khat in zong, “Hong pia in,” mah ci veve hi. “Pha zo ta,” a ci ngei lo thum om a, eh! li hizaw:

¹⁶ Han khuk, taciing numei, tui a deih tawntung leikeu, leh a kisumit zo lo meikuang ahi uh hi.

¹⁷ A pa a simmawh mipa, a nu’ thu a mang nuam lo mipa, va-ak in a mittang khel khiatsakin, musanete in a sa ne ding uh hi.

¹⁸ Ka theih zawh het loh a lamdang mahmah thu thum om a, eh! li hizaw:

¹⁹ van-ah musane a leen’ theihna zia, suangpi tungah gul a pai theihna zia, tuipi tungah teembaw a pai theihna zia leh nungak leh tangval a kingaihna zia ahi hi.

²⁰ A citak lo zi in hih bangin gamta hi: Midang tawh khialin, tua ciangin kisilsiang a, “Bangmah khialhna gamta ke’ng,” ci khem hi.

²¹ Leitungmi khempeuh in a thuak zawh loh thu thum, eh! thu li om a,

²² sila khat kumpi a suah ciang, a hai khat in a duh bangbang a nek zawh ciang,

²³ a muhthadahhuai numei khat in pasal a neih ciang, nasem numeino in a tonu’ za a suan ciang ahi hi.

²⁴ A neu mahmah ganhing nam li leitungah om a, ahi zongin a pilpen pente ahi uh hi.

²⁵ Miksite: a hat het lo ganhing hi napi-in, khuakhal sunga a nek ding khol zo uh hi.

²⁶ Ngalvangte: a thahat lo ganhing hi napi-in, suang lakah a kua ding uh bawl zo uh hi.

²⁷ Kauphete: kumpi nei lo napi-in, a kituak diamdiamin hon tat thei uh hi.

²⁸ Innhikte: khut sunga tawi zawh ganhing hi lel napi-in, kumpi inn sungah teeng zo uh hi.

²⁹ A gamtatna i et ciangin a thupi suak mahmah thum, eh! li om a,

³⁰ Ganhing lak pan a hatpen, kuamah a kihta lo humpinelkai,

³¹ a kihihsak pai kuahkuah aklui, a kihihsak pai gangan keetal, a mite mai-ah a pai lanlan kumpipa ahi hi.

³² Kiphasakin na haipau ngei a, thusia bawl ding na ngaihsut ngei khak leh, lim takin thu ngaihsun pha in!

³³ Bawngnawi, meekmeek lehang thawhbat hong suak a, mi khat a nak tupsak lehang si hong luang a, mi phin lehang kitotna hong piang hi.