Paunak 28 - Tedim Bible

Migilo leh Mi Thuman

¹ Kuama delh lopi-in migilote taimang a, mi thumante ahih leh humpinelkai bangin hang uh hi.

² Gamsung mite a hoih loh ciangin, a ban banin gam uk tampi nei uh a, ahi zongin mipil thu ngaihsun theite in, gamsung thahatsakin kipsak uh hi.

³ Mizawngte a bawlsia aana nei mipa in, lo-a ante a susia gawp guahzu tawh kibang hi.

⁴ Thukham zui lo mite in migilote pakta uh a, thukham zui mite ahih leh migilote tawh kilemlo uh hi.

⁵ Mi sia-huaite in thutang cih mel thei lo uh a, Topa a biate in ahih leh a kicingin thei uh hi.

⁶ Hau napi-a mi lungsim kawi hihna sangin, zawng napi-a pauban’ neih lohna hoihzaw hi.

⁷ Thuhilhna a mang mi in ta pil hi a, lawm gina lo tawh a kikhawl mi in a pa mindaisak hi.

⁸ A meet a pung lakna tawh a hau mipa in, mizawngte a hehpih thei mipa’ adingin sum zong hi lel hi.

⁹ Mi khat in thukham a zuih nop kei leh, ama thungetna nangawn Pasian in zak thadahhuai sa hi.

¹⁰ A dik mi khat, siatsak ding a hanciampa pen, ama tawhsa gum sung mah-ah kia ding a, a dik mipa in gamh hoih luah ding hi.

¹¹ Mihaupa pen amah pil kisa a, ahi zongin a zawng mipilpa in, a haupa’ haina phawkkhia veve hi.

¹² Mihoihte in vangliatna a ngah ciangin, mi khempeuh lungdam uh a, migilote a liat ciangin, adangte in gimna thuak uh hi.

¹³ A khialhna a im mipa a dau pai lo ding a, a mawhna pulakin a kikheel mipa in hehpihna ngah ding hi.

¹⁴ Topa a zahtak tawntung mipa in mi nuamsa hi a, a lung khauh mipa in lungkhamna tuak ding hi.

¹⁵ Mizawngte a uk migilopa in humpinelkai gilkial, leh vompi halungvei tawh kibang hi.

¹⁶ Ngaihsut siamna a nei lo gam ukpa in a gilo kumpi hi ding a, thuman lo-a ngahna a deih lo mipa in sau veipi uk ding hi.

¹⁷ Mi that-a a khialpa in, ama hankhuk ding a to hi a, a hankhuk tawh ding kho kei in.

¹⁸ Thuman-a gamta mite lung muangin om ding uh a, a zuautat mite ahih leh puk ding uh hi.

¹⁹ Nakpi tak-a lo khopa hau mahmah a, bangmah-a kimang tum lo a sempa zawng mahmah hi.

²⁰ A citak mipa in thupha tampi ngah ding a, a hau baih nuam mipa in daan tuak pelmawh ding hi.

²¹ Mi langbawlna hoih lo a, ahi zongin letsong neucik khat hangin thukhente gamta khial thei zel hi.

²² A huaiham mi in a hauh nadingin huai mengmeng a, a tawpna-ah a zawn’ ding lam tak phawk kha lo hi.

²³ Mi khat tai-in thuhilh lecin, tungtham-a phatna sangin, a tawpna-ah lungdam zaw ding hi.

²⁴ A nu leh a pa’ neihsa lak sak a, “Khialhna hi kei” a cipa in, guta mah hi veve hi.

²⁵ A huaiham mi in kitotna piang sak a, Topa a muang mi in mihau hi ding hi.

²⁶ Ei leh ei kimuan’na in haina hi a, mipilte’ hilhna zuihna in lungmuan’na hi.

²⁷ Mizawng a huhte cimawh ngei lo ding a, huhna a pia nuam lote in samsiatna ngah ding hi.

²⁸ Migilote a liat ciangin midangte bucip uh a, amaute a za kiat ciangin midikte in uk kik ding hi.