Mattiu 14 - Tedim Bible

Baptaiz Johan’ Sihna

¹ Tua lai takin Herod Kumpipa in Zeisu thu a zak ciangin,

² “Tua pa in Baptaizpa Johan ahi hi. Amah in sihna pan a tho kik zo hi. Tua ahih ciangin, hih vangliatna in ama tungah ahih hi,” ci-in a nasemte kiangah a ci hi.

³ Herod in a nau Filip’ zi Herodias thu hangin Johan a matsak khit ciangin, henin, thong sungah a khia hi.

⁴ Bang hang hiam i cih leh, Johan in, “Tua numei na teen’pih ding kilawm lo hi,” ci-in Herod kiangah a hilh hang hi.

⁵ Herod in Johan a thah nop hangin mihonpite in Johan Pasian’ kamsangpa hi sa uh ahih ciangin a lau hi.

⁶ Tua nung ciangin Herod a suah ni a tun’ ciangin pawi kham a, Herodias’ tanu in pawi khamna-ah a lam ciangin, Herod a nuam hi.

⁷ “Na hong nget peuhpeuh kong pia ding hi,” ci-in thu a ciam hi.

⁸ Tua numei in a nu hilhna bangin, “Baptaizpa Johan’ lutang dalkuang sungah hong pia in,” ci-in a ngen hi.

⁹ Kumpipa a dah hangin a kiciam zawhna leh, sabuaiah a tut khawmpihte a zahtak manin, “Pia ta un,” ci a,

¹⁰ mi khat sawl a, thong sungah Johan’ ngawng a tan sak hi.

¹¹ A lutang dalkuang sungah koih a, tua numeino a piak leh, numeino in a nu kiangah a paipih hi.

¹² Johan’ nungzuite hong pai-in a luang a la uh a, a vui khit uh ciangin Zeisu a ko uh hi.

Tul Nga Vakna

¹³ Zeisu in a zak ciangin, gunkuang tungah tuangin gam daihna munah amah bek a pai hi. Mihonte in a theih uh ciangin khuapi, khuaneu panin paikhia uh a, lei lamah a delh uh hi.

¹⁴ Zeisu paikhia a, mihonpi a muh ciangin hehpih huai sa a, cinate khempeuh a damsak hi.

¹⁵ Nitak ciangin a nungzuite in Topa kiangah va pai uh a, “Hih lai tak in gampa lak ahi hi. Ni lah a tum zo hi. Hih mihonte khua sungah an lei dingin paisak ta in,” a va ci uh hi.

¹⁶ Zeisu in, “Ka paisak nuam kei hi; amau nek ding an note’n na pia ding uh hi,” a ci hi.

¹⁷ A nungzuite in, “Khomun pum nga leh ngasa tawn nih longal a dang nek ding bangmah ka nei kei uh hi,” a cih uh ciangin,

¹⁸ Zeisu in, “Tua khomun leh ngasa hong paipih un,” a ci hi.

¹⁹ Tua ciangin, “Mihonte lopa tungah tusak un,” a cih khit ciangin Zeisu in khomun nga leh ngasa tawn nih la a, vantung lam ento-in hehpihna a phat khit ciangin, khomun leh ngasa balnenin a nungzuite a pia hi. A nungzuite in zong mihonte a lui uh hi.

²⁰ Mi khempeuhte in a ne uh a, a kham khit uh ciangin, khamval a neng a themte tawm uh a, seeng sawm leh seeng nih dim a ngah uh hi.

²¹ An ne mite in numei leh naupang sim loh pasal tul nga bang pha hi.

Tuipi Tungah Zeisu Pai

²² Zeisu in mihonte a paikhiatsak lai takin, a nungzuite gunkuangah thakhatin tuang sakin, a gal khatah a paisak masa hi.

²³ Zeisu in mihonpite a paikhiatsak khit ciangin, thu ngen dingin mual tungah amah guak kahto a, nitak dongin a va om hi.

²⁴ Gunkuang ahih leh, tuili laizangah om a, a deih lohna uh lam panin huih in lehmut ahih ciangin, tui nakpi-in kilok a, gunkuangah a tuangte in a gim uh hi.

²⁵ Zingsang khuavak ma nai thum ciangin, Zeisu in tuili tungah a nungzuite kiangah va pai hi.

²⁶ Tui tungah a pai, a nungzuite in a muh uh ciangin, “Sikha hi,” ci-in lau-in a kiko uh hi.

²⁷ Zeisu in, “Na lungdam ta un; keimah ka hi hi, na lau kei un,” a cih pah leh,

²⁸ Piter in, “Topa, nang na hih leh, kei zong nangma kiangah kong tun’ nading, tui tungah hong pai theisak in,” ci-in a nget ciangin,

²⁹ “Hong pai in,” Zeisu in a ci hi. Piter gunkuang sung pan kum a, Zeisu kiang zuan dingin tui tungah a pai hi.

³⁰ Ahih hangin huihpi nung a muh ciangin lau a, a tum dektak ciangin, “Topa aw, hong hon in,” ci-in a kiko hi.

³¹ Zeisu in thakhatin a khut zan a, Piter lenin, “Upna neupa aw, bang hangin um khial na hi hiam?” a ci hi.

³² Gunkuang tungah a kahtoh ciangin, huih nung a dai hi.

³³ Gunkuang sungah a omte in, “Pasian’ Tapa na hi takpi hi,” ci-in bokin a bia uh hi.

Zeisu in Gennesaret-ah Cina Damsak

³⁴ Tua gal khatah a kah khit uh ciangin, Gennesaret gamah a tung uh hi.

³⁵ Tua munah a om mite in Topa’ meel thei uh ahih ciangin, a kimkot gam khempeuhah mi sawl uh a, cina khempeuh a samsak uh hi.

³⁶ Cinate in Zeisu’ puan mongteep a lawn’ nadingun a ngen uh hi. A lawng khempeuhte in cidamna a ngah uh hi.