Paikhiatna 10 - Tedim Bible

Kauphe—Gimna

^1-2 Tua ciangin Topa in Moses' tungah, “Faro kiangah pai in; bang hang hiam cih leh amaute' lakah hih keima' limte ka lah theih nading leh keimah in Izipt mite gaamtak a, ka bawlna leh amaute' lakah bang limte bawl khin cihna thu na tate leh na tute’ zakna-ah na gen theih nading leh; keimah in Topa ka hihna na theih nadingin ama' lungsim leh a nasemte’ lungsim ka khauhsak hi,” ci hi.

³ Tua ahih ciangin Faro' kiangah Moses leh Aaron pai uh a ama' kiangah, “Hebru mite’ Pasian, Topa in hih bangin ci hi, ‘Ka mai-ah nang na kiniamkhiat nading bang tan vei nial ding na hi hiam? Amaute in keima' na hong sep theih nadingin ka mite paisak in.

⁴ Bang hang hiam cih leh ka mite paisak ding na nial leh, en in, zing ciangin na gam sungah kauphete kong paipih ding a,

⁵ kuamah in leitang a muh theih loh nadingin tuate in lei maitang khempeuh tuam ding uh hi; gialpi khit cianga nang adinga a om laite amaute in ne ding uh hi; amaute in gamlak-a a po nangma singkung khempeuh ne ding uh hi,

⁶ nangma innte leh na nasemte khempeuh leh Izipt mite’ innte khempeuh-ah dim ding uh hi; na pu na pate uh leitungah a pian uh a, kipan tuni donga tua bang a muh ngei lohte uh hi ding hi,’ ci hi,” ci-in a gen hi. Tua ciangin amah kihei-in Faro’ kiang panin paikhia hi.

⁷ Faro’ nasemte in ama' kiangah, “Eite' tungah hih mipa bang tan vei thangzak hong hi ding ahi hiam? Amaute in amau’ Pasian, Topa a biak theih nadingun mite paisak in; Izipt a siatna thei tel nai lo na hi hiam?” ci uh hi.

⁸ Tua ahih ciangin Faro' kiangah Moses leh Aaron kipaipih kik hi; amah in amaute' kiangah, “Pai un, Topa, na Pasian uh va bia un; ahih hangin kua teng pai ding na hi uh hiam?” a ci hi.

⁹ Moses in, “Ka khangnote uh leh ka khanghamte uh tawh ka paikhawm ding uh hi; ka tapate uh, ka tanute uh, ka tuuhonte uh leh ka bawnghonte uh tawh ka pai ding uh hi; bang hang hiam cih leh Topa’ adingin pawi khat ka kham ding uh hi,” a ci hi.

¹⁰ Amah in amaute' kiangah, “Note leh na naupangte uh kong paisak taak leh note tawh Topa om ta ve! En un, note in ngimna hoih lo na nei uh hi.

¹¹ Tua bang hilo ding! Note’ lak panin pasalte pai un la, Topa va bia un, bang hang hiam cih leh tua pen nomau’ ut ahi hi,” a ci hi. Faro’ omna panin amaute kihawlkhia hi.

¹² Tua ciangin Topa in Mose' kiangah, “Amaute Izipt leitang tungah hong omin, gialpi in a deen’ baang kung khempeuh a nek theih nadingin kauphete sapna-in Izipt leitang tungah na khut zan khia in,” ci hi.

¹³ Tua ahih ciangin Moses in Izipt leitang tungah a ciangkhut zan a, Topa in tua sun tawntung leh tua zan tawntung leitang tungah nisuahna huih nungsak hi; zingsang ciangin nisuahna huih in kauphete hong tun’ khin hi.

¹⁴ Tua ma-siah kauphe hon tua banga a tam a om ngei lo, cik mah ciangin zong a omkik ngei lo ding, Izipt leitang tung khempeuhah kauphe hong om a, Izipt gam buppi-ah om uh hi.

¹⁵ Bang hang hiam cih leh amaute in leitang bup maitang tuam uh a, leitang mial hi, amaute in leitang tunga kung khempeuh leh gialpi’ deen’ baang sing gah khempeuh ne uh hi; Izipt leitang tung khempeuhah gamlak singkung hita leh kungno hita leh a hing khat beek om lo hi.

¹⁶ Tua ciangin Faro in Moses leh Aaron nawh sap a, “Topana Pasian' tung leh nangma' tungah ka khial khin hi.

¹⁷ Tua ahih ciangin tu-in ka khialhna hong maisak in, tu-a khat vei bek, kong thum hi, keima' tung panin hih sihna a lakkhiat ding Topa na Pasian tungah thum in,” a ci hi.

¹⁸ Tua ahih ciangin Faro' kiang panin amah pai khia-in Topa' tungah thum hi.

¹⁹ Topa in nitumna huihpi hat mahmah khat nungsak a, tua huih in kauphete laamto-in San Tuipi sung den’na hi; Izipt gam sungah kauphe khat zong om nawn lo hi.

²⁰ Ahih hangin Topa in Faro’ lungsim khauhsak a, amah in Israel mite paisak lo hi.

Khuamial—Gimna

²¹ Tua ciangin Topa in Moses' kiangah, “Mite in khuamial sung a zawt nading, Izipt leitang tungah khuamial a om theih nadingin vantung lamah na khut zan in,” ci hi.

²² Tua ahih ciangin Moses in vantung lamah a khut zan a, Izipt leitang tung khempeuhah ni thum sung khuamial sahpi om hi;

²³ ni thum sung amaute khat leh khat kimu thei lo uh a, ama' omna panin kuamah tho khia thei lo hi; ahih hangin Israel mite in amau’ ten’na-ah khuavak nei uh hi.

²⁴ Tua ciangin Faro in Moses samin, “Pai in, Topava bia un; na tate uh zong note tawh hong pai thei ding hi; na tuuhonte uh leh na bawnghonte uh omsak lai un,” a ci hi.

²⁵ Ahih hangin Moses in, “Topa ka Pasian'tung uh-ah ka piak theih nadingun biak piakna leh meihal biakna kote nong neihsak kul hi.

²⁶ Ka ganhingte uh zong kote tawh a pai kul hi; ganno khat zong kinusia lo ding hi, bang hang hiam cih leh Topa ka Pasian uh ka biak nadingun tuate ka paipih ding uh hi, a mun ka tun’ matengun bang pen tawh Topa bia ding cih ka thei kei uh hi,” a ci hi.

²⁷ Ahih hangin Topa in Faro’ lungsim khauhsak a, amah in amaute paisak lo hi.

²⁸ Tua ciangin Faro in ama' kiangah, “Kei' kiang panin kihem in; nang kidawm in: ka maitang hong mukik nawn kei in; bang hang hiam cih leh ka maitang nong muh ni-in nang na si ding hi,” a ci hi,

²⁹ Moses in, “Na cih bang hi ta hen! Na maitang kong mukik nawn kei ding hi,” a ci hi.