Mangmuhna 4 - Tedim Bible

Vantungah Biakna

¹ Tua thute khit ciangin ka et leh, vantungah kong vang khat kihongin a om ka mu hi. “Hong kahto in. A nung ciangin a piang ding nate ka hong lak ding hi,” ci-in a masa-a, kei kiangah hong gen peengkhul aw banga nakpi-a kiko aw ka zak ciangin,

² thakhatin Kha Siangtho sungah ka om a, vantungah kikoih tokhom khat ahi zongin, tua tokhom tungah tu-a a om mi khat ahi zongin ka mu hi.

³ Tua mi a meel in jasper suangmanpha leh sardis suangmanpha meel tawh kibang hi. Tokhom kimkotah zong emerald suangmanpha meel tawh kibang sakhituihup a om hi.

⁴ Tokhom kimkotah tokhom adang sawmnih leh li, leh tua tokhomte tungah puanpaak silh, kham kumpilukhu a khu upa sawmnih leh li tu-in a om uh hi.

⁵ Tokhom sung pan khuaphialep tawh, a aw gin’na tawh, vangin’na tawh a pusuak uh hi. Tokhom mai-ah Pasian’ Kha Siangtho sagih ahi, meivak sagih kivakin a om uh hi.

⁶ Tokhom mai-ah kristal tawh kibang limlang tuipi bang a om hi. Tokhom laizang leh a kimkotah, a mai a nungah mittang dimin a nei ganhing li a om hi.

⁷ Khatna ganhing in humpinelkai tawh kibang hi, a nihna ganhing in bawngno tawh kibang hi, a thumna ganhing in mi maitang tawh kibang maitang a nei hi, lina ganhing in a leeng kawikawi muvanlai tawh kibang hi.

⁸ Tua ganhing lite khat in kha guk ciat a nei uh a, a khate uh a sung a pua, mittang tawh dimin, sun tawh zan tawh khawl loin: “A om ngei, a om laitak, a hong om ding Vanglianpen Topa Pasian in, Siangtho hi, siangtho hi, siangtho hi,” ci-in kiko-in a om uh hi.

⁹ Tua ganhingte in tua bangin a tawntung nungta-in tokhom tungah tu-a a om minthan’na, pahtawina leh vangliatna leh hehpih phatnate a phat lai takun,

¹⁰ tokhom tungah tu-in a om mi mai-ah upa sawmnih leh lite in bokin, a tawntungin a nungta mi bia-in, tokhom mai-ah amaute kumpilukhu a khiatsuk khit uh ciangin:

¹¹ “Kote’ Topa, kote’ Pasian aw, nang in na khempeuh na piangsak a, Nangma deihna hangin piangin a om uh ahih ciangin, tua minthan’na, pahtawina leh vangliatnate ngah dingin na kilawm hi.” ci-in a phat uh hi.