Paunak 14 - Tedim Bible

¹ Numei pilte in innsung nuntakna khangsak a, numei haite in innsung susia hi.

² Thuman-a gamta mite in Topa zahtak a, a sia-a gamta mite in simmawh hi.

³ Mihaite a pau ciangin satna thuaklawh uh a, mipilte’ pauna in sat nading pan pengsak hi.

⁴ Bawngtal om kei leh lo panin an tawm bek kila a, bawngtal’ tha tawh an kihau hi.

⁵ A citak teci in thuman bekbek gen tawntung a, a gina lo teci in zuauthu bekbek gen tawntung hi.

⁶ Mi a simmawh theite in pilna a zon’zon hangin ngah zo lo a, thu ngaihsun theite in olno takin ngah thei uh hi.

⁷ Mihaite tawh kikhawl kei in, amau’ kiang pan pilna na ngah kei ding hi.

⁸ Thu ngaihsun theite a pilna in lampi man musak a, mihaite a haina in lam khialsak hi.

⁹ Mihaite in a khialh hangun phamawh sa lo uh a, mipilte a khialh ciangun mawh maisak ding deih uh hi.

¹⁰ Lungdamna leh lungkhamna eimah bek in i theih hi a, midang kuamah in hong phawkpih kha lo hi.

¹¹ Migilote’ inn kisusia ding a, thuman mite’ inn kipin gina semsem ding hi.

¹² Mihingte in thuman lampi hi a cih khakte pen, sihna lampi na hi kha thei hi.

¹³ Nuihna in cihmawh seelna zong hi thei a, kigualnop sakna a ven’ciangin dahna hong kilang kik hi.

¹⁴ Misia in siatna thaman ngah a, mipha in phatna thaman ngah hi.

¹⁵ Mihaite in a thu zak peuh um pahpah a, mipilte in a gamtat nading ngaihsun cian hi.

¹⁶ Mipilte in Topa zahtakin siatna panin kihem a, mihaite in thu ngaihsun masa loin gamta pahpah hi.

¹⁷ A lungtom mite hai gamtat a, ngaihsutna hoih lo a neite kimudah hi.

¹⁸ Mihaite in haina bek mah ngah a, mipilte in pilna mah ngah thuah hi.

¹⁹ Migilote in mihoihte mai-et uh a, maipha a piak nading uh thuum uh hi.

²⁰ Kuamah in mizawngte ngai lo a, mihaute in lawm tampi nei hi.

²¹ Mizawngte a simmawhte a khial hi a, mizawngte’ tungah a cinghte thupha ngah ahi hi.

²² Na a hoih a semte, mite in muangin zahtak a, asia gamtatna in khialhna lianpi ahi hi.

²³ Gimpi-a nasepna in hauhna hi a, kam bek pau-in tut mawkna in zawn’na ahi hi.

²⁴ Pilna in mipilte’ minthan’na lukhu hi a, haina in mihaite’ kizepna bulpi pen ahi hi.

²⁵ Thutak a gen teci in nuntakna hu zo a, thuzuau a gen teci in mi lehhek hi.

²⁶ Topa a zahtak mi in lungmuanna nei a, a tate’ belh theih ding ahi hi.

²⁷ Topa zahtakna in nuntakna tuinak tawh kibang a, sihna thang tawh kipelhsak hi.

²⁸ Mi tampi a uk kumpipa a minthang a, a uk ding mi om kei leh a mawkna hi.

²⁹ A lungduaite mipil hi a, lungtomna in haina kilatna hi.

³⁰ Lungnopna in pumpi cidamsak a, hazatna in guh muatsak natna ahi hi.

³¹ Mizawngte bawlsiatna in a piangsak Pasian simmawhna hi a, mizawngte tungah citna in Pasian zahtakna ahi hi.

³² Migilopa, ama tatsiatna in puksak a, mihoihpa, ama hoihtatna in hu hi.

³³ Thungaihsun theite’ lungsim sungah pilna teeng a, mihaite in pilna thei kha lo uh hi.

³⁴ Thumanna in minam minthangsak a, mawhna in minam mindaisak hi.

³⁵ A hoih-a gamta mite tungah kumpipa lungdam a, a gina-a gamta lote daan pia hi.