Paikhiatna 30 - Tedim Bible

Paknamtui Biakna Tau

¹ “Nangmah in a tungah paknamtui hal nading biakna tau khat na bawl ding hi; singkha sing tawh na bawl ding hi.

² A dung tong khat, a vai tong khat hi ding hi; a kikim sikli nei hi ding a, a san’na tong nih hi ding hi; a kite a tak tawh sakhat hi ding hi.

³ Nangmah in kham citak tawh zut-in, a tung leh a pang kimkot leh a kite na zut ding hi; a kimkot-ah kham tawh a geihual na bawl ding hi.

⁴ Tua adingin kham kual nih na bawl ding hi; a geihual nuai a kigalsai a pang tuakah tuate na bawl ding a, a puak nading zawlte a len dingte hi ding uh hi.

⁵ Nangmah in singkha sing tawh a zawlte na bawl ding a, kham tawh tuate na zut ding hi.

⁶ Nangmah tawh ka kituah nading mun, tecipan’na tunga a om hehpihna tokhom mai, tecipan’na singkuang kiangah a om dalna puan mai-ah biakna tau na koih ding hi.

⁷ Aaron in tua tungah a namtui paknamtui hal ding hi; amah in zingsang simin meivakte a puah ciangin hal ding hi,

⁸ Aaron in nitakin zong meivakte a koih ciangin tuate hal ding a, na khang tawntungun Topa’ mai-ah a namtui hi tawntung ding hi.

⁹ Tua tungah a siangtho lo a dang paknamtui hita leh, meihal biakna hita leh, an tawh biakna hita leh na pia kei ding hi; tua tungah tui-buah na sung kei ding hi.

¹⁰ Aaron in a kite' tungah kum khatin khatvei kilemna bawl ding hi; amah in kilem nading khialhna hanga biakna si tawh na khang tawntungun kum khatin khatvei kilemna bawl ding hi; tua in Topa' tungah a siangtho pen ahi hi,” a ci hi.

Kilemna Sum

¹¹ Topa in Moses' kiangah,

¹² “Israel mite misimna bawl-a, amaute na sim ciangin amau' lakah gimna a tun’ loh nadingin, amaute na sim ciangin a milip in a kitatkhiatna uh Topa' tungah pia ding uh hi.

¹³ Misimna-ah a kisim mi peuhmah in a piak ding in: biakinn shekel tawh kituakin shekel lang (shekel khatah gerah sawmnih om), Topa’ tungah biakna-in shekel lang hi ding hi.

¹⁴ Misimna-a akisim, kum sawmnih panin a tungsiah peuhmah in Topa biakna pia ding hi.

¹⁵ Note’ ading kilemna bawl nadingin Topa biakna na piak uh ciangin a haute in shekel lang sangin tamzaw pia lo, a zawngte in tawmzaw pia lo ding hi.

¹⁶ Nomau adingin kilemna bawl nading, Topa’ mai-ah Israel mite phawkna a hisak dingin Israel mite tung panin kilemna sum na la ding a, kikhopna buk nasep nadingin na seh ding hi,” a ci hi.

Kisilna Kuang

¹⁷ Topa in Moses kiangah,

¹⁸ “Kisil nadingin sumngo kuang khat, a ngakna sumngo tawh akibawl khat zong bawl in. Nangmah in kikhopna buk leh biakna tau kikal-ah na koih ding a, tua sungah tui na koih ding hi.

¹⁹ Aaron leh a tapate in a khut uh leh a khe uh tua tui tawh sil ding uh hi.

²⁰ Amaute kikhopna buk-ah a pai ciangin ahi a, Topa' tungah mei tawh kihal biakna hal ding a nasem dingin biakna tau nai-ah a pai ciang uh ahi zongin, amaute a sih loh nadingun amaute tui tawh kisil ding uh hi.

²¹ A sih khak loh nadingun a khut uh leh a khe uh sil ding uh hi; tua in na khang tawntungun amaute'tung, ama' tung nangawn leh ama' suan-le-khakte' tungah ngeina kip khat hi ding hi,” a ci hi.

Nilh Sathau leh Paknamtui

²² Tua tham loin, Topa in Moses' kiangah,

²³ “A hoih pen a namtui nate la in: mirrah paknamtui shekel za nga leh a namtui thaksing tua zah lang, shekel zanih leh sawmnga gik, leh a khum a namtui paknamtui zanih leh sawmnga,

²⁴ biakinn shekel tawh kituakin thaksing nam khat za nga, leh oliv thau bung khat;

²⁵ nangmah in paknamtui bawlte’ bawl mah bangin a siangtho sathau nilh dingin hihte na gawm ding hi; tua in a siangtho sathau nilh hi ding hi.

²⁶ Nangmah in tua tawh kikhopna buk leh tecipan’na singkuang,

²⁷ sabuai leh a nazat khempeuh, meivakkhuam leh a nazatte leh paknamtui biakna tau,

²⁸ meihal biakna tau a nazat khempeuh tawh, kuang leh a ngakna na zut ding hi;

²⁹ tuate a siangtho pen ahih theih nadingin na siangthosak ding hi; tuate a lawng peuhmah a siangtho suak ding hi.

³⁰ Amaute in keima' tungah siampi na hong sep theih nadingun Aaron leh a tapate nangmah in sathau nilhin, amaute na siangthosak ding hi.

³¹ Nangmah in Israel mite' kiangah, ‘Hih in na khang tawntungun a siangtho keima' sathau nilh hi ding hi.

³² Mi mawkmawkte’ pumpi tungah tua sathau kisung lo ding a, tua banga a kigawm sathau dang na bawl kei ding uh hi; tua in a siangtho hi a, note' tungah a siangtho hi ding hi.

³³ Tua tawh a kibangin a bawl mi peuhmah ahi a, a pualam mi khat peuh tuate a nilhsak mi peuhmah ahi zongin ama' mite' kiang panin kikhenkhia ding hi,’ ci in,” a ci hi.

³⁴ Topa in Moses' kiangah, “A namtui nate, stakte, onikh leh galbanum, paknamtui citak tawh a namtui nate (a tamna a kikim ciatin) la in la,

³⁵ paknamtui bawlte’ hih bangin ci sawhin a nin bang lo, biakna paknamtui bawl in;

³⁶ nangmah in kimkhat a neu mahmahin na satnen ding a, nang tawh ka kituah nading mun kikhopna buk sunga tecipan’na mai-ah pawl khat na koih ding hi; tua in nangma adingin a siangtho pen hi ding hi.

³⁷ A kigawmpih ngei teng tawh na bawl ding paknamtui pen note' adingin na bawl kei ding hi; tua in note’ adingin Topa' tungah a siangtho hi ding hi.

³⁸ Tua tawh a kibangin paknamtui a bawl mi peuhmah ama' mite' kiang panin kikhenkhia ding hi,” a ci hi.