Paikhiatna 27 - Tedim Bible

Meihal Biakna Tau

¹ “Biakna tau singkha sing tawh bawlin, tong nga sau-in tong nga na zaisak ding hi; biakna tau a ning kim ding a, a tun’ tong thum hi ding hi.

² A kiu lite-ah ki na bawl ding hi; a kite in a biakna tau tawh sakhat hi ding a, sumngo tawh na zut ding hi.

³ Ama adingin vut koihna ding beelte leh kawbiate, kuangte, sikkeute leh vut luahna peekte na bawl ding hi; a nazat khempeuh sumngo tawh na bawl ding hi.

⁴ Ama adingin siklen, a vang simsiam zong sumngo tawh na bawl ding hi; siklen tung, a kiu lite-ah sumngo kual li na bawl ding hi.

⁵ Siklen in biakna tau kim ciang a bat suk theih nadingin biakna tau zawl nuai panin na bulh ding hi.

⁶ Biakna tau adingin zawl, singkha sing zawl bawlin sumngo tawh tuate na zut ding hi;

⁷ a kipuak ciangin biakna tau pang nihte-ah a zawlte a om theih nadingin a kualte’ vang sungah a zawlte kikhum ding hi.

⁸ Singpekte tawh a kuakin na bawl ding hi; mual tunga nang' tungah hong kilaksa bangin kibawl ding hi.

Biakbuk Tual

⁹ “Biakbuk tual na bawl ding hi. A tual in leitaw lam pangah pangkhat adingin tong za a sau, a kop-a kikhuk khau hoih tawh a kigan a kikhaisukte nei ding hi;

¹⁰ a khuamte sawmnih leh a bullente sawmnih pen sumngo tawh a kibawl hi ding hi, ahih hangin khuampi tunga vankhainate leh a gaknate in ngun tawh a kibawl hi ding hi.

¹¹ Leilu lam panga ding zong a sauna tua bangmah hi-in, a kikhaisukte tong za sau ding a, a khuamte sawmnih leh a bullente sawmnih in sumngo tawh a kibawl hi ding hi, ahih hangin khuampi tunga vankhainate leh a gaknate in ngun tawh a kibawl hi ding hi.

¹² Nitumna lam pangah buk tual a vai lam adingin khuampi sawmte leh bullen sawmte tawh tong sawmnga a sau a kikhaisukte om ding hi.

¹³ A mai lam, nisuahna lam buk tual a vai in tong sawmnga hi ding hi.

¹⁴ Kongpi pang khat ading a kikhaisukte in tong sawm-le-nga hi ding a, khuampi thumte leh bullen thumte tawh hi ding hi.

¹⁵ A pang lang khatah a kikhaisukte in tong sawm-le-nga hi ding a, khuampi thumte leh bullen thumte tawh hi ding hi.

¹⁶ Buk tual-a kongpi dingin a dum, a dupsan, a ausan khaute leh a kop-a kikhuk khau hoihte tawh a kigan, phim tawh khui-in a kizem, tong sawmnih a sau kongpuankhai khat om ding hi; tua in khuampi lite leh bullen li nei ding hi.

¹⁷ Buk tual kiim-a khuampi khempeuh ngun tawh kibawl gakna tawh kigak ding hi; a vankhainate ngun hi-in a bullente sumngo hi ding hi.

¹⁸ Buk tual a dung tong za khat, a vai tong sawmnga, a san’na tong nga hi-in, a kop-a kikhuk khau hoih tawh a kigan a kikhaisukte leh sumngo bullente tawh hi ding hi.

¹⁹ Biakbuk na zat ahi a kizang ding peuhmahte leh a khetphimte khempeuh leh buk tual a, khetphimte khempeuh sumngo tawh a kibawl hi ding hi.

Meivak Vakna Sathau

²⁰ “Meivak a kuang tawntung dingin a kikoih theih nading, a vak dingin amaute in a kisuzan oliv gah thau siangtho nang' kiangah hong paipih nadingin Israel mite thu na pia ding hi.

²¹ Kikhopna buk sung, tecipan’na mai-a dalna puan pua lam-ah, Aaron leh ama' tapate in nitak-a kipan zingsang dong Topa’ mai-ah meivakte kuangsak ding uh hi. Tua pen, Israel mite in amau' khang tawntungin a zuih ding uh ngeina kip khat hi ding hi.