Marka 15 - Tedim Bible

Pilat Mai-ah Zeisu

¹ A zingsang ciangin siampite in thakhatin upate, laitheite leh vaihawmte khempeuh tawh a vaihawm uh a, Zeisu khau tawh a hen khit uh ciangin paipihin, Pilat Mangpa tungah a pia uh hi.

² Pilat in, “Nang Judah Kumpipa na hi hiam?” ci-in a dot ciangin Zeisu in, “Na cih mah bangin ka hi hi,” a ci hi.

³ Siampite in amah thu tampi tawh a mawhsak uh hi.

⁴ Khatvei Pilat in, “Kam khat beek dawngkik lo ding na hi hiam? Nang lang khatah amaute in hih zah tak hong mawhsakna en in,” a cih hangin,

⁵ Zeisu in kam khat beek dawngkik lo a, Pilat in lamdang a sa hi.

A Si Dingin Zeisu Thu Kikhen

⁶ Pawikham ciangin mangpa in amaute ngetna bangin, thong sungah a kikhum mi khat a khah leng hi.

⁷ Tua lai takin misuam thong kiate lakah mi a that Barabbas kici mi khat thong sungah a kikhum khawm hi.

⁸ Mihonpite in Pilat kiangah pai to-in, amaute tungah a bawl ngei bangin a bawl nadingin a ngen uh hi.

⁹ Pilat in, “Judah Kumpipa khah leeng na ut uh hiam?” ci-in a dong hi.

¹⁰ Bang hangin hih bangin a dong hiam i cih leh, siampi liante in Zeisu a een’ manun ah a piak uh a thei hi.

¹¹ Zeisu khah loin Barabbas a khah nadingin siampi liante in mihonpi a hansuah uh hi.

¹² Khatvei Pilat in, “Tua ahih leh, Judah Kumpipa na cih uh mi bang ka ci hih ding hiam?” ci-in a dong hi.

¹³ Mihonpite in, “Tua pa singlamteh tungah that in,” ci-in a kiko uh hi.

¹⁴ Pilat in, “Bang hang hiam? Amah in mawhna bang takhial ahi hiam?” ci-a a dot ciangin, “Singlamteh tungah that in,” ci-in nakpi-in a kiko uh hi.

¹⁵ Pilat in mihonpi a lungdamsak nadingin Barabbas amaute kiangah khah a, Zeisu ahih leh, a sat khit uh ciangin, singlamteh tungah thah dingin a pia hi.

Galkapte In Zeisu Zahko

¹⁶ Tua lai takin galkapte in manginn tual ah Zeisu paipih uh a, galkap khempeuh a kikhawmsak uh hi.

¹⁷ Zeisu puansan khat silhsak uh a, ling tawh kigaan lukhu a khusak uh hi.

¹⁸ “Judah Kumpipa aw, nang na ci dam ta hen,” ci-in a kiko uh hi.

¹⁹ Pumpeeng tawh ama lutang sat uh a, cil tawh phihin, a mai-ah khukdin’in a bia uh hi.

²⁰ Tua bangin Zeisu a khelbawl khit uh ciangin, puansan suahkhia uh a, ama puan a silhsak khit uh ciangin, singlamteh tungah thah dingin a paipih uh hi.

Singlamteh Tungah Kilhna

²¹ Alekzandar leh Rufas’ pa Simon kici, Sairin mi khat gamlak panin hong pai a, zawhthawh thu tawh Zeisu’ singlamteh pua dingin a kizuisak uh hi.

²² ‘Lutangguh Mun’ a cihnopna, ‘Golgotha’ kici munah paipih uh a,

²³ zatui kha tawh kihel leenggahtui dawn dingin Zeisu a piak uh hangin amah in a sang kei hi.

²⁴ Zeisu singlamteh tungah a khai khit uh ciangin, bang a la ciat ding uh hiam, ci-in lai aisaan-in a puante a hawm uh hi.

