Paunak 11 - Tedim Bible

¹ Topa in tawikhaina man lo a zangte mudah a, tawikhaina man a zangte tungah lungkim hi.

² Mi kiphasakte in minsiatna ngah pak ding a, lungsim niamkhiatna tawh pilna kingah hi.

³ Midikte thuman in gamta uh a, amau’ hoihlohna tawh migilote kisusia hi.

⁴ Hauhna in na sih nading panin hong hu thei lo a, thumanna in na sih ding hong hu thei hi.

⁵ Thumanna in midikte’ nuntakna a nuam zaw-in piangsak a, migilote in amau’ gitloh mah puklawh uh hi.

⁶ Thumanna in midikte honkhia a, thuman lo mite in amau’ huaihamna mah awkpih uh hi.

⁷ Migilote a sih ciangin a lametna teng tawh beikhawm a, hauhna suan’na in a mawkna suak hi.

⁸ Lungkhamna a tuah loh nadingun midikte kihu a, migilote tungah lungkhamna tungzaw hi.

⁹ Pasian a ngaihsun lo mite’ thugenna hangin mite in siatna thuak a, midikte’ pilna hangin mite in gupna ngah uh hi.

¹⁰ Midikte a tuahphat ciangin khua sungah lungdamna om a, migilote a sih ciangin zong khua sungah lungdamin kikona om hi.

¹¹ Thuman mite’ omna hangin khuapi a lian suak a, migilote’ kampauna hangin khuapi kisia hi.

¹² Simmawhna tawh midang hopihna in haina hi a, mipilte pau loin om dide hi.

¹³ Mi a gensia-siate’ tungah thusim kigen ngam lo a, a muanhuai mite tung bekah thusim kigen ngam hi.

¹⁴ Thu lamlak ding a nei lo mihingte kipuk uh a, thu lamlak tampi neihna in lungmuan’ na hi.

¹⁵ Midang khat’ leiba lohsak ding na kiciam leh na kisik ding hi; tua bang thu-ah kihel kei lecin nang adingin hoihzaw hi.

¹⁶ A dik numei kizahtak a, dikna nei lo numei in mindaina hi. A thadah mi in sum nei ngei lo a, a hahkat mi in sum hau hi.

¹⁷ Migi lecin nang adingin ahoih bawl na hi a, gilo lecin nangmahmah a kigimsak na hi bek hi.

¹⁸ Migilote in a man nei taktak bangmah ngah lo a, thuman-a gamtate in pel loin thaman hoih ngah hi.

¹⁹ Thu man-a gamtat ding a hanciamte nungta ding a, asia-a gamta teiteite si ding hi.

²⁰ Topa in lungsim gilo mite mudah a, a man-a gamtate tungah lungkim hi.

²¹ Migilote in daan a thuak hamtang nading, midikte daan tawh a kipelh nading thei in.

²² Thu a ngaihsun thei lo numei meelhoihna in, vokpi muk-a om kham nakbah tawh kibang lel hi.

²³ Mihoihte’ deihna thuhoih tawh kizom tawntung a, migilote’ deihna a tun’ ciangin mi khempeuh heh hi.

²⁴ Mi pawlkhat in sum zang ziahziah napi-in hau semsem a, mi pawlkhat in cil mahmah napi, zawng semsem hi.

²⁵ A cingh mite hau semsem ding a, midang a huhte in huhna mah ngah kik ding hi.

²⁶ An man khan’ ding ngakna-in a zuak nuam lote kisamsia a, lei nop hun-a a zuak pahte kiphat hi.

²⁷ Thuhoih a hanciamte in pahtakna ngah a, siatna a hanciamte in siatna mah ngah hi.

²⁸ Tuk lai-a singteh tam bangin midikte’ hauhna khang ding a, phabi lai-a singteh pulh bangin hauhna suangte kiam ding hi.

²⁹ A innkuan sung a uk khial mite hawmsuak ding a, a haite mipilte’ sila suak tawntung ding hi.

³⁰ Midikte’ gah in nuntakna singkung hi a, nuntakna Khate a man mi in mipil ahi hi.

³¹ Mihoihte, hih leitungah thaman kipia ahih leh, migilo leh mawhneite, gimna kipiazaw kan ding hi.