Paikhiatna 1 - Tedim Bible

¹ Jakob tawh Izipt-ah a hong pai, amau’ innkuan ciat tawh ahi, Israel’ tapate’ minte in:

² Reuben, Simeon, Levi, leh Judah,

³ Issakhar, Zebulun, leh Benjamin,

⁴ Dan leh Naftali, Gad leh Asher ahi hi.

⁵ Jakob’ suan-le-khakte khempeuh mihing sawmsagih ahi hi; Josef pen Izipt-ah na om khin zo hi.

⁶ Tua ciangin Josef leh a sanggamte leh tua khang mi khempeuh si uh hi.

⁷ Ahih hangin Israel suan-le-khakte pung-in nakpi takin khang uh hi; amaute tampi pha-in nakpi takin a vangliatna uh khang hi; tua ahih ciangin amaute tua gamah dim uh hi.

⁸ Tu-in Josef a thei lo kumpi thak khat Izipt gamah hong khang hi.

⁹ Amah in a mihingte' kiangah, “En un, Israel mite eite’ adingin tam lua-in thahat lua uh hi.

¹⁰ Hong pai un, amaute hong tam kha ding uh ahih manin ngaihsut siamna tawh amaute hih ni, eite' tungah gal hong om leh amaute in i galte pawlin eite hong do-in hih gam panin taikhia kha ding uh hi,” ci hi.

¹¹ Tua ahih ciangin amaute nasepna tawh a gimsak dingin amaute' tungah nasem ukte koih uh hi; amaute in Faro’ adingin vankoihna Pithom leh Ra-amses khuapite lam uh hi.

¹² Ahih hangin amaute a kinenniam ciangin amaute tampi pha zaw-in kizelhthang zaw uh hi. Izipt mite in Israel mite kihta uh hi.

¹³ Tua ahih ciangin amaute in Israel mite gim mahmahin nasemsak uh a,

¹⁴ buan leh leiseek tawh a haksa nasepna leh lo sungah nasep namkim khempeuh tawh amau’ nuntakna haksasak uh hi; amaute’ sepna khempeuhah amaute in gim mahmahin semsak uh hi.

¹⁵ Tua ciangin Izipt kumpipa in khat’ min in Shifrah kici-in a dang khat min in Puah a kiciHebru mi naudomte' kiangah,

¹⁶ “Hebru numeite nau domin, nausuahna tutphah tungah a tu na muh uh ciangun, tapa ahih leh a naungek na that ding uh hi; ahih hangin tanu ahih leh na nungtasak ding uh hi,” ci hi.

¹⁷ Ahih hangin naudomte in Pasian zahtak uh a, Izipt kumpipa in amaute a thupiak bangin gamta lo uh hi, nau pasalte nungtasak uh hi.

¹⁸ Tua ahih ciangin Izipt kumpipa in naudomte sam in, amaute' kiangah, “Bang hangin hih bangin gamta-in, nau pasalte nungtasak na hi uh hiam?” ci hi.

¹⁹ Naudomte in Faro’ kiangah, “Hebru numeite in Izipt numeite tawh a kibat loh hang ahi hi; bang hang hiam cih leh amaute thadim uh a, amau' kiangah naudomte a tun’ ma-in amaute na suak khin pahpah uh hi,” ci hi.

²⁰ Tua ahih ciangin Pasian in naudomte lim bawl hi; mite khangin a thahatna uh khang hi.

²¹ Naudomte in Pasian zahtak ahih manin amah in amaute' tungah suan-le-khak a pia hi.

²² Tua ciangin Faro in ama' mihing khempeuh thupia a, “Hebru mite sung panin tapa a suak khempeuh Nail gun sungah na khia ding uh a, ahih hangin tanu khempeuh na nungtasak ding uh hi,” ci hi.