²⁵ Zeisu singlamteh tungah a thah laitakun zingsang nai kua a pha hi.

²⁶ “JUDAHTE’ KUMPIPA HI”, ci-in a mawhsakna lai a tungah a kigelh hi.

²⁷ Zeisu tawh misuamte nih, a ziatlam khat a veilam khat, singlamteh tungah a khai uh hi.

²⁸ Lai Siangtho sungah, “Thupalsat mite tawh amah a kisimkhawm hi,” a cihna thu tua lai takin a tangtung hi.

²⁹ Lampi-ah a pai mite in, “Hei, biakna innpi susia-a nithum sunga a lam kik dingpa aw,

³⁰ nangma pumpi kigum in, singlamteh tung panin hong kumsuk in,” ci-in lu pei-in a zahko uh hi.

³¹ Tua mah bangin siampi liante leh laitheite in, “Hih mipa in midangte a gup theih hangin ama pumpi kigum zo lo hi.

³² Ka muh uh a, ka up nadingun Israel’ Kumpipa Khazih in singlamteh tung pan hong kumsuk ta hen,” ci-in khat leh khat a kici uh a, a zahko uh hi. Singlamteh tungah Zeisu tawh a kikhai khawmte in zong a zahko uh hi.

Zeisu Sihna

³³ Sun laitak, nai sawm leh nai nih a phak ciangin, nai thum dongin leitung khempeuh khua a mial hi.

³⁴ Nai thum lai takin Zeisu in,”Elio, Elio, Lama Sabakthani,” ci-in nakpi-in a kiko hi. A khiatna in, ‘Ka Pasian, ka Pasian aw, bang dingin kei hong taisan na hi hiam?’ a cihnopna hi.

³⁵ A kiangah a ding mi kimkhat in a zak uh ciangin, “Amah in “Elijah a sam hi,” a ci uh hi.

³⁶ Mi khat va tai a, tui hupna la a, tuithuk sungah a diah khit ciangin, pumpeeng dawnah suangin, a tawp dingin Zeisu pia a, “Om dih ni. Elijah in amah lakhia dingin hong pai ding, hong pai lo ding en dih ni,” a ci hi.

³⁷ Zeisu in khatvei nakpi-in a kiko khit ciangin a si hi.

³⁸ Tua lai takin Pasian biakna innpi dalna puan, a tung lam pan a nuai lam dongin phel nih kisuah hi.

³⁹ Zeisu lang khatah a ding galkap mangpa in, tua bangin Zeisu a si a muh ciangin, “Hihpa in Pasian’ Tapa taktak ahi hi,” a ci hi.

⁴⁰ Numei kimkhat in zong gamlapi panin a gal et uh hi. Tua numeite lakah Magdala khua Mari, a nau Jakob leh Joses te’ nu Mari leh Salome a om uh hi.

⁴¹ Amaute in Zeisu Galile gamah a om lai-in a nung zui-in a vak uh hi. Jerusalem khua dongin Zeisu tawh a pai, a dang numei zong tampi a om uh hi.

Zeisu A Kivuina

⁴² Tua ni in Kigin ni, nino ni ahih ciangin nitak ciangin,

⁴³ Arimathea khua Josef, a minthang upa ahi, Pasian Gam a lamenpa hong pai-in, Pilat kiangah lau loin va lut a, Zeisu’ luang a ngen hi.

⁴⁴ Zeisu tu-in a sih zawh Pilat in lamdang sa a, galkap mangpa samin, “A sihna a sawt zo hiam?” ci-in a dong hi.

⁴⁵ A sihna thu galkap mangpa kiang pan a theih ciangin, a luang Josef a pia hi.

⁴⁶ Josef in saihadial puan lei a, Zeisu’ luang a laksuk khit ciangin saihadial tawh tun a, suang kikhuak ama han sungah sialin, han kongvang ah suangpeek khat a liik hi.

⁴⁷ Magdala khua Mari leh Joses’ nu Mari-te in a luang vuina mun a mu uh hi.