Paunak 29 - Tedim Bible

¹ Kihilhhilh napi-a a mang nuam lote, bawl phatkik zawh nawn loh dongin kisia ding hi.

² Midikte in gam a uk ciangin gam mite lungdam a, migilote in a uk ciangin a gam mite thuum uh hi.

³ Pilna a deih mi in a pa lungdamsak a, numei paktat tawh a kikhawl mi in a neihsa teng lawnmang hi.

⁴ Thuman-a a gamta kumpi in a gam kipsak a, sum bek a ngaihsun kumpipa in a gam siasak hi.

⁵ A man lopi-a mi khat mawk phatna in, a awk nadingin thangsiahna ahi hi.

⁶ Migilote, amau’ mawhna sungah awkcip a, midikte ahih leh suakta-in lungdam uh hi.

⁷ Midikte in mi cimawhte’ ading thu khual a, migilote in tua bang khualna thei lo uh hi.

⁸ Thu a khual lote in khua sungah buaina lianpi piangsak a, mipilte in tua buaina dai sak thei hi.

⁹ Mipil khat in mihai khat tawh zum-ah thu nei leh, mipilpa tungah hehin zahko a, phattuamna piang tuan lo hi.

¹⁰ Mi a that nuamte in a thuman mi mudah a, midikte in a thuman mi hu uh hi.

¹¹ Mihaipa a hehna bangin kampau-in gamta gawp a, mipilpa ahih leh ki-ip-in a hehna dam sak hi.

¹² Kumpipa in zuauthu saang-in na sem leh, a nuai-a ulian khempeuh zong zuau genin nitum ding hi.

¹³ Mizawngpa leh mi bawlsiapa a kibatna uh khat om hi—Topa in a nih tuak-un mittang guan hi.

¹⁴ Kumpipa in mizawngte’ thu a manin khensak leh, a ukna kip tawntung ding hi.

¹⁵ Ciangduai leh taina in pilna guan’ a, a kikhahkhong ta in a nu maizum sak hi.

¹⁶ Migilote ulian suak leh siatna khang semsem a, ahi zongin midikte in amau’ mit mahmah tawh, a gilo uliante’ za kiatna mu ding uh hi.

¹⁷ Na ta thuhilhin tai lecin, ama hangin na kipak ding a, na lung hong kimsak ding hi.

¹⁸ Pasian’ lamlahna a kizuih lohna gam-ah, gamsung mite phengtat uh a, Pasian’ thukham a zui mite a lungdam hi.

¹⁹ Kam-a hilh lel tawh silate pil zo lo a, a theih hangin hong mang tuan lo hi.

²⁰ Thu ngaihsun lo-a pheng paupau mipa sangin, mihaipa adingin lametna om zawlai hi.

²¹ Sila khat a neu tunga-a kipan lim takin na khoi hangin, a tawpna-ah nang hong hehsak veve ding hi.

²² A heh pahpahte in kitotna piangsak a, a heh baihte khial thei tawntung hi.

²³ A kiphasakte in niamkhiatna thuak ding a, a kiniamkhiatte in pahtawina ngah ding hi.

²⁴ Guktakna sunga kipawl mipa, ama adingin thusia zongpa ahi hi. A guktakna pulak leh daan kitat ding a, genkhia kei leh lah kisamsia veve ding hi.

²⁵ Midangte kihtakna in hong lunghimawhsak a, Topa muan’na in hong lungmuangsak hi.

²⁶ Mi khempeuh in gam ukte’ maipha ngah ding hanciam uh a, ahi zongin Topa kiang pan bekin thutang kingah hi.

²⁷ Midikte in migilote mudah a, migilote in midikte mudah hi.