Luka 8 - Tedim Bible

Numei Kimkhat In Zeisu Zui

¹ Tua nung a sawt loin, Zeisu in khuapi khuaneu-ah vak kawikawi in thu hilh a, Pasian’ Gam Lungdamna Thu a zasak hi. Amah tawh Sawm-le-nihte a pai khawm uh hi.

² Dawi gilo lut leh cinatna a damsak numeite in a zui uh hi. Tuate lakah dawi gilo sagih a hawlkhiatna, Magdalene kici Mari,

³ Herod’ nasempa Khuza’ zi Joanna leh Susanna a kipan adang tampite in zong amau sum tawh amaute kivakin a zui uh hi.

Khaici Vawhpa Thugentehna

⁴ Mi tampite hong kikhawm uh a, khua khempeuh panin mite in ama kiangah hong pai lai takun, Zeisu in thugentehna tawh thu a hilh-inah,

⁵ “Khaici vawhpa in khaici vawh dingin a kuankhia hi. Khaici a vawh lai takin kimkhatte in, lam geiah kia a, kisik gawpna thuak a, van a, vasate in tawmin a ne uh hi.

⁶ Kimkhatte in suang lakah kia a, a po ciangin lei kawt zo lo ahih manin a vul gawp hi.

⁷ Kimkhatte in ling lakah a kia hi. Ling kungte in amau tawh pokhawm uh a, a dep gawp uh hi.

⁸ Kimkhattte in lei hoihna-ah kia a, kung po a, a zah zakhat a gah hi,” ci-in a gen khit ciangin, “Zak nading bil a nei teng in na za ta un!” ci-in a kiko hi.

Thugentehna A Deihna

⁹ A nungzuite in, “Tua thugentehna bang ahi hiam?” ci-in a dong uh hi.

¹⁰ Zeisu in, “Note in Pasian’ Gam thusimte na theihtheih nadingun thu hong kipia hi. Midangte ahih leh, en napi-in mu lo ding uh hi. Ngai napi-in a khiatna a theih loh nadingun thugentehna tawh kihilh ding hi.”

Zeisu In Khaici Vawhpa Thugentehna Tel Gen

¹¹ “Thugentehna in hih bang ahi hi; Khaici in Pasian’ thu ahi hi.

¹² Lampi geiah a kiate in, thu a zak khit uh ciangin thu um uh a, gupna a ngah loh nadingun, dawimangpa hong pai-in, a sinsung uh pan thu a lakkhiatte ahi uh hi.

¹³ Suang lakah a kiate in, thu a zak ciangin lungdamin a mang pahte ahi uh hi. Amaute in zung kip nei lo uh a, tawlkhat kikal a up uh hangin khemna a thuak uh ciangin a tawp kik uh hi.

¹⁴ Ling lakah a kiate in, thu a zak khit uh ciangin amau deihna bang zui-in, lunghihmawhna, sum hauhna leh leitung lungdamnate in dep gawp a, gah a gah lote ahi uh hi.

¹⁵ Lei hoih ah a kiate in, thuman leh apha lungsim tawh thu a zak khit uh ciangin keem uh a, lungkipin a gahte ahi uh hi.”

Beel Nuai-ah Meivak

¹⁶ “Meivak a vak khit ciangin beel a khuh ahi zongin, lupna nuai-ah a koih ahi zongin kuamah a om kei hi. A lut mite in meivak taang a muh nadingun kho sangah a vak uh hi.

¹⁷ Bang hang hiam na cih uh leh, a kipholaak lo ding thusim bangmah om lo hi. Khuavak in taan’ in, a kithei lo dinga a kiseelsim thei bangmah om lo hi.

¹⁸ Tua ahih ciangin note in bangci na zak uh hiam, na kikeem un. Bang hang hiam na cih uh leh, a neite kipiak beh ding hi. A nei lote kiang pan a neihsa a upmawh nangawn kilakhia ding hi,” ci-in thu a hilh hi.

