Marka 3 - Tedim Bible

A Khut Langkhat A Si Mipa

¹ Zeisu in kikhopna inn sungah khatvei lut kik a, tua munah khut langkhat sipa khat a om hi.

² Nipi ni-in cinatna a damsak ding hiam, damsak lo ding hiam ci-in amaute in Zeisu a mawhsak nop manun a en uh hi.

³ Zeisu in, “A lai zangah ding in,” ci-in khut sipa kiangah a cih khit ciangin,

⁴ “Nipi ni-in phatna bawl tuak hiam? Siatna bawl tuak hiam? Nuntakna khatpeuh gup tuak ahi hiam, thah tuak ahi hiam?” ci-in amaute kiangah a dot ciangin mihonpi pau loin a om uh hi.

⁵ Tua ciangin Zeisu in hehna tawh a kim en a, amaute lungkhauhna hangin dah a, tua pa kiangah, “Na khut zan in,” ci hi, a khut a zan leh, a dam hi.

⁶ Tua lai takin Farisaite paikhia uh a, “Zeisu bangci leeng susia thei ding i hi hiam?” ci-in thakhatin Herod’ nungzuite tawh a vaihawm uh hi.

Tuipi Gei-ah Mihonpi

⁷ Zeisu in a nungzuite tawh tuili geiah pai a, Galile gam pan mi tampi in a nung a zui uh hi.

⁸ Judah gam pan, Jerusalem khuapi pan, Idumia gam pan, Jordan gun gal khat pan, Tai-ar leh Sidon khua kim pan kipan mi tampite in Zeisu’ bawlna thu khempeuh a zak uh ciangin a kiangah a pai uh hi.

⁹ Mihonpite in Zeisu a sukkhak loh nadingun, ama kiangah gunkuang khat omsak khol dingin a nungzuite a hilh hi.

¹⁰ Bang hang hiam i cih leh, Zeisu in mi tampi damsak ahih ciangin, cina, luna, bawlsiatna a thuak mite in amah a lawn’ nadingun a va neh nuam uh hi.

¹¹ A kihhuai dawite in Topa a muh uh ciangin a mai-ah bok uh a, “Nangmah in Pasian’ Tapa na hi hi,” ci-in a kiko uh hi.

¹² Amah kua mi ahi cih gen lo dingin nakpi-in a kham hi.

Zeisu In Sawm-le-nihte Teel

¹³ Zeisu in mual tungah kahto a, a deih mite a sap khit ciangin a kiangah a pai uh hi.

¹⁴ Amah tawh a omkhawm nading ahi zongin, thuhilh a paisak ding ahi zongin,

¹⁵ dawite hawlkhiat theihna thu a neih nading uh ahi zongin sawltak mi Sawm-le-nih a koih hi.

¹⁶ Tua Sawm-le-nihte in: Simon, a min thak a phuah Piter,

¹⁷ Zebedi’ tapate Jakob leh Johan (vanging tate a cihnopna a min thak a phuah Boanerges),

¹⁸ Andru, Filip, Bartholomai, Mattiu, Thomas, Alefas’ tapa Jakob, Thaddeas,

¹⁹ Kanaan mi Simon leh Topa a lehheekpa Judas Iskariot te ahi uh hi.

Zeisu Leh Beelzebub

²⁰ Zeisu innah lut a, an kine thei lo zawzenin mihonpite khatvei a kikhawm kik uh hi.

²¹ Ama lawmte in a zak uh ciangin a man dingin a pai uh hi. Bang hang hiam i cih leh, “Amah a hai hi,” a ci uh hi.

²² Jerusalem khuapi pan a hong paisuk laitheite in, “Hih pa in Beelzebub a nei hi. Dawimangpa suangin dawite a hawlkhia hi,” a ci uh hi.

²³ Zeisu in amaute sam a, thugentehna tawh thu a hilh-inah, “Satan in Satan bangci a hawlkhia zo ding hiam?

²⁴ Gamkhat sung mi kilem loin a kikhen leh, a kip zo kei ding hi.

²⁵ Ami kilem lo a kikhen inn sung in zong a kip zo kei ding hi.

²⁶ Satan in amah leh amah kidoin kikhen leh, kip zo loin a bei ding hi.

²⁷ Mi thahatpa a hen masak kei leh, kuamah in mi hatpa’ inn sungah tumin ama sumte a sut zo kei ding hi. Mi thahatpa a hen khit ciangin, ama inn sungah sumte a sut ding hi.”

²⁸ “Ke’n aman takpi kong cih-inah mawhna leh Pasian gensiatna khempeuh maisak nading thu mite in a ngah ding uh hi.

²⁹ Ahih hangin, Kha Siangtho a gensiate in mawh maisak nading thu cikmah hunin a ngah kei ding hi. Tua pa in a tawntung khialhna thuakpa ahi ding hi,” a ci hi.

³⁰ Bang hangin hih thu gen ahi hiam i cih leh, “Amah in kihhuai dawi a nei hi,” a ci uh hi.

Zeisu’ Nu Leh Sanggamte

³¹ Tua lai takin a nu leh a sanggamte va pai uh a, inn pua lamah ding-in Zeisu sam dingin mikhat a sawl uh hi.

³² A kiim ah a tu mihonpite in, “Na nu leh na sanggamte in nang hong zongin inn pua-ah a om uh hi,” ci-in a gen uh hi.

³³ Zeisu in, “Ka nu leh ka sanggamte kuate ahi hiam?” ci-in

³⁴ a kimkot ah a tu mite en kawikawi a, “En un, hih mite in ka nute, ka sanggamte ahi uh hi.

³⁵ Bang hang hiam na cih uh leh, vantung khua-ah a om ka Pa’ deihna bang a gamtate in ka sanggampa, ka sanggamnu, ka nute ahi uh hi,” a ci hi.