Marka 12 - Tedim Bible

Leenggah Lo Leh A Khote Thugentehna

¹ Tua lai takin Zeisu in thugentehna tawh thu a hilh-inah, “Mi khat in lo lai-ah leenggah kungte suan a, gawlin uum a, leenggah cil nading to a, tausang buk khat a lam khit ciangin, lo khote khawhlawhsakin gamdangah a pai hi.

² Anlak hun a tun’ ciangin lo khawhlawhte’ khut tung panin a gah ngah dingin lo neipa in nasempa khat a sawl hi.

³ Tua lo khawhlawhte in a nasempa man uh a, a sat khit uh ciangin khut guak tawh a ciahsak uh hi.

⁴ Khatvei nasem a dang khat sawl kik a, tua pa’ lutang a liamsak khit uh ciangin a zahhuaisak uh hi.

⁵ Nasem adang khat a sawl kik ciangin amau in tua pa a that uh hi. Nasem dang tampi sawl a, kimkhat satin kimkhat a that uh hi.

⁶ Lo neipa in a it mahmah tapa sawltak khat bek a neih, ‘Tua mite in ka tapa a zahtak ding uh hi,’ ci-in a nunung penin a sawl hi.

⁷ Ahih hangin lo khawhlawhte in, ‘Hihpa in a inn luah dingpa ahi hi. Hong pai un, a luah nading teng i ngah theih nadingin amah that ni,’ ci-in khat leh khat a kikum uh hi.

⁸ Lo neipa’ tapa a mat khit uh ciangin, that uh a, leenggah lo nawl ah a paaikhia uh hi.

⁹ Tua ahih ciangin lo neipa in bangci a bawl ding hiam? Amah hong pai-in, lo khawhlawhte sugawp a, leenggah lo midangte a cingsak hi.

¹⁰ Inn lamte’n a nilkhiat suang in, A nung ciangin innkiu suang a piang hi.

¹¹ Tua thu Pasian in bawl a, Eite mai-ah a lamdang hi,” a cihna thu Lai Siangtho sungah a om note in khatvei beek sim ngeilo na hi uh hiam?” ci-in a gen hi.

¹² Amaute in amah mat nading a zon’ uh hangin mihonpi a kihta uh hi. Bang hang hiam i cih leh, amau a cihna a gen ahih lam a thei uh hi. Tua lai takin amah nusia-in a paikhia uh hi.

Kaisar Tungah Siah Piakna

¹³ Tua lai takin Zeisu’ kam tawh a mawhna man dingin Farisaite kimkhat leh Herod’ nungzuite kimkhat a kiangah a sawl uh hi.

¹⁴ Tuate in ama kiang a tun’ uh ciangin, “Sia aw, nang thutak genpa na hi hi. Kuamah na kihta kei a, mi maitang zahtak loin Pasian lam thu a tang takin na hilh cih ka thei uh hi. Kaisar kumpipa siah piak tuak ahi hiam, piak tuak lo ahi hiam?

¹⁵ Ka pia ding uh hiam, ka pia kei ding uh hiam?” ci-in a dong uh hi. Zeisu in amaute’ simtatna a theih ciangin, “Bang hangin kei hong ze-et na hi uh hiam? Denarias peek khat ka et dingin hong paipih un,” a ci hi.

¹⁶ A hong paipih uh ciangin Zeisu in, “Hih in kua lim, kua min ahi hiam?” ci-a a dot ciangin, “Kaisar kumpipa’ lim leh min hi,” a ci uh hi.

¹⁷ Zeisu in, “Kaisar kumpipa’ sum, Kaisar kumpipa na pia un. Pasian’ sum, Pasian na pia un,” a ci hi. Amaute in amah lamdang a sa uh hi.

Thawhkikna Thu Dotna

¹⁸ Misite’ thawhkikna om lo hi a ci Saddusi-te in, tua lai takin Zeisu kiangah va pai uh a,

¹⁹ “Topa aw, ‘Mi khat in a sih ciangin a zi nusia-in, ta a neih kei leh, a nau in a zi luah hen la, a u’ khang a man’ loh nadingin kizom ta hen,’ ci-in Moses in kote lai hong pia hi.

²⁰ Unau sagih a om uh hi. A upa pen in zi nei a, ta nei loin a si hi.

²¹ A nau upa pen in a zi luah a, ta nei loin a si hi.

²² Tua bangin a thumna in a hih hi. Unau sagihte in ta nei lo uh hi. A nunung penin numei zong a si hi.

