Paunak 15 - Tedim Bible

¹ Kam neem-a dawn’na in hehna damsak a, kamkhauh in hehna piangsak hi.

² Mipilte in pilna thu gen a, mihaite in haina thu gen hi.

³ Topa’ mit in mun khempeuh mu a, misia, mipha, hong encik kim hi.

⁴ Kamkhum in nuntakna piangsak a, kamsia in lung gimsak hi.

⁵ A pa’ hilhna a ngai nuam lote mihai hi a, hilhna a mang nuamte mipil ahi hi.

⁶ Thuman mite’ neihsa kip a, migilote’ hauhna in lungkham guan hi.

⁷ Mipilte’ kampauna in pilna khang sak a, mihaite lungsimah thuman lohna bek om hi.

⁸ Topa in migilote’ biakpiakna kihhuai sa a, thuman mite’ thungetna-ah lungdam hi.

⁹ Topa in migilote’ gamtatna kihhuai sa a, thuman a deih mite a it hi.

¹⁰ A gamta khial mite, nakpi takin kithuhilh a, kithuhilhna a mang nuam lote in sihna thuak ding hi.

¹¹ Topa in sihna gam sunga omte nangawn mu thei ahih leh, mihingte ngaihsutna telmuh zawkan ding hilo ahi hiam?

¹² A kihisak mite in kithuhilhna ngai nuam lo uh a, mipilte kiangah thu dong ngei lo uh hi.

¹³ Lungdamna in mai taiisak a, lungkhamna in mai gumsak hi.

¹⁴ Thungaihsun theite in pilna zong a, mihaite ahih leh theihlohna tawh lungkim hi.

¹⁵ Mizawngte, a lungkham hi tawntung a, a lungdam mite in nuntakna nuamsa mahmah uh hi.

¹⁶ Hau napi-a lungkham sangin, zawng napi-a Topa zahtakna hoihzaw hi.

¹⁷ Kitawngtawng kawm-a sa meh limpen nekna sangin, ki-it diamdiam-a anteh meh nek hoihzaw hi.

¹⁸ Lungtomna in kitotna piangsak a, lungduaina in kilemna piang sak hi.

¹⁹ Mi thadahte in mun khempeuh ah haksatna tuak a, mi thumante in haksatna tuak kha lo hi.

²⁰ Ta pilte in a pa lungdam sak a, mihaite in a nu simmawh hi.

²¹ Mihaite in a hai mah uh lungdampih a, mipilte ahih leh a manin gamta uh hi.

²² Lim ngaihsut lo-a sepna tawh bangmah piang zo lo a, ngaihsut piaknate tawh ma kitun’ zo hi.

²³ A hun mah-a dawn’ pah theihna lungkim huai a, a kilawm kammal tawh dawn’ pah theihna hoihzaw kan hi.

²⁴ Mipilte in nuntakna lampi zuito uh a, sihna lampi zuisuk lo uh hi.

²⁵ Topa in mi kiphasakte’ inn phelkhiatsak a, meigongte’ neihsa hutpih hi.

²⁶ Topa in migilote’ ngaihsutna kihhuai sa a, midikte’ kampaunate hoih sa hi.

²⁷ A man lo-a sum ngahna in innsung lungkham sak a, sumgolh a deih lote a nuntak sauvei nuam hi.

²⁸ Mihoihte in a kampau ding ngaihsun phot a, migilote’ paupakna in thusia tawh kizom hi.

²⁹ Topa in midikte’ thungetna ngai a, migilote’ thungetna don lo hi.

³⁰ Maitaina in lung nuamsak a, thuhoih zakna in lung damsak hi.

³¹ Kithuhilhna zuih theihna in, mipilte’ lak-a kihel theihna ahi hi.

³² Kithuhilh ding a ut lote amahmah a kisusia hi a, kithuhilh ding a utte pil semsem hi.

³³ Topa zahtakna in pilna mah hi pah a, kiniamkhiatna in pahtawina hong ngah sak hi.