Paikhiatna 15 - Tedim Bible

Moses’ La

¹ Tua ciangin Moses leh Israel mite in Topa' tungah hih la sa uh a, “Topa tungah la ka sa ding hi, amah in minthangin zo khin a, amah in sakol leh a tuangpa tuipi sungah lawn hi.

² Topa in ka hatna leh ka lungdamna hi a, amah in keima' kihotkhiatna suak khin hi; hih in keima' Pasian hi, amah ka phat ding hi, ka pa’ Pasian hi, amah ka liansak ding hi.

³ Topa in gal hang mi hi a, Topa in ama' min ahi hi.

⁴ “Faro’ leengte leh a galkap honpite amah in tuipi sungah lawn a, a kitengkhia ama uliante San Tuipi sungah tum hi.

⁵ Tui in amaute tuum a, suangtum bangin a thukna sungah amaute kiasuk uh hi.

⁶ Topa aw, na taklam khut, vangliatna-ah minthang hi, Topa aw, na taklam khut in galte thehthang hi.

⁷ Nangma' vangliatna tawh nangmah in na langte na lawnthal hi; nang in na hehna na khah khia a, tua in amaute buhkung bangin kangtum hi.

⁸ Na nak ging tawh tuite kiciangto a, tuite a lom-in kawm bangin ding to hi; tuipi sungah tui thukpi khal hi.

⁹ Galte in, ‘ka delh dinga, ka pha ding hi. A nate uh ka hawm ding a, ka deih zahzah-in tuate ka tang ding hi. Ka namsau ka dok ding a, ka khut in amaute susia ding hi,’ ci hi.

¹⁰ Nang in na huih tawh na mut a, tuipi in amaute tuum hi; a kihtakhuai tui sungah haknaw bangin amaute tum uh hi.

¹¹ “Topa aw, pasiante' lakah kua in nang tawh kibang ahi hiam? Kua in nang tawh kibangin, siangthona-ah lianin, minthang nasepna-ah kihtakhuai-in, nalamdang sem ahi hiam?

¹² Nang in na taklam khut na zan a, leitung in amaute nawmvalh hi.

¹³ “Nangmah in na ciamsa zui-in na tatkhiatsa mite na paipih hi, nangmah in na hatna tawh a siangtho na omna-ah amaute lam na lak hi.

¹⁴ Mite in za khin uh a, amaute liing uh hi; Filistia-ah a teng mite gimna in mancip hi.

¹⁵ Tu-in Edom ukpite lungkia uh a, Moab makaite, liin’na in mancip hi; Kanaan-ah a teeng mite khempeuh tuisuak khin uh hi.

¹⁶ Launa leh kihtakna amau' tungah tung a, nangmah' thahat vangliatna hangin amaute suangtum bangin taang loin om uh a, Topa aw, nangma' mite in a khen’ mateng, nangma' leisa mite in a khen’ mateng, amaute khikcip uh hi.

¹⁷ Nang in amaute hong paipihin nangma' mual tungah amaute na suan ding a, Topa aw, nangma' om nading mun-a na bawlsa munah, Topa aw, na khutte in a phuhsa na biakinn-ah, na koih ding hi.

¹⁸ Topa in uk tawntung ding hi,” a ci uh hi.

¹⁹ Bang hang hiam cih leh Faro’ sakolte ama' leengte tawh, a sakol tuangte tuipi sungah a pai ciangin, Topa in tuipi tuite amaute tuumsak kik hi; ahih hangin Israel mite tuipi laizang leikeu tungah pai uh hi.

²⁰ Tua ciangin Aaron’ sanggamnu, numei kamsang, Miriam in a khut-ah khuang khat tawi hi; ama' nungah numeite khempeuh lamin khuang tawh zui uh hi.

²¹ Miriam in amaute la sak hi: “Topa la sak un, amah in minthangin zo khin, amah in sakol leh a tuangpa tuipi sungah lawn hi,” a ci hi.

Marah-ah Tui Kha

²² Tua ciangin Moses in San Tuipi panin Israel mite paipih suak a, amaute Shur gamlakah pai uh hi; gamlak-ah amaute ni thum pai uh a, tui mu lo uh hi.

²³ Amaute Marah a tun’ uh ciangin a tui kha ahih manin Marah tui dawn thei lo uh hi; tua ahih manin Marah ci-in min kiphuak hi.

²⁴ Moses' tungah mite phun uh a, “Bang dawn ding i hi hiam?” ci uh hi.

²⁵ Topa’ tungah amah kiko hi; Topa in singkung khat amah lak a, amah in tui sungah tua sing lawn a, tui lim hong suak pah hi. Topa in tua lai munah amaute adingin thukham khat leh ngeina kip khat bawl a, tua lai mun-ah amah in amaute' tungah ze-et hi. Amah in,

²⁶ “Note in Topa na Pasian’ thu lim takin na ngaih uh a, ama' maiah a man nate hih-in, ama' thupiakte don a, ama' ngeina kipte khempeuh na zuih uh leh, Izipt mite' tungah ka tun’sak natnate khat beek note' tungah kong tungsak kei ding hi; bang hang hiam cih leh keimah in Topa, note hong damsakpa ka hi hi,” a ci hi.

²⁷ Tua ciangin amaute ciktui sawm-le-nih leh nisuh kung sawmsagih a omna mun Elim tung uh hi; tui gei tua mun-ah amaute in giahphual sat uh hi.