Paunak 17 - Tedim Bible

¹ Kitawng kawmin pawipi sungah an nekna sangin, lungnuam takin moh keu themkhat nekna hoihzaw hi.

² A pil silapa in a topa’ ta hai tungah aana nei-in, a topa’ gamh pawlkhat a luah hi.

³ Kham leh ngunte, mei sungah kize-et a, mihingte’ lungsim, Topa in ze-et hi.

⁴ Migilote in gitlohna thu mah ngaih-in nei a, zuautheite in zuauthu mah ngaih-in nei hi.

⁵ A zawngte a simmawhpa in amah a Piangsakpa a simmawh hi a, midangte tuahsiatna-ah a lungdam mipa in daan tuak hamtang ding hi.

⁶ Tute in puteekte’ minthan’na lukhu hi a, pate in tate’ minthan’na ahi hi.

⁷ Miliante in zuauthu gen ngei lo a, mihaite in na-a kimang kampau ngei lo hi.

⁸ Sumgolh a zangte in ai bangin ngaihsun uh a, a deih khempeuh uh a ngah sak dingin ngaihsun uh hi.

⁹ Mi’ khialhna a maisakte, midangte in it-in lawm hau uh a, mi’ khialhna ciamtehna in lawm taanna hi.

¹⁰ Mihai khat, zavei a kisatna sangin, mipil khat, khatvei taina in bunzaw hi.

¹¹ Thusia bekbek a deih tawntung migilote kiangah, a gilo kamtaipa bangin sihna tung ding hi.

¹² Mihaite a hai gamtatna uh i tuah khak sangin, a no a kilaksak vompi hang khat tuak leeng hoihzaw lai hi.

¹³ Thuhoih kimlai thusia tawh a thukte’ inn sungah, cik mahin thusia veng cih om ngei lo hi.

¹⁴ Kitot i kipat ciangin tui lipi cin’na phung kehsak khak tawh kibang hi; tua ahih manin a nasiat ma-in kitot khawl pak in.

¹⁵ Migilote khahkhongna, leh thuman mite mawhsakna, a nih tuakin Topa in deih lo hi.

¹⁶ Mihaipa in thu ngaihsut theihna nei lo ahih manin, pilna zon’ nading sum tampi a zat hangin a phattuamna om lo hi.

¹⁷ Lawm citak in a tawntungin hong it a, i sanggamte in i lungkhamna hong thuakpih dinga piang ahi hi.

¹⁸ Thu a ngaihsun thei lo mihaite bek, midangte’ leiba lohsak dingin kipia ngam hi.

¹⁹ Khialh ding a utte, lungkham ding a ut hi a, kihisak-a paupaute, buaina zongzong ahi hi.

²⁰ Lungsim hoih lote in lungdamna mu lo a, mi a khem theite in lungkhamna tuak hi.

²¹ Tapa hai in a pa’ lungkhamna hi a, tahai a neipa a lungdam lo hi.

²² Mai taii-na in ci damsak a, mai gum tawntungna in guhtui teep kang hi.

²³ A ginalo thukhente in sumgolh sang sim uh a, a thukhenna uh ah thuman om nawn lo hi.

²⁴ Mipilte in ahoih pen-a gamtat nading thei a, mihaite in a cih nading meel uh thei lo hi.

²⁵ Ta hai in a pa dahsak a, a pian’na a nu zong lungkhamsak hi.

²⁶ A thuman mi daan piak ding hoih lo a, mihoihte satna in thu-khialhna ahi hi.

²⁷ Thu a thei taktakte in gengen khol lo a, a paupau khollote thu mu taktak hizaw hi.

²⁸ Mihaite nangawn pau loin om leh a pil mah-in kingaihsun hi; thu ngaihsun thei na hihna a kilat nadingin pau loin om in.