²³ Thawhkik ni ciangin tua numei in tuate lakah kua pen’ zi ahi ding hiam? Bang hang hiam na cih leh, sagihte in tua numei tawh a kiteeng zo hi,” ci-in a dong uh hi.

²⁴ Zeisu in zong, “Note in Lai Siangtho ahi zongin, Pasian’ vangliatna ahi zongin thei lo na hih uh ciangin, um khial hilo na hi uh hiam?

²⁵ Bang hang hiam na cih uh leh, sihna pan a thawhkik uh ciangin kipi-in a kiteengsak kei ding uh hi. Amaute in vantungmite tawh kibangin a om ding uh hi.

²⁶ A sisate thawhkikna ding thu panin Pasian in, ‘Kei in Abraham Pasian, Isaak’ Pasian, Jakob’ Pasian ka hi hi,’ ci-in Moses in a gelh Lai Siangtho sunga sawlbawk meikuang thu sim ngeilo na hi uh hiam?

²⁷ Pasian in a site’ Pasian hi loin a nungtate’ Pasian ahi hi. Nakpi-in na khial uh hi,” a ci hi.

A Lian Thukham

²⁸ Laitheipa khat hong pai a, thu kidongte Zeisu in kituak mahmahin a dawn’ kik a theih ciangin, “Thukham lianbel bang ahi hiam?” ci-in a dong hi.

²⁹ Zeisu in, “Thukham a lianpen in, ‘Israel mipawlte aw, ngai un: eite Topa Pasian in Topa khat bek ahi hi.

³⁰ Na Topa Pasian na lungsim khempeuh, na kha khempeuh, na pilna khempeuh, na hatna khempeuh tawh na it in.

³¹ Thukham a nihna in, ‘Na pumpi na it bangin na lawmte na it in,’ ahi hi. Hih thukhamte sangin thukham lianzaw a om kei hi,” a ci hi.

³² Laitheipa in, “Topa aw, Pasian khat bek hi a, tua Pasian sim loh adang Pasian a om kei hi cih thu na gen in ahi takpi hi.

³³ Tua Pasian lungsim khempeuh tawh it a, ama pumpi a it bangin a lawmte zong a it ding in, a pum mei a khul biakna leh sagawh biakna sangin a pha zaw hi,” ci-in a gen hi.

³⁴ Tua pa in pilna tawh a gen kik Zeisu in a theih ciangin, “Nang in Pasian Gam tawh na kigamla kei hi,” a ci hi. Tua nung ciangin mi khat beek in thu a dong ngam nawn kei uh hi.

David’ Tapa Thu Dotna

³⁵ Zeisu in biakna innpi sungah thu a hilh lai takin, “Khazih in David’ Ta ahi,’ ci-in laitheite in bangci a gen thei uh hiam?

³⁶ David in: ‘Topa in, Na galte na khe nuai-ah ka koih matengin, Ka ziat lamah na tu in, ci-in ka Topa kiangah a ci hi,’ ci-in Kha Siangtho tawh a gen hi.

³⁷ David in, ‘Khazih, Topa hi,’ ci ahih ciangin, bangci-in ama ta ahi thei ding hiam?” ci-in a dong hi. Mihonte in nuam mahmahin a thu a ngai uh hi.

Zeisu In Laitheite Mawhsak

³⁸ Zeisu in thu a hilh lai takin, “Laitheite na kikeem un. Amaute in puantual silhin a vak nuam uh hi.

³⁹ Sumbuk ah zahtakna tawh hopihna, kikhopna inn sungah tokhom phabel, pawikhamna sungah tutna phabel a deih uh hi.

⁴⁰ Amaute in meigongte’ neihsa a ne mang uh a, mawhna seel nadingin sau veipi thu a ngen uh hi. Tuate in mawhsakna lianzaw a thuak ding uh hi,” a ci hi.

Meigongnu’ Piakna

⁴¹ Tua lai takin Zeisu in sumkholna mai-ah tu a, mihonpite in dangka sumkholna sungah a khiat uh a en hi. Sumhau mi tampite in tampi a khia uh hi.

⁴² A zawng meigong khat hong pai a, dangkasan pai nih a khia hi.

⁴³ Zeisu in a nungzuite sam a, “Ke’n aman takpi kong cih-inah, sumkholna sungah a khia mi khempeuh lak panin tua a zawng meigong in tam a khia bel hi.

⁴⁴ Bang hang hiam na cih uh leh, amaute in a sum val lak pan a khia uh hi. Tua numei ahih leh, a zawng napi-in ama kivak nading nangawn sit loin a khia zo hi,” ci-in a gen hi.