Paikhiatna 40 - Tedim Bible

Biakbuk Din’sakna leh Apna

¹ Topa in Moses' kiangah,

² “Kha masa a ni masa ni-in nangmah in kikhopna buk ahi biakbuk na lam ding hi.

³ Nangmah in tua sungah tecipan’na singkuang na koih ding a, nangmah in dalna puan tawh singkuang na dal ding hi.

⁴ Nangmah in sabuai na tumpih ding a, a om ding bangin na koih ding hi; nangmah in meivakkhuam na tumpih ding a, a meivakte na bulh ding hi.

⁵ Nangmah in tecipan’na singkuang mai-ah paknamtui adingin kham biakna tau na koih ding a, biakbuk kongkhak dingin kongpuankhai na khai ding hi.

⁶ Nangmah in kikhopna buk ahi biakbuk kongkhak mai-ah meihal biaknatau koihin,

⁷ kikhopna buk leh biakna tau kikal-ah kisilna kuang na koih ding a, tua sungah tui na koih ding hi.

⁸ Nangmah in a kimkotah buk tual na bawl ding a, buk tual kongpi dingin kongpuankhai na khai to ding hi.

⁹ Tua ciangin nangmah in nilh sathau la-in, biakbuk leh a sunga om khempeuh na nuh ding a, biakbuk leh a innsung van khempeuh na ap ding hi; tua in a siangtho suak ding hi.

¹⁰ Nangmah in meihal biakna tau leh a nazat khempeuh zong sathau nuh-in biakna tau na ap ding hi; biakna tau in a siangtho pen hi ding hi.

¹¹ Nangmah in kisilna kuang leh a ngakna zong sathau nuh-in na ap ding hi.

¹² Tua ciangin nangmah in kikhopna buk kongkhak-ah Aaron leh ama' tapate paipihin, amaute tui tawh na sil ding a,

¹³ amah in keima' tungah siampi na a sep theih nadingin puan siangthote Aaron silh sakin, amah sathau nilhin na ap ding hi.

¹⁴ Nangmah in ama' tapate zong paipihin amaute puantungsilhte na silhsak ding a,

¹⁵ amaute in keima' tungah siampi na a sep theih nadingun amaute’ pa sathau na nilh bangin amaute sathau na nilh ding hi: amau’ sathau kinilhna in amau’ khang tawntungin siampi hih tawntungna piangsak ding hi,” a ci hi.

¹⁶ Tua mah bangin Moses in hih hi; Topa in amah a thupiaksa khempeuh tawh kituakin amah in hih hi.

¹⁷ A kum nihna a kha masa, tua kha a ni masa ni-in biakbuk kilam hi.

¹⁸ Moses in biakbuk lam hi; amah in a bulllente koihin, a khuampeekte phut a, a zawlte khumin, a khuampite phut hi;

¹⁹ amah in biakbuk tungah puanbuk zal a, Topa in Moses a thupiaksa bangin a tungah puanbuk khuh hi.

²⁰ Topa in Moses a thupiaksa bangin amah in tecipan’na la-in singkuang sungah koih a, singkuang tungah zawlte koihin, singkuang tungah hehpihna tokhom nga hi;

²¹ amah in biakbuk sungah singkuang paipihin, kongpuankhai dalna puan khai a, Topa’ thupiak bangin tecipan’na singkuang dal hi.

²² Topa in Moses a thupiaksa bangin, amah in biakbuk leilu lam pang, dalna puan pua lam, kikhopna buk sungah sabuai koih a,

²³ Topa’ mai tua sabuai tungah a om ding bangin anlum koih hi.

²⁴ Topa in Moses a thupiaksa bangin, amah in biakbuk leitaw lam pang, sabuai tawh a kigalsai-in, kikhopna buk sungah meivakkhuam koih a,

²⁵ Topa’ mai-ah meivak koih hi.

²⁶ Topa in Moses a thupiaksa bangin, amah in kikhopna buk sung, dalna puan mai-ah kham biakna tau koih a,

²⁷ tua tungah a namtui paknamtui hal hi.

²⁸ Amah in biakbuk kongkhak ding kongpuankhai a mun-ah khai hi.

²⁹ Topa in Moses a thupiaksa bangin amah in kikhopna buk ahi biakbuk kongkhak-ah meihal biakna tau koih a, tua tungah meihal biakna leh an tawh biakna pia hi.

³⁰ Amah in kikhopna buk leh biakna tau kikal-ah kisilna kuang koih a, tua sungah kisil nading tui koih hi.

³¹ Moses leh Aaron leh a tapate in amau’ khut leh a khete uh tua tui tawh sil uh hi;

³² Topa in Moses a thupiaksa bangin amaute kikhopna bukah a pai ciang leh biakna tau nai-ah a pai uh ciangin amaute kisil uh hi.

³³ Amah in biakbuk leh biakna tau kiim-ah a buk tual bawl a, buk tual kongpi kongpuankhai khai hi. Tua ahih ciangin Moses in nasep man ta hi.

Biakbuk Tungah Meii

³⁴ Tua ciangin meii in kikhopna buk tuam a, Topa’ minthan’na in biakbuk dim hi.

³⁵ A tungah meii a omna hangin kikhopna buk sungah Moses tum thei lo a, Topa’ minthan’na in a biakbuk dim hi.

³⁶ A khualzin sung tawntung uh biakbuk tung panin meii a kilakkhiat toh peuhpeuh ciangin Israel mite mai lam nawtin pai uh hi;

³⁷ ahih hangin meii a kilakkhiat kei leh a kilakkhiat ni mateng amaute paikhia lo uh hi.

³⁸ Bang hang hiam cih leh a khualzin sung tawntung uh Israel mi khempeuh' muhna-ah biakbuk tungah sunin Topa’ meii omin, zan-in tua sungah mei om hi.