Mattiu 8 - Tedim Bible

Zeisu in Miphak Khat Damsak

¹ Zeisu mual tung pan hong kumsuk khit ciangin, mihonpi in a nung a zui uh hi.

² Tua lai takin miphak khat in Zeisu kiangah va pai-in bia a, “Topa aw, nong hih nop leh, kei nong damsak zo ding hi,” ci-in a ngen hi.

³ Zeisu in a khut zanin lawng a, “Ka hih nuam hi, na dam ta in,” a cih leh, thakhatin a dam pah hi.

⁴ Zeisu in, “Hih thu kuamah kiangah na gen kei in. Pasian’ siampi kiangah pai inla, va kilak in. Amau in a theih nadingun Moses’ thu piaksa bangin biakna na pia in,” a ci hi.

Zeisu In Galkap Mang Khat’ Nasem Damsak

⁵ Zeisu in Kapernaum khuapi-ah a tum ciangin galkap mangpa khat in a kiangah va nai a,

⁶ “Topa aw, keima nasempa khat a khut a khe si-in gim mahmah a, inn sungah a lum hi,” ci-in a ko hi.

⁷ Zeisu in, “Hong pai-in ka damsak ding hi,” a ci hi.

⁸ Galkap mangpa in, “Topa aw, keima inn khum nuaiah nong lut dingin ka kilawm kei hi. Na kam bekin thupia lecin zong ka nasempa a dam ding hi.

⁹ Bang hang hiam cih leh, keimah in zong za nuai ah hong kikoih hi. Keima nuai ah zong galkapte a om hi. Tua galkapte khat, ‘Pai in,’ ka cih ciangin a pai hi, khat ‘hong pai in’ ka cih ciangin a hong pai hi. Ka nasempa, ‘Hih na sem in,’ ka cih ciangin a sem hi,” a ci hi.

¹⁰ Zeisu in tua thu a zak ciangin lamdang sa a, “Ke’n aman takpi kong cih-inah, hih zah alian upna Israel mipawl lakah ka mu ngei kei hi.

¹¹ Ke’n kong cih-inah, mi tampi in nisuahna lam, nitumna lam panin hong pai-in, Abraham, Isaak leh Jakobte tawh Vantung Gam sungah a tukhawm ding uh hi.

¹² Gamsung mite ahih uh leh, pualam khuamial lakah a hawlkhia ding hi. Kahna leh ha gawina a om ding hi,” ci-in a nungzuite kiangah a gen hi.

¹³ Zeisu in galkap mangpa kiangah, “Na ciah in. Na upna bangin nangma ading piang ta hen,” a ci hi. Tua a nasempa in tua hunin a dam pah hi.

Zeisu In Piter’ Sungnu Damsak

¹⁴ Zeisu in Piter’ inn sungah a tum ciangin, Piter’ sungnu nattun’ a, lum a mu hi.

¹⁵ Zeisu in, a khut a lawn’ ciangin a nattun’ dam a, tho-in zinte a vaak hi.

Zeisu In Nitakin Tampi Damsak

¹⁶ Nitak ciangin a sungah dawi lut tampi Zeisu kiangah hong paipih uh a, thu khat bek tawh dawi a hawlkhia a, cinate khempeuh a damsak hi.

¹⁷ Tua thu khempeuh in kamsangpa Isaiah tungah a gen ngei bangin a tun’ nading ahi hi. A genna thu in, “Amah in eite gimna tawlna la a, eite cinatna lunatna a thuak hi,” a ci hi.

Zeisu’ Nungzui Dingte

¹⁸ Mihonpi in amah a uum Zeisu in a muh ciangin, “Galkhat ah pai ni,” a ci hi.

¹⁹ Tua lai takin laitheipa khat hong pai a, “Sia aw, na paina khempeuh ah kong zui ding hi,” a ci hi.

²⁰ Zeisu in, “Ngiate in kua nei uh hi. Vasate in zong bu a nei uh hi. Ahih hangin Mihing Tapa in ahih leh, a lutang ngak nading mun a nei kei hi,” a ci hi.

²¹ A nungzuite khat in, “Topa aw, ka pa vui masak nadingin ah thu hong pia in,” ci-in a ngen hi.

²² Zeisu in, “Misite in amau misite na vui ta hen. Ka nung hong zui in,” a ci hi.

Zeisu In Huihpi Daisak

²³ Tua khit ciangin Zeisu in gunkuang tungah tuang a, a nungzuite in a zui uh hi.

²⁴ Huih nakpi nung a, tui kilok-in gunkuang a pap hi. Zeisu a ihmu hi.

²⁵ A nungzuite in Zeisu a phong uh a, “Topa aw, kote ka si dek tak uh hi. Hong hon in,” a ci uh hi.

²⁶ Zeisu in, “Upna neute aw, bang dinga lau na hi uh hiam?” a cih khit ciangin, tho a, huih leh tuihual a taai khit ciangin a dai ta hi.

²⁷ Tua mite in, “Hih pa in bangci mi ahi hiam? Huih leh tuipi nangawn in a thu a ngai tazen uh hi!” ci-in lamdang a sa uh hi.

Gadara Gam Dawi Veite Kidamsak

²⁸ A galkhatah Gadara gam a tun’ uh ciangin, lampi ah kuama pai ngam lohna dinga om, a hangsan mahmah dawi lut nih in han lak pan pusuakin Zeisu va dawn uh hi.

²⁹ “Pasian’ Tapa aw, kote in nang tawh bang kikum i hi hiam? A hun hong tung nai lopi-in kote susia ding hong pai na hi hiam?” ci-in a kiko uh hi.

³⁰ Tua mite tawh kigamla-ah vok honkhat gamta-in a om uh hi.

³¹ Dawite in, “Topa aw, kote nong hawlkhiat leh, vok hon sungah hong lutsak in,” ci-in a ngen uh hi.

³² “Pai ta un,” a cih ciangin dawite a paikhia uh a, vokte sungah a lut uh leh, vok hon in keen sang tung pan nakpi-in taisuk uh a, tui sungah a si khin uh hi.

³³ Vok cingte tai uh a, khua sungah a lut khit uh ciangin, dawi lutte’ thu a kipan thu khempeuh a ko uh hi.

³⁴ Tua ciangin, khuazangin Zeisu dawn dingin a kuankhia uh a, Zeisu a muh uh ciangin, “Ko gam pan taikhia in,” ci-in a thuum uh hi.