Paunak 22 - Tedim Bible

¹ Hauhna sangin min hoihna deihhuai zaw a, kham leh ngun sangin mi’ hong thusimna deihhuai zaw hi.

² A hau a zawng a kilamdan’na om lo hi; a nih tuak-in Topa’ bawlsa ahi uh hi.

³ Mipilte in a lauhuai thu mu thei-in pelh uh a, mi mawkmawkte in phu suakin thuak uh hi.

⁴ Kiniamkhiat-a, Topa zahtakna thaman in, hauhna, minthan’na, leh khan’sauna ahi hi.

⁵ Migilote’ lampi-ah thang kisiahin so kidawh a, mipilte in tua lampi pelh uh hi.

⁶ Naupang khat a neu lai-in lampi man tawnsak lecin, a teek dongin lam pial nawn lo ding hi.

⁷ Mihaute in mizawngte uk a, leitawi a late in a piate’ sila suak hi.

⁸ Thuman lo khaici a vawhte in lungkhamna tuak a, amau’ hehna ciangduai amau’ tung mah tu kik hi.

⁹ A cingh mite in mizawngte an pia a, amah in thupha ngah kik hi.

¹⁰ Mi kiphasakte hawlkhia lecin, kitotna leh kisimmawhna bei ding hi.

¹¹ Lungsim siangtho tawh kamsiamna in kumpipa’ lawm hong suaksak hi.

¹² Topa in thuman mite kem a, ahi zongin thuzuau gente lawnkhia hi.

¹³ Mi thadahte inn-ah lumlum a, “pua pial leeng humpi’n hong hih kha’n teh,” ci uh hi.

¹⁴ Numei tunga mawhna in thangzak bang hi a, tua thang ah a awkte tungah Topa heh hi.

¹⁵ Naupangte a hai gamtat a ngeina hi a, deihsak-a satna in mihoih suaksak thei hi.

¹⁶ Hauh nop manin mihaute letsong pia leeng kizawn’lawh a, hauh nop manin mizawngte’ neihsa laksak leeng zong kihauhlawh tuan lo hi.

Thupiakte leh Hilhkholnate

¹⁷ Na bil uh hong ngatin, mipilte’ thugen ngai un la, ka hong hilh pilna thute na lungsim uh ah lut sak un.

¹⁸ Na lungsim uh ah cing-in zang thei le uh cin, na lung uh dam tawntung ding hi.

¹⁹ Tua hi leh Topa muan’in na nei ding uh a, tu ni-in note’ phattuam nading kam pau ka suak ding hi.

²⁰ Thuhilhna leh pilna thu nam sawmthum, hih lai munah note’ adingin ka gel a,

²¹ note hong sawlte tungah thuman na gen kik theih nadingun, thuman na theih nading uh ka deihna ahi hi.

²² Bangmah hong hih zo lo ding cihna tawh nuamtak sa-in, mizawngte’ neihsa mawksut kei in la, zum-ah khia-in mawk bawlsiat kei in.

²³ Bang hang hiam cih leh Topa in amaute pan’pih ding a, amau a bawlsiate tungah phu laksak ding hi.

²⁴ A hehbaih mite tawh kipawl kei in la, a lungtom mite tawh kikhawl kei in.

²⁵ Amau’ hoih lohnate na zuih khak loh nading na kidop kei leh, nangmah in zong na awk-lawh kha ding hi.

²⁶ Midangte’ leiba lohsak dingin kamciamin, leiba tavuan la kha kei in.

²⁷ A leiba lohsak zo kei lecin, na lupna nangawn hong kidawh khiatsak ding hi.

²⁸ Na pu na pate’ phuhsa gi-suang, cik mah hunin khin kei in.

²⁹ Ama nasepna-ah a siam mahmah mi na thei kha hiam? amah in mi mawkmawkte’ na sem lo ding a, kumpite’ na sem ding hi.