Mangmuhna 9 - Tedim Bible

¹ Ngana vantungmi in peengkul a tum ciangin vantung pan leitungah hong kia aksi khat ka mu a, tua mi kiangah kuam thukpi hon’na tawh a pia hi.

² Amah in tua kuam thuk a hon’ ciangin, mei phualpi sung pan bangin kuam sung pan meikhu pusuakin tua meikhu hangin ni leh vantung a mial hi.

³ Tua meikhu sung pan leitungah kauphete hong piangkhia a, tuate leitungah a om momaite’ vangliatna bang vangliatna pia a,

⁴ Amaute in lopa kung-a kipan a hing kung singkung khempeuh gai loin a taltangah Pasian ciamtehna a ngah lo mite bek bawlsiat nading thu a maute kiangah a pia hi.

⁵ Ciamtehna a ngah lo mite thah nading thu a pia kei hi, kha nga tawntung a haksa mahmah gimna a pian’sak nading thu a pia hi. Tuate gimna in momai in mi a sut ciangin a natna tawh kibang hi.

⁶ Tua nite lai takin mite in sih nading a zon’ uh hangin a mu kei ding uh hi. Amaute in a sih nop mahmah uh hangin sihna mangpa in amaute kiang pan a taikhia ding hi.

⁷ Tua kauphete meel in galsim dinga kisa khol sakol tawh kibang hi. Amau lu tung uhah kham kumpi-lukhu tawh kibang a om hi. A maitang un pasal’ maitang tawh kibang hi.

⁸ Numeite sam bangin sam a nei uh hi. A ha uh humpinelkai’ ha bang ahi hi.

⁹ A awmdalna un sik awmdal tawh kibang hi. A khazap ging in galkapna-ah a kidelh sakolleengte’ gin tawh kibang hi.

¹⁰ A mei un momai’ mei tawh kibang a, gu nei ling a om hi. Mite kha nga tawntung a bawlsiat theih nading amau mei sungah vangliatna a om hi.

¹¹ Amau tunga kumpipa in Hebru kam-in Abaddon kici, ahi zongin, Grik kam in Apollion kici ahi zongin kiphuak a, kuam thukpi’ sawltak ahi hi.

¹² Gimna khatna a bei zo hi. Gimna nih hong tung lai ding hi.

¹³ Gukna vantungmi in peengkul a tum ciangin Pasian mai-ah a om kham biakna tau ki li sung pan a pusuak aw in,

¹⁴ “Eufrates gunpi kiangah kikhiha a om vantungmi lite khah un,” ci-in peengkul a nei vantungmi gukna kiangah a gen ka za hi.

¹⁵ Tua lai takin mi seh thumsuah seh khat thah nading tua nai, ni, kha, kum hun ading a kikoih khol vantungmi lite a kikhahkhia hi.

¹⁶ Sakol galkap pawl a kisim ciangin then nih mun then khat ahi hi. Tua kisimna nambat ka za hi.

¹⁷ Mang sungah tua sakolte leh a tuang mite ka mu a, tua mite in mei bang a san, engdum leh kat banga eng awmdalnate a nei uh hi. Sakolte’ lutangte in humpinelkai’ lutang tawh kibang hi. Amau kam sung pan mei leh meikhu leh kat a pusuak hi.

¹⁸ Tua banga a pusuak mei, meikhu leh kat ahi gimna pawl thum hangin mi seh thum suah seh khat a si uh hi.

¹⁹ Tua sakolte’ vangliatna in a kam sung uhah ahi zongin, a mei uhah ahi zongin a om hi. A meite uh gul tawh kibang uh a, lutang nei-in gimna a bawl thei uh hi.

²⁰ Tua gimna hanga a si lo a om lai mite in dawi gilote tawh, a za ngeilo, amu ngeilo, a pai thei ngeilo kham milim, ngun milim, sumngo milim, suang milim, sing milimte, a biak loh nadingun a mau khut tawh a bawlnate a kisik lo tham loin,

²¹ amaute thahnate, mi bumnate, numei leh pasal mawhnate, guktaknate zong a kisik kei uh hi.