Mangmuhna 6 - Tedim Bible

Ciamtehnate

¹ Tuuno in ciamtehna sagih laka khat a hon’ ka mu hi. Tua lai takin ganhing lite-ah khat in vanging aw bang aw tawh, “Hong pai in,” hong cih ka za a,

² ka et ciangin sakol kang khat ka mu hi! Tua sakol tung tuang mi in thal a tawi hi. Tua mi kumpilukhu khat a kipia hi. Amah in zong zoin ahi zongin, zawh nadingin ahi zongin a pusuak hi.

³ Tuuno in nihna ciamtehna a hon’ ciangin, nihna ganhing in, “Hong pai in,” hong cih ka za hi.

⁴ A san ahi sakol dang khat hong pusuak hi. Tua sakol tung tuang mi in leitung pan nopsakna lakkhiat theihna thu leh leitung mi khat leh khat kithahsak theihna thu a pia hi. Amah namsau saupi khat zong a kipia hi.

⁵ Tuuno in thumna ciamtehna a hon’ ciangin thumna ganhing in, “Hong pai in,” hong cih ka za a, ka et ciangin sakol vom khat ka mu hi! Tua sakol tung tuang mi in a khut sungah tawikhaina a tawi hi.

⁶ Tua lai takin, “Mangbuh pawta khatah hamu, tang pawta thumah hamu man hen. Sathau leh leenggahzute ahih leh, su kha kei in,” ci-in ganhing lite laizang pan mah bangin aw khat ka za hi.

⁷ Tuuno in lina ciamtehna a hon’ ciangin ganhing lina in, “Hong pai in,” hong cih ka za a, ka et ciangin sakol puang khat ka mu hi.

⁸ Tua sakol tung tuang mi’ min in Sihna hi a, Hel gam in amah tawh a tonkhawm hi. Leitung seh li suah seh khat namsau tawh, kialpi tawh, pulnatna tawh, leitung gam sahangte tawh thah theihna thu amaute a pia hi.

⁹ Tuuno in ngana ciamtehna a hon’ ciangin Pasian’ thu hang ahi zongin, a san’ uh teci pan’na hang ahi zongin, thahna a thuak mite’ khate biakna tau nuai-ah ka mu hi.

¹⁰ Amaute in zong, “A siangtho, a dik Vanglianpen Topa aw, leitungah a om mite, kote’ sihna sisan hangin thu khenin daantat loin bang tan vei sawtpi na om ding hiam?” ci-in nakpi a kiko uh hi.

¹¹ Tua lai takin amau khempeuh, puanpaak khat ciat a piak khit ciangin, amaute tawh nasem khawm mite akipan amaute mah bangin thahna a thuak ding sanggamte in kicin’na a tun’ dongin tomkha a ngak lai nading thupiakna a ngah uh hi.

¹² Tuuno in gukna ciamtehna hon’ khit ciangin ka en a, nakpi-in zin a liing hi. Ni in samul tawh kigan puan bangin vom-in a suak hi. Kha in zong sisan bangin a piang hi.

¹³ Huih in theikung nakpi-in a mut ciangin a min nai lo gahte a pulhkhiat bangin vantung aksite in leitungah a pulhkhia uh hi.

¹⁴ Van in laidal zial bangin kizial mang hi. Mualte leh tuikulhte khempeuh in a omna uh pan a kinkhia uh hi.

¹⁵ Leitung kumpi mangte leh vaihawm lian upate, galkap mangte, sumhaute, thahatte, silate, to nei lote khempeuh in suanghawm leh mual suangpi lakah a bu uh hi.

¹⁶ “Ko tungah hong cim in; tokhom tungah tu-in a om mi maitang pan ahi zongin, Tuuno’ hehna pan ahi zongin, hong liah in.

¹⁷ Bang hang hiam na cih uh leh, tuate hehna a lianpi Ni hong tung zo hi. Kua in a thuak zo ding hiam?” ci-in mualte leh suangte kiangah a ci uh hi.