Mangmuhna 13 - Tedim Bible

Sahang Nihte

¹ Gulpi in tuipi gei sehnel tungah ding-in a om hi. Tua laitakin ki sawm, lutang sagih, ki tungah lukhu sawm, lutangte zong kosiatna pawl a min nei sahang khat in tuipi sung pan hong kahto ka mu hi.

² Ka muh sahang in kamkei tawh kibang hi. A khete vomkhe tawh kibang hi. A kam in humpinelkai’ kam tawh kibang hi. Gulpi in a vangliatna ahi zongin, a tokhom ahi zongin, a aana ahi zongin tua sahang a pia hi.

³ Tua sahang lutang khat in si dektaka sukkhakna liamma a nei hi. Tua liamma in a dam khin zo hi. Leitung mi khempeuh in tua sahang zui-in, lamdangsa-in,

⁴ amah aana a pia gulpi a bia uh hi. Sahang zong, “Kua in hih sahang tawh kibang hiam? Kua in amah tawh kido zo ding hiam?” ci-in a bia uh hi.

⁵ Tua sahang kiangah a lianpi thute leh kosiatna thu tampi a gen thei muk ahi zongin, kha sawmli leh kha nih tawntung om nading thu ahi zongin, a pia hi.

⁶ Sahang in Pasian ahi zongin, Pasian’ min ahi zongin, a buk ahi vantungah a om mite ahi zongin a gensia dingin a kam a ka hi.

⁷ Misiangthote tawh zong kido a, a zawh nading thu a pia hi. Minam, mipawl, kam, gam khempeuh tungah ukna thu a ngah hi.

⁸ Leitung a cil panin thahna a thuak khin Tuuno’ nuntakna laibu sungah a min uh a kigelh lo leitung mi khempeuh in sahang a bia ding uh hi.

⁹ Mi khatpeuh in bil a neih leh, ngai ta hen.

¹⁰ A kiman dingte a kiman ding hi. Mi khatpeuh in namsau tawh midang a thah leh, tua in zong namsau tawh thahna a thuak ding hi. Hih thu-ah misiangthote’ thuakna leh upna a om hi.

¹¹ Tua khit ciangin lei sung panin adang sahang khat pusuak ka mu hi. Tua sahang in tuuno bangin ki nih nei a, gulpi bangin a pau thei hi.

¹² Amah in a masa sahang mai-ah a masa sahang’ ngah aana khempeuh nei-in, a si dektak a liamna ma a dam kik a masa sahang pen leitung leh leitung mi khempeuh a biasak hi.

¹³ Mite maitangah vantung panin leitung dongin mei a kiatsak dongin nalamdang a lian mahmah a lak hi.

¹⁴ Sahang mai-ah amah lah theih ding a ngah nalamdangte hangin amah in leitungah a om mite kheemin, tem satna ma a om, a nungta sahang’ milim khatpeuh peuh bawlsak in ci-in leitungah a om mite kiangah a cih khit ciangin,

¹⁵ tua milim kam a pau theih nading nuntakna a thun theih na’ng thu a ngah tham loin, tua milim a bia lo mi khempeuh a thahsak theih na’ng thu a ngah hi.

^16-17 Tua ahih ciangin amah in upa, naupang, sumhau, mizawng, sila, to nei lote khempeuh sahang’ min ahih kei leh, tua min ciamtehna khatpeuh peuh a nei lo mi peuhmah in sumzuak thei lo, lei thei lo dingin mi khempeuh a khut taklam tungah ahi zongin, a taltang tungah ahi zongin a ciamtehsak hi.

¹⁸ Hih thu-ah pilna a om hi. Pilna a nei mi in sahang’ nambat sim ta hen. Bang hang hiam i cih leh, mi khatpeuh’ nambat ahi hi. Tua nambat in zaguk sawmguk-guk ahi hi.