Mangmuhna 16 - Tedim Bible

Pasian’ Hehna Haite

¹ Tua vantungmi sagihte kiangah, “Note pai un la, Pasian’ hehna hai sagihte leitungah bua un,” ci-in biakinnpi sung pan nakpi kiko aw ka za hi.

² Khatna vantungmi pai-in, ama tawi hai leitungah a buak leh, sahang ciamtehna nei-in, ama milim a bia mite tungah kihhuai meima a piang hi.

³ Nihna vantungmi in ama tawi hai, tuipi tungah a buak leh, tuipi tui in misite’ sisan bang suak a, tuipi sungah a om ganhing khempeuh a si uh hi.

⁴ Thumna vantungmi in ama tawi hai, gunte leh cikte tungah a buak leh, tui in sisan suak a,

⁵ tui ngak vantungmi in, “Tu lai takin a om, a om ngei zo, Siangtho Topa aw, nangmah in hih bangin thu na khen ahih ciangin midik na hi hi.

⁶ Bang hang hiam na cih leh, amaute in misiangthote’ sisan leh kamsangte’ sisan a bua uh a, amaute sisan na dawnsak zo hi. Amaute zong a dawn dingun kilawm hi,” a cihna ka za hi.

⁷ Biakna tau in zong, “Ahi hi. Vanglianpen Topa Pasian aw, na thukhennate a man a dik uh hi,” a cih thu ka za hi.

⁸ Lina vantungmi in ama tawi hai ni tungah a buak leh, ni in mite mei a katsak nading thu a ngah hi.

⁹ Mei sa pha lua-in mite a kang tum uh a, gimnate a uk Pasian’ min a kosia uh hi. Topa’ vangliatna phat nading a kisik kei uh hi.

¹⁰ Ngana vantungmi in ama tawi hai sahang tokhom tungah a buak leh, sahang gam in khuamial suak a, a gamsung mite in na sa-in a leii uh a gawi uh hi.

¹¹ Amau natna meimate hangin vantung Pasian a kosia uh hi. Amaute gamtatnate zong a kisik kei uh hi.

¹² Gukna vantungmi in ama tawi hai Eufrates gunpi tungah a buak leh, ni suahna lam pan hong pai uh kumpite ading a baihsa a pian’ nadingin guntui a kang hi.

¹³ Tua lai takin gulpi kam, sahang’ kam, thuzuau hilhte’ kam uh sung pan uiphuk tawh kibang a kihhuai kha gilo pawl thum a pusuakkhia ka mu hi.

¹⁴ Amaute in nalamdangte lakin Vanglianpen Pasian’ ni lianpi-ah galdo-in leitung khempeuh pan kumpite kikhawmsak dingun a paikhia dawigilo’ khate ahi uh hi.

¹⁵ En in, keimah in guta hong pai bangin ka hong tung ding hi! Puan silh loin pai-in mi mai-ah zumna om loh nadingin ngakin, ama puante a keem mi in thupha a ngah ding hi.

¹⁶ Dawigilo khate in kumpite, Hebru kamin Armageddon a kici munah a kikhawmsak uh hi.

¹⁷ Sagihna vantungmi in ama tawi hai huih lakah a buak leh, “A zo zo hi!” ci-in biakinnpi sung tokhom pan nakpi-in aw kiko a,

¹⁸ khuaphialepte, awte, vangingte a piang uh hi. Mite in leitungah a om uh-a kipan cikmah huna piang ngei lo a lian a haksa mahmah zinlin’na a piang hi.

¹⁹ Khuapi in seh thumin a kikhen hi. Gam sungah a om khuapite zong a cim uh hi. Babilon khuapite zong Pasian’ hehna lianpi leenggahzu hai a dawnsak dingin Pasian mai-ah tua khuapi kiciamtehin a om hi.

²⁰ Tuikulh gam khempeuh a mangthang hi. Mualte zong kimu lo hi.

²¹ Tua lai takin vantung pan tawi zali bang a gik gialpi kia a, mite in tua gialpi gimna hangin Pasian a kosia uh hi, bang hang hiam na cih uh leh, tua gimna in a lian mahmah hi.