Zeisu’ Nu Leh Sanggamte

¹⁹ Tua lai takin Zeisu’ nu leh a sanggamte in a kiangah a pai uh hangin, mihonpi a om manun ah a va nai thei kei uh hi.

²⁰ “Na nu leh na sanggamte in hong hopih nuamin inn pua lamah ding-in a om uh hi,” a cih uh ciangin,

²¹ Zeisu in, “Pasian’ thu za-a a mangte in ka nu, ka sanggampa, ka sanggamnu ahi uh hi,” a ci hi.

Zeisu In Huihpi Daisak

²² Ni khat Zeisu in a nungzuite tawh gunkuang ah a tuang hi. “Tuili gal khatah pai ni,” a cih khit ciangin a pai uh hi.

²³ Gunkuang tungah tuangin a pai lai takun Zeisu a ihmu hi. Tuipi tungah huihpi nakpi nungsuk a, gunkuang sungah tui kidim a, amaute in kisiat ding a lau uh hi.

²⁴ Zeisu kiangah pai uh a, “Topa, Topa aw, kote ka si dek tak uh hi,” ci-in a phong uh hi. Zeisu tho a, huihpi leh tui kilok a taai khit ciangin khawlin, a dai hi.

²⁵ Zeisu in, “Na upna uh koi-ah om hiam?” ci-in a dong hi. Amaute lau uh ahih ciangin, lamdang a sa uh a, “Hih mi in kua mi ahi hiam? Huih leh tui nangawn thu a piak ciangin a ngai tazen uh hi,” ci-in khat leh khat a kikum uh hi.

Geresa Gam Dawi Veipa Kidamsak

²⁶ Galile gam galah Geresa gam a tung uh a,

²⁷ Zeisu lei tungah a kahtoh ciangin tua khua panin dawi lut mi khat in a dawn hi. Tua pa in sawtveipi puan silh lo a, innah om loin han lakah a om hi.

²⁸ Amah in Zeisu a muh ciangin, a mai-ah bokin, “Sang Bel Pasian’ Tapa Zeisu aw, nang tawh bang kikum i hi hiam? Kei nong bawlsiat loh nadingin kong thuum hi,” ci-in nakpi-in a kiko hi.

²⁹ Hih thu bang hangin a thuum hiam i cih leh, Zeisu in kihhuai dawi in tua pa sung pan a taikhiat nadingin thu a pia hi. Dawi in tua pa tamveipi a man zo hi. Sikkhau tawh kihen a, kolbulh in, a kikhum hangin, a sikkhau peeksat a, dawi in gampa lakah a hawlkhia hi.

³⁰ Zeisu in, “Na min bang ahi hiam?” ci-in a dot ciangin, “Ka min Legion ahi hi,” a ci hi. Bang hang hiam i cih leh, dawite tampi in ama sungah a lut zo uh hi.

³¹ A thuk leinuai-ah pai nading thu a piak loh nadingin dawite in a thuum uh hi.

³² Tua san tak mual tungah vok honpi khat gamta-in a om uh hi. Amaute in vok sungah lut nading thu a piak na’ng dawite in a nget uh ciangin, Zeisu in thu a pia hi.

³³ Dawite in tua pa sung pan paikhia uh a, vokte sungah a lut uh leh, vok honpite in kensang tung pan taisuk uh a, tuili sungah tuakin a si khin uh hi.

³⁴ Vokcingte in tua thu a muh uh ciangin, tai uh a, khua sung leh gam sungah hih thu a gen uh hi.

³⁵ Mite in bang thu piang hiam ci-in en dingin a kuankhia uh hi. Amaute in Zeisu kiang a tun’uh ciangin, dawi paikhiatnapa puan silhin mipil bangin Zeisu’ khe kiangah tu-in a om a mu uh a, a lungmang uh hi.

³⁶ A mu mite in dawi lutpa in bangci cidamna ngah hiam ci-in amaute in a zasak uh hi.

³⁷ Geresa gam mi khempeuhte in launa lungsim nei uh ahih ciangin, amaute kiang pan a paikhiat nading Zeisu a nget uh ciangin, gunkuang sungah tuangin a ciah hi.

³⁸ Dawite a paikhiatnapa in Zeisu tawh a omkhawm nadingin thu a nget ciangin,

³⁹ Zeisu in, “Na innah ciah in la, Pasian in nangma tungah bangzah takin noptuamna hong bawl cih na zasak in,” ci-in a sawl hi. Tua pa pai a, Zeisu in ama tungah bangzah tak noptuamna bawl hiam ci-in khua sung khempeuh thu a kizeelsak hi.

Jairas’ Tanu Leh Zeisu’ Puan A Lawng Numei

⁴⁰ Zeisu a ciahkik ciangin, mihonpite in nuamin a tungsak uh hi. Bang hang hiam i cih leh, amah lamenin a om uh hi.

⁴¹ Tua lai takin Jairas min nei, kikhopna inn ukpa khat in va nai a, Zeisu’ khe kiangah bokin ama innah a pai nading thu a ngen hi.

⁴² Bang hang hiam i cih leh, kum sawm leh kum nih a pha tanu khat nei a, tua a tanu si dek tak hi. Zeisu a pai lai takin, mihonpi in amah a phukha uh hi.

⁴³ Tua lai takin, kum sawm leh kum nih tawntung si luang cinatna vei a, a neihsa tengin zatote a guaih hangin kuamah in a damsak zawh loh numei khat in,

⁴⁴ a nung lamah pai-in a puan mongteep a lawn’ ciangin thakhatin a si suahna a kang hi.

⁴⁵ Zeisu in, “Kua in hong lawng hiam?” ci-in a dong hi. Mi khempeuh in a nial uh ciangin Piter in, “Topa aw, mihonpite in nang hong phukha a, hong sukha uh hi,” a ci hi.

⁴⁶ Zeisu in, “Mi khat in kei hong lawng hi. Bang hang hiam na cih uh leh, ka tung panin vangliatna a paikhia ka thei hi,” a ci hi.

⁴⁷ Numei in amah bu zo lo ci-in a theih ciangin, liingin hong pai a, Zeisu mai-ah bokin, bang hangin Zeisu lawnga thakhatin bangci damna a ngah pah thu, mi khempeuh mai-ah a gen hi.

⁴⁸ Zeisu in, “Ka tanu aw, na upna in nang hong damsak zo hi. Nuam takin na ciah in,” a ci hi.

⁴⁹ Zeisu in tua thu a gen lai takin, kikhopna inn ukpa’ inn panin mi khat hong pai a, “Na tanu a si zo hi. Siapa gimsak kei in,” ci-in a gen hi.

⁵⁰ Ahih hangin Zeisu in a zak ciangin, “Lungmang kei in, upna na neih leh, amah a dam ding hi,” ci-in kikhopna inn ukpa kiangah a gen hi.

⁵¹ Zeisu in a inn a tun’ ciangin Piter, Johan, Jakob leh numeino’ nu leh pate longal, midang kuamah amah tawh inn sungah a lut khawm nading thu a pia kei hi.

⁵² Mi khempeuh in numeino hangin nakpi-in a kap uh a, thuumin a om uh hi. Zeisu in, “Kap kei un.

⁵³ Amah a si kei hi, a ihmu hi,” a cih ciangin, numeino a si cih amau thei uh ahih ciangin, Zeisu zahpihin a nuihsan uh hi.

⁵⁴ Zeisu in numeino’ khut len a, “Numeino aw, tho in,” a ci hi.

⁵⁵ Tua ciangin a kha ciahkik a, thakhatin a tho hi. Amah an a piak nadingin thu a pia hi.

⁵⁶ A nu leh pate in lamdang a sa uh hi. Ahih hangin Zeisu in a kihih nate kuamah kiangah gen lo dingin a kham hi.