Mattiu 15 - Tedim Bible

Taanglai Upate’ Ngeina

¹ Tua khit ciangin, Jerusalem khua panin Farisaite leh laitheite Zeisu kiangah va pai uh a,

² “Tanglai upate’ ngeina, na nungzuite in bang hangin palsat ahi uh hiam? Khut sil loin an a ne uh hi,” ci-in a ko uh hi.

³ Zeisu in, “Note in tanglai ngeina zui-in Pasian’ thukham bang hang palsat na hi uh hiam?

⁴ Bang hang hiam na cih uh leh, Pasian in, ‘Na nu leh na pa na zahtak in. A nu a pa a gensiate in sihna thuak ta hen,’ a ci hi.

⁵ Note na hih uh leh, ‘Keima kiangah na zat theih keima sum, Pasian ka pia zo hi,’ ci-in mi khat in a nu a pate zahtak kei ta hen,’ na ci uh hi.

⁶ Na tanglai ngeina uh zui-in, Pasian’ thukham na valmawk sak uh hi.

⁷ Isaiah in mi simtat note tungah a kituakin a gen khol hi. Isaiah a genna in:

⁸ “Hih mipawlte in amau’ kam uh tawh kei hong zahtak uh hangin, A lungsim uh, kei tawh kigamla hi.

⁹ Mite’ thukham a hilh uh a, A mawkna-in kei hong bia uh hi,” a ci hi.

A Ninsak Thei Nate

¹⁰ Tua lai takin Zeisu in mihonpite sam a, “Note in ngai un la, na thei ta un.

¹¹ Kam sungah a tumte in mi a ninsak kei hi. Kam sung pan a paikhiate in mi a ninsak thei hi,” a ci hi.

¹² A nungzuite’n va nai uh a, “Tua thugentehna Farisaite in a zak uh ciangin, a lungmang uh na thei hiam? a ci uh hi.

¹³ Zeisu in, “Vantungah a om ka Pa in a suan loh kung khempeuh kibotkhia ding hi.

¹⁴ Tua mite amau ut bangin om sak un. Amau in mittaw lamhilhte ahi uh hi. Mittaw leh mittaw lam kihilh leh, a nih un leihawm sungah a kiakhawm ding uh hi,” a ci hi.

¹⁵ Piter in, “Tua thugentehna kote hong hilh in,” ci-in a dot ciangin

¹⁶ Zeisu in, “Note in zong lungpilna nei nai lo na hi uh hiam?

¹⁷ Kam sungah a lut khempeuh in gil sungah tumsuk a, gilpi sung pan a kithakhia, thei lo na hi uh hiam?

¹⁸ Kam sung pan a paikhiate in lungsim sung pan paikhia ahih ciangin mi a ninsak thei hi.

¹⁹ A hoih lo ngaihsutna, mithahna, mi’ zi tungah mawhna, numei tawh mawhna, mi’ sum gukna, zuauthu teci pan’na, mi gensiatna, tuate in lungsim sung pan a paikhia hi.

²⁰ Tuate in mi a ninsak thei hi. Khut sil loin an nekna in hong ninsak thei lo hi,” a ci hi.

Kanaan Numei Upna

²¹ Zeisu in tua mun pan paikhia a, Tai-ar khua leh Sidon khua nai lamah a pai ciangin,

²² Kanaan numei khat in tua gam panin paikhia a, “David’ Tapa aw, kei hong hehpih in. Keima tanu in dawi’ bawlsiatna nakpi-in a thuak hi,” ci-in a kiko hangin, Zeisu in kam khat beek a dawng kei hi.

²³ A nungzuite in a kiangah va nai uh a, “Tua numei na paikhiasak ta in. I nung hong zui-in hong kiko hi,” a ci uh hi.

²⁴ Zeisu in, “Israel pawl a mangthang tuute longal adang mipawlte kiangah kei hong sawl lo hi,” a ci hi.

²⁵ Tua numei in va nai a, “Topa aw, hong huh in,” ci-in a bia hi.

²⁶ Zeisu in, “Tate an nek ding la a, uite piak ding kilawm lo hi,” a cih leh

²⁷ numei in, “Ahi mah hi, Topa aw, uite in a topa sabuai panin anneng kiate a ne uh hi,” a ci hi.

²⁸ Zeisu in, “Numei aw, na upna a lian hi. Nangma deih bangin na tungah hong piang ta hen,” a ci hi. Tua lai tak akipan tua numei’ tanu a cidam hi.

Zeisu In Mi Tampi Damsak

²⁹ Zeisu in tua gam pan paikhia a, Galile tuipi gei a tun’ ciangin mualah kahto-in a tu hi.

³⁰ Mi tampi a kiangah va tung uh a, khezawte, mittawte, mi pautheilote, mi cingtak lote a kipan, adang cinatna a vei khempeuh hong paipih-in Zeisu kiangah a nga uh hi.

³¹ Zeisu in cinate a damsak hi. Mi pautheilote a pau thei uh hi; mi cingtak lote a cingtak uh hi; khezawte in lam a pai thei uh hi; mittawte in khua a mu kik thei uh, mihonpite in a muh uh ciangin lamdang a sa uh a, Israel pawlte’ Pasian’ min a phat uh hi.

Tulli Vakna

³² Tua lai takin Zeisu in a nungzuite sam a, “Hih mite hehpih huai ka sa hi. Bang hang hiam na cih uh leh, ni thum tawntung kei tawh a omkhawm uh a, an nek ding a nei kei uh hi. Lampi ah a gim ding uh, ka lunghihmawh manin, an ne loin ka paisak nuam kei hi,” a ci hi.

³³ A nungzuite in, “Mi hih zahpi kham ding khomun, hih gampa lakah ko bang lak pan ngah ding ka hi uh hiam?” a cih uh ciangin

³⁴ Zeisu in, “Khomun pum bangzah na nei uh hiam?” ci-in a dot ciangin amaute in, “Pum sagih leh ngasa tawm a om hi,” a ci uh hi.

³⁵ Tua ciangin Zeisu in, “Mihonpi lei tungah tusak un,” ci-in sawl hi.

³⁶ Tua ciangin, khomun pum sagih leh ngasa la a, hehpihna a phat khit ciangin khomun leh ngasa balnenin a nungzuite a pia hi.

³⁷ A nungzuite in mihonpi a lui uh hi. Tua a om khempeuh in a ne uh a, a kham khit uh ciangin, a khamval a neng a themte tawm uh a, seeng sagih a ngah uh hi.

³⁸ A ne mite in numei leh naupang sim loh, pasal tul li pha hi.

³⁹ Amah in tua mihonpi a paikhiatsak khit ciangin, gunkuang tungah tuangin Magadan gamah a pai hi.