Marka 2 - Tedim Bible

Zeisu In Khut-leh-khe Si khat Damsak

¹ Ni tomno khit ciangin Zeisu in Kapernaum khua-ah lut kik a, inn sungah a om thu mite in a za uh hi.

² Kongvang gei nangawn ah om nading om lo zah dongin mi tampite a kikhawm uh a, Zeisu in amaute kiangah thu a hilh hi.

³ Tua lai takin khut-le-khe si mi khat, mi li in hong pua uh a, ama kiangah a paipih uh hi.

⁴ Mihonpi om ahih ciangin Zeisu kiangah a nai zo kei uh a, ama omna tungsan innkhum a vuhlet khit uh ciangin lupna tawh cinapa a khaisuk uh hi.

⁵ Zeisu in amaute’ upna a theih ciangin a khut-le-khe sipa kiangah, “Ka ta aw, na mawhnate kimaisak zo hi,” a ci hi.

⁶ Tua munah a tu laitheite kimkhat in,

⁷ “Hih pa in bang hangin tua bangin a gen hiam? Pasian tungah a pau khial hi. Pasian longal kua in mawhna maisak zo hiam?” ci-in amaute’ sinsung uh ah a ngaihsun uh hi.

⁸ Zeisu in amaute’ lungsim sung uh ah a ngaihsut uh a kha in a theih ciangin, “Note in bang hangin na lungsim sung uh ah hih thu ngaihsun na hi uh hiam?

⁹ Khut-le-khe sipa kiangah bang pen ci leng a baih zaw hiam? ‘Na mawhna kimaisak zo hi,’ ci leng baih zaw hiam? ‘Tho in la, pai in,’ ci leng a baih zaw hiam?

¹⁰ Ahih hangin Mihing Tapa in leitungah mawhna a maisak theih nading, thu a neih lam na theih nadingun,

¹¹ “Tho in, na lupna pua in la, na innah na ciah in, kong ci hi,” ci-in a khut-le-khe sipa kiangah a gen hi.

¹² Amah thoin thakhatin a lupna pua a, amau khempeuh mai pan a paikhia hi. Tuate khempeuh in lamdang a sa uh a, “Hih bang khatvei beek ka mu ngei kei uh hi,” ci-in Pasian a phat uh hi.

Levi A Kisapna

¹³ Tua lai takin Zeisu tuili geiah a pai kik leh, mihonpi khempeuh a kiangah pai uh a, amaute thu a hilh hi.

¹⁴ Amah in lam a pai lai takin Alefas’ tapa Levi in siahdon’na buk sungah tu-in a om a mu hi. “Ka nung hong zui in,” a cih ciangin ding-in a zui hi.

¹⁵ Zeisu in Levi’ inn sungah an a nek lai takin siahdongte leh mawhnei tampite in Zeisu leh a nungzuite tawh a tukhawm uh hi. Bang hang hiam i cih leh, mi tampite in a nung a zui uh hi.

¹⁶ Zeisu in mawhneite leh siahdongte tawh an a nek khawm Farisaite leh laitheite in a muh uh ciangin, a nungzuite kiangah, “Amah in siahdongte leh mawhneite tawh bang hangin an nekhawm, tui dawnkhawm ahi hiam?” a ci uh hi.

¹⁷ Zeisu in a zak ciangin, “Cidamte in zato deih lo uh hi. Cinate bek in a deih uh hi. Miphate sam dingin hong pai ka hi kei hi. Mawhneite sam dingin hong pai ka hi hi,” a ci hi.

Antan’na Thu Dotna

¹⁸ Khatvei Johan’ nungzuite leh Farisaite in an nek a tan’ lai takun Zeisu kiangah va pai uh a, “Johan’ nungzuite leh Farisaite in an nek a tang zel uh hi. Bang hangin na nungzuite in an nek tang lo ahi uh hiam?” a ci uh hi.

¹⁹ Zeisu in, “Zipipa in a lawmte tawh a omkhawm lai takin tuate in an a tang thei uh hiam? A omkhawm lai teng an nek a tang thei kei uh hi.

²⁰ Ahih hangin, zipipa in a lawmte tawh a kikhen ni hong tung ding hi. Tua ni ciangin amaute in an nek a tang ding uh hi.

²¹ Kuamah in puanlui, puanthak tawh a thuap kei uh hi. Tua banga a thuap leh, a thuapna puanthak in puanlui keeksakin a vang gol thei hi.

²² Kuamah in savun um lui sungah leenggahtui thak a thun kei uh hi. Tua bangin a thun leh, leenggahtui in savun a puak khamsak ding a, leenggahtui leh savun a kisia gawp ding uh hi. Leenggahtui thak savun thak sungah a thun uh hi,” a ci hi.

Nungzuite In Nipi Ni-in Buhvui Zut

²³ Tua lai takin Zeisu in Nipi ni khatvei buhleiah a vak leh, lam a pai lai takun a nungzuite in buhvuite a zut uh hi.

²⁴ Farisaite in Topa kiangah, “En in, Nipi ni-in a kituak lo na bang hangin a hih uh hiam?” a ci uh hi.

²⁵ Zeisu in, “Siampipa Abiathar a khan’ lai takin, David in a lawmte tawh a gilkial lai takun,

²⁶ Pasian biakna inn sungah lut a, siampi longal midang nek dinga kilawm lo khomun siangtho ne a, a lawmte zong a piak thu sim ngeilo na hi uh hiam?

²⁷ Nipi ni mite ading a piang hi; mite Nipi ni ading a piang kei hi.

²⁸ Tua ahih ciangin, Mihing Tapa in Nipi ni nangawn ukpa ahi hi,” a ci